«كوروناۆيرۋس», «كارانتين» دەگەن سوزدەر قازىرگى تىلمەن ايتقاندا ترەندتە تۇرعانى وتىرىك ەمەس. «بالەدەن ماشايىق قاشىپتى», «اتىڭ وشكىردى ءسوز ەتپەيىك!» دەگەنىمىزبەن الاڭداتىپ وتىرعان اۋىر احۋالدى اينالىپ ءوتۋ مۇمكىن بولماي وتىر. ارينە, سىزدەردەن اۋليە ەمەسپىز, ءبىر عانا ايتارىمىز, ەگەر ساقتانىپ وتىرعاندارىڭىز راس بولسا, وندا سارى ۋايىمعا سالىنىپ, تازا سارىلا بەرۋدىڭ قاجەتى جوق سياقتى.
باسىندا بەيساۋات قاتەردى قيسىنسىز قالجىڭعا اينالدىرعاندارعا قاتتىراق ايتقانىمىز راس. الايدا سالاۋاتتى ءومىردى ناسيحاتتاپ, سىرقاتتى ساركازممەن سويىلداپ جاتقانداردى شىعارماشىلىق تۇرعىدان اقتاۋعا ءتيىسپىز. ايتقىمىز كەلىپ وتىرعانى كارانتيندەگى كاريكاتۋرالار تۇمان باسقان تۇلدىر ويىمىزدى ءسال دە بولسا سەيىلتەتىنىن بايقادىق.
ۋكراينالىق كاريكاتۋرا شەبەرى ۆالەري موموت كارانتين رەجىمىنە ارنالعان كاريكاتۋرالار سەرياسىن شىعارىپ ۇلگەرىپتى. ءباسپاسوز قۇرالدارىنا بەرگەن سۇحباتىندا ول «باستىسى, ارينە, دەنساۋلىق. ادامدارعا ايتارىم, ءازىل-وسپاق سەزىمىن جوعالتپاڭىزدار, وپتيميست بولىڭىزدار, وسىنىڭ ءبارى قازىرگى كەزدەگى قيىن جاعدايدى جەڭۋگە كومەكتەسەدى» دەيدى.
رەسەيلىك سۋرەتشى سەرگەي ەلكيننىڭ دە ساياسي استارى سالماقتى سىقاق سۋرەتتەرى كۇندەلىكتى Deutsche Welle مەديا كومپانياسىنىڭ ينتەرنەت-بەتتەرىندە شىعىپ جاتىر. «Svoboda.org» پورتالى اتالعان قىلقالام شەبەرىنىڭ كاريكاتۋرالارىن كۇن سايىن بەرىپ وتىر.
كوروناۆيرۋستى وتاندىق سۋرەتشىلەر دە قىلقالامدارىمەن تۇيرەلەپ جاتىر. جىعىلاتىن جاۋ كورىنبەيدى, اتتەڭ...
بەلگىلى كاريكاتۋرا شەبەرى عالىم سماعۇل ءوزىنىڭ فەيسبەكتەگى پاراقشاسىنا ۇرادا تىعىلىپ امان قالعان ادامدى بەينەلەپ: «سوعىستا كوپ شوشاڭداماي وكوپتا جاتىپ, ەلىنە امان كەلگەن اتامىزدىڭ تاكتيكاسىنا كوشەيىك» دەپ جىميىپ قويىپتى.
عالەكەڭنىڭ «Nege.kz» سايتىنا بۇدان بولەك بىرنەشە كاريكاتۋراسى جاريالانىپ ۇلگەردى. ءبىر سۋرەتتە ءانشى مارات وماروۆ كۇيساندىقتىڭ الدىندا «كوروناۆيرۋس, كەت, كەت, كەت!» دەپ اڭىراتىپ ءان ايتىپ جاتىر. الدىڭعى شەپتە جاپ-جاسىل ۆيرۋستاردىڭ اسكەرى دە, ءانشىنىڭ تىلىندا اق حالاتتى دارىگەرلەردىڭ قوسىنى قول جيىپ تۇر.
بەلگىلى سۋرەتشى, ديزاينەر اڭساعان مۇستافا دا اتالعان اتى جوق ىندەتتىڭ قاتەرىن ەسكەرتىپ, ءوز كوزقاراسىن ءبىلدىرىپتى.
اڭساعاننىڭ «ۇيدە وتىر!» دەگەن سۋرەتى شىنىمەن دە قاتەردىڭ قولىنداعى شالعى ساقتانباساق كەز كەلگەنىمىزدىڭ جەلكەمىزدى قيىپ ءتۇسۋى مۇمكىن ەكەنىن ەسكەرتەدى.
ال «ۆيرۋسپەن ويناما!» سۋرەتى بالالاردى اۋلاعا شىعارىپ, اتكەنشەكپەن ويناتۋعا بولمايتىنىن قاپەرىمىزگە سالادى.
ءبىر سوزبەن ايتقاندا سۋرەتشىلەر دە ادامزاتتى قىلقالامدارىنىڭ ۇشىنداعى نازىك قيالدارىمەن قورعاۋ ات سالىسۋدا.
ال, ءسىز قانداي ارەكەت ەتۋدەسىز؟
