ايماقتار • 31 ناۋرىز، 2020

وقشاۋلانعان ۇيدەن كارانتين الىندى

24 رەتكورسەتىلدى

29 ناۋرىز كۇنى كوروناۆيرۋس جۇقتىرعانى بەلگىلى بولعان ورالدىق ايەل تۇراتىن كوپقاباتتى ءۇي تۇگەل وقشاۋلانىپ، تۇرعىندارى پاتەردەن شىقپاۋ تۋرالى نۇسقاۋ العان ەدى. ارادا ەكى كۇن وتكەندە ول ۇيدەن كارانتين الىندى.

وسىعان وراي «ول ايەلدىڭ بويىنان كوروناۆيرۋس تابىلعانى قاتە ەكەن» دەگەن قاۋەسەت تە تاراپ ۇلگەردى. الايدا باتىس قازاقستان وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى ناۋقاستىڭ راسىمەن دە اۋرۋ جۇقتىرىپ، قازىر ەمدەلىپ جاتقانىن حابارلادى. ال ونىمەن قارىم-قاتىناستا بولعان جاندار ارنايى ورىندا وقشاۋلانىپ، ءتيىستى تەكسەرۋدەن وتكىزىلگەن، ولاردىڭ بويىنان ۆيرۋس بەلگىلەرى تابىلماعان. ناۋقاس تۇراتىن ءۇيدىڭ بارلىق كىرەبەرىسى تولىق دەزينفەكتسيا شاراسىنان كەيىن ول ۇيدەن كارانتين الىنعان.

ايتا كەتەيىك، 1972 جىلى تۋعان ورالدىق ايەل 28 ناۋرىز كۇنى اتىراۋ قالاسىنان ءىسساپاردان كەلگەن سوڭ ءوز بويىنان اۋرۋ بەلگىلەرىن بايقاعان. ول بىردەن ساقتانىپ، ەشكىممەن قارىم-قاتىناس جاساماي، كوروناۆيرۋسقا كۇدىگى بار تۇلعالاردى وقشاۋلاۋ ورتالىعىنا جەكە كولىگىمەن ءوزى بارعان. سول جەردە جاسالعان تەست ناتيجەسى ونىڭ قاۋىپتى ۆيرۋستى جۇقتىرعانىن كورسەتكەن. ناۋقاس قازىر باتىس قازاقستان وبلىستىق جۇقپالى اۋرۋلار اۋرۋحاناسىندا، دارىگەرلەردىڭ ايتۋىنشا جاعدايى قاناعاتتانارلىق.

باتىس قازاقستان

سوڭعى جاڭالىقتار

ۇقساس جاڭالىقتار