قازىرگى تاڭدا الماتى قالاسىنداعى كارانتين ورتالىعى مەن ۆولونتەرلەر شتابىندا اتالعان ۋنيۆەرسيتەتتىڭ 50-دەن اسا جوعارى كۋرس ستۋدەنتتەرى ەڭبەك ەتەدى. كارانتين ورتالىعىنا ءار كۇنى 10 ادام تۇسەدى. مۇنداي ورتالىقتارعا شەتەلدەردەن ۇشىپ كەلگەن بارلىق جولاۋشىلار جەتكىزىلەدى. ءبارى قاۋىپتى ىندەتكە تەست تاپسىرادى. 7 كۋرس ستۋدەنتتەرىنىڭ بيىلعى پراكتيكاسى ۇلكەن تاۋەكەل مەن قاۋىپ-قاتەرگە تولى بولىپ تۇر. ينتەرناتۋراداعى ستۋدەنت-دارىگەر نۇريددين تىلەۋبەك ۋنيۆەرسيتەتىنىڭ جاڭا جاتاقحاناسىندا ورنالاسقان كارانتين ورتالىعىندا جۇمىس ىستەيدى.
– ەرىكتى دارىگەر-ستۋدەنتتەر كۇن سايىن مۇقتاج ازاماتتارعا, جالعىزىلىكتى انالارعا, قارت ادامدار مەن مۇگەدەكتەرگە مەديتسينالىق كەرەك-جاراقتاردى, قاجەتتى زاتتاردى, تاماق سەبەتتەرىن جەتكىزۋمەن اينالىسادى. سونداي-اق ولار كارانتيندىك ايماقتاردىڭ جۇمىسىنا بەلسەندى قاتىسادى, حالىقارالىق رەيستەردەن كەلگەن ادامداردىڭ تىزىمدەرىن جاسايدى, بلوك بەكەتتەرىندە جۇمىس ىستەيدى, تەمپەراتۋرانى ولشەيدى, – دەيدى ن.تىلەۋبەك.
ەلىمىزدىڭ جەتەكشى مەديتسينالىق ۋنيۆەرسيتەتى كوروناۆيرۋسقا قارسى كۇرەستە بارلىق باعىتتا كومەك كورسەتۋدى قولعا العان. ناۋقاستارمەن جۇمىس ىستەيتىن جاس مامانداردان باسقا, ۋنيۆەرسيتەت وزگە قالالاردان كەلگەن دارىگەرلەرگە ۋاقىتشا تۇرۋ ءۇشىن ەكى جاتاقحانا ءبولدى. ۋنيۆەرسيتەت Covid-19-عا قارسى كۇرەستە ەل باسىنداعى اۋىر جۇكتى جۇمىلا كوتەرۋدى جالعاستىرۋعا نيەتتى.
ستۋدەنت-دارىگەرلەر مەن ۆولونتەرلەر ءوز كەزەگىندە كارانتين ورتالىقتارى, ايماقتارىندا عانا ەمەس, قالاداعى اۋرۋحانالارداعى جۇمىستارعا دا جۇمىلعان. ۋنيۆەرسيتەت رەكتورى تالعات نۇرعوجين ستۋدەنتتەردىڭ مۇنداي قادامعا ءوز ەركىمەن بارعانىن ايتتى.
– رەزيدەنتۋرا مەن ينتەرناتۋرادا وقىپ جۇرگەن ستۋدەنتتەرىمىز دارىگەرلەرگە كومەكتەسۋدى وزدەرى شەشتى. بۇل – ولاردىڭ ۇلكەن تاۋەكەلى. شاكىرتتەرىمىزدىڭ شەشىمى قازۇمۋ-دىڭ مەديتسينا سالاسىندا بىلىكتى مامانداردى تاربيەلەيتىنىن تاعى ءبىر رەت دالەلدەدى. ادامداردى ەمدەۋ – جاس ماماندار ءۇشىن تەك جۇمىس قانا ەمەس, كاسىبي مىندەت پەن ازاماتتىق بورىش, – دەدى رەكتور.
شەتەلدەردە, سونداي-اق ەلىمىزدە دە مەديتسينا قىزمەتكەرلەرىنىڭ وزدەرى قاۋىپتى ينفەكتسيانى جۇتىرىپ, ءتىپتى الەمدىك تاجىريبەدە كەيبىرىنىڭ ۆيرۋستان ءولىپ جاتقانىن كورە تۇرا وسىنداي تاۋەكەلگە بارعان ستۋدەنتتەردىڭ ىسىنە ساتتىلىك تىلەيمىز!
