قارۋلى كۇشتەردىڭ ۇشقىشسىز ۇشۋ اپپاراتتارىنىڭ ەسەپتەرى اۋە بارلاۋىن جۇرگىزۋ, توتەنشە جاعداي رەجىمىنىڭ بۇزىلۋىن انىقتاۋ جانە وعان جول بەرمەۋ ماقساتىندا تارتىلادى. ولار ازاماتتىق حالىقتىڭ بلوك-بەكەتتەردى رۇقساتسىز كەسىپ ءوتۋىنىڭ جانە اۆتوكولىكتەردىڭ كارانتيندىك ايماققا جانە ودان تىس جەرلەرگە ءوتۋىن بولدىرماۋ ءۇشىن قاجەت.
ايتا كەتەرلىك, 19 ناۋرىزدان باستاپ توتەنشە جاعداي جانە كارانتين رەجىمىن قامتاماسىز ەتۋ جونىندەگى ءىس-شارالار شەڭبەرىندە نۇر-سۇلتان جانە الماتى قالالارىنا كىرەتىن جانە شىعاتىن جولداردا بلوك-بەكەتتەر ورناتىلىپ, قارۋلى كۇشتەردىڭ اسكەري قىزمەتشىلەرى, پوليتسيا جانە ۇلتتىق ۇلان وكىلدەرىمەن بىرلەسىپ تاۋلىك بويى كەزەكشىلىك اتقارادى.
ءىىم بولىمشەلەرى بلوك-بەكەتتەردەن ءوتىپ جاتقان تەحنيكانى تەكسەرىپ سودان كەيىن وتكىزۋدە. ازاماتتاردىڭ ءومىرى مەن دەنساۋلىعىنا قاۋىپ توندىرەتىن جاعداي تۋىنداعان كەزدە كۇشەيتۋ جۇمىستارىنا اسكەري قىزمەتشىلەر, ونىڭ ىشىندە اسكەري پوليتسيانىڭ تاجىريبەلى قىزمەتكەرلەرى تارتىلعان.
سونىمەن قاتار, كىرۋگە جانە شىعۋعا تىيىم سالىنعانىنا قاراماستان, بلوك-بەكەتتەردى زاڭسىز كەسىپ وتۋگە ارەكەتتەر ورىن الۋدا. تىيىم سالىنعان اۋماقتى كەسىپ ءوتۋدىڭ تاسىلدەرى ءارتۇرلى, ونىڭ ىشىندە بلوك-بەكەتتەردى اينالىپ ءوتۋ دە بار. ۇشقىشسىز ۇشۋ اپپاراتى اسكەريلەر مەن پوليتسيا قىزمەتكەردەرىنە بارلىق باعىتتار بويىنشا كورۋ مۇمكىندىگىن كەڭەيتۋگە, ورىن الاتىن بۇزۋشىلىقتاردى بولدىرماۋ ءۇشىن بلوك-بەكەتتەردى باقىلاۋعا مۇمكىندىك بەرەدى.
ەسكە سالا كەتسەك, ماڭىزدى وقۋ-جاۋىنگەرلىك ماسەلەنى شەشۋدە ۇشقىشسىز ۇشۋ اپپاراتتارى قازاقستاننىڭ قارۋلى كۇشتەرىندە بەلسەندى تۇردە قولدانىلادى. ۇشقىشسىز ۇشۋ اپپاراتتارى وقۋ-جاتتىعۋ كەزىندە عانا ەمەس, ولاردىڭ كومەگىمەن ارىستاعى اۋماقتى بارلاۋدى, ينجەنەرلىك بولىمشەلەردىڭ جۇمىسىن قاداعالاۋدى جانە جارىلعىش زاتتار تابىلعان جاعدايدا جەدەل شتابقا بايانداۋ كەزىندە ءوزىنىڭ تيىمدىلىگىن كورسەتكەن بولاتىن.
