ءبىلىم • 31 ناۋرىز، 2020

ماحامبەت ۋنيۆەرسيتەتىنىڭ 5 مىڭ ستۋدەنتى ونلاين وقيدى

142 رەتكورسەتىلدى

ماحامبەت وتەمىس ۇلى اتىنداعى باتىس قازاقستان مەملەكەتتىك ۋنيۆەرسيتەتىنىڭ 5 مىڭنان اسا ستۋدەنتى قاشىقتان ءبىلىم بەرۋ ءۇردىسى وڭتايلى جۇزەگە اسىرىلۋدا

- ءبىزدىڭ ۋنيۆەرسيتەتتە قازىر قاشىقتىقتان وقىتۋ ءۇردىسى MOODLE، ZOOM، VIBER، WHATSAPP، INSTAGRAM، SKYPE، MicroSoft Teams ت.ب. اۆتوماتتاندىرىلعان اقپاراتتىق جۇيە باعدارلامالارى مەن الەۋمەتتىك جەلىلەردىڭ كومەگىمەن ءتيىمدى جۇزەگە اسىرىلىپ جاتىر. سونىڭ ىشىندە، قاشىقتان وقىتۋدى جۇزەگە اسىرۋ ماقساتىندا MOODLE اۆتوماتتاندىرىلعان اقپاراتتىق جۇيەسىنە بارلىق ماماندىق پەن ءبىلىم بەرۋ باعدارلامالارى جۇكتەلىپ، 1000-عا جۋىق ءپان ەنگىزىلدى، - دەيدى بقمۋ-دىڭ ءباسپاسوز قىزمەتى جەتەكشىسى ريتا سۇلتانعاليەۆا.

اتالعان اقپاراتتىق جۇيەگە ۋنيۆەرسيتەتتىڭ 5 مىڭنان اسا ستۋدەنتى مەن 400-گە جۋىق وقىتۋشىسى تىركەلگەن. سونىمەن قاتار بۇل جۇيەگە بارلىق ماماندىق پەن ءبىلىم بەرۋ باعدارلاماسى بويىنشا ەلەكتروندى وقۋ-ادىستەمەلىك كەشەندەر مەن وقۋ-ادىستەمەلىك ماتەريالدار – دارىستەر، سەمينارلار، ستۋدەنت پەن ماگيسترانتتاردىڭ ورىندايتىن وزىندىك جۇمىس تاپسىرمالارى، اۋديو-بەينە دارىستەر، ەلەكتروندى وقۋ قۇرالدارى جۇكتەلگەن. وقۋ ورنىنىڭ ينتەرنەت جىلدامدىعى 110 مب/س قۇرايدى.

ۋنيۆەرسيتەتتە MOODLE ايس جۇيەسىندە جۇمىس جۇرگىزۋ ءۇشىن ستۋدەنتەر مەن ماگيسترانتتار جانە وقىتۋشىلارعا وقىتۋ سەمينارلارى وتكەن. بارلىق ءبىلىم الۋشىعا وقۋ ورنىنىڭ عىلىمي كىتاپحاناسى مەن رەسپۋبليكالىق جوعارى وقۋ ورىندارىنىڭ كىتاپحانالارىنىڭ ەلەكتروندى قورىنا كىرۋ مۇمكىندىگى جاسالعان. ۋنيۆەرسيتەت سايتىندا قاشىقتان ءبىلىم بەرۋ پورتالىندا جۇمىس جاساۋعا ارنالعان وقىتۋ پرەزەنتاتسيالارى دا جۇكتەلگەن.

- ەلىمىزدەگى توتەنشە جاعدايعا بايلانىستى بارلىق جوعارى وقۋ ورىندارى مەن ءبىلىم بەرۋ ۇيىمدارى قاشىقتان وقىتۋ تەحنولوگياسى ارقىلى ءبىلىم بەرۋدى وڭتايلى جۇزەگە اسىرۋى ءتيىس. قازاقستان رەسپۋبليكاسى ءبىلىم جانە عىلىم ءمينيسترى اسحات ايماعامبەتوۆ وسى ماسەلەگە وراي ارنايى بريفينگ وتكىزىپ، ەڭ باستى ماسەلەلەردى جان-جاقتى تۇسىندىرگەن بولاتىن. بۇل تەحنولوگيانى مەڭگەرگەن بىلىكتى مامان شەبەرلىگىن كورسەتىپ، شاكىرتتەرىنىڭ تەرەڭ ءبىلىم الۋىنا، جاۋاپكەرشىلىگىن كۇشەيتىپ، ءوزىن ءوزى دامىتۋعا جول اشارى ءسوزسىز، - دەيدى ريتا سۇلتانعاليەۆا.

 

باتىس قازاقستان

سوڭعى جاڭالىقتار

ۇقساس جاڭالىقتار