دەگەنمەن, ءبىر جايتقا نازار اۋدارعان ءجون. الماتىدا كوروناۆيرۋس جۇقتىرعان تۇرعىنداردىڭ 97 پايىزى سىرتتان جۇقتىرىپ كەلگەن. بۇل تۋرالى كەزەكتى ونلاين-بريفينگتە قالالىق تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى ايزات مولداقاسىموۆا حاباردار ەتتى.
الماتى قالاسىنىڭ باس سانيتار دارىگەرىنىڭ ايتۋىنشا, كوروناۆيرۋسقا شالدىققانداردىڭ 3 پايىزى عانا قازاقستاندا جۇقتىرعان. «وسى ۋاقىت ارالىعىندا 13 ناۋرىزدان باستاپ ىندەتتىڭ ءورشۋى 3 رەت بايقالدى.
5-ءشى كۇنى – تاۋلىگىنە 9 ادام, 15-ءشى كۇنى – 16 ادام, 18-ءشى كۇنى 10 ادام تىركەلگەن. تالداۋ ناتيجەلەرىنە سايكەس 73 ادامنىڭ 97 پايىزى سىرتتان جۇقتىرىپ كەلگەنى انىقتالدى. باسقا ەلدەن كەلگەن 26 ادام كەلەسى كۇنى-اق 45 ادامعا جۇقتىرعان. الماتىدا جۇقتىرعان 2 ناۋقاستىڭ عانا بايلانىستا بولعان ادامدارى ساناۋلى», دەيدى باس سانيتار.
قالالىق باس سانيتار ينفەكتسيا كوبىنە قاي ەلدەردەن كەلگەنىن بىلايشا جىكتەدى: «اۋىرعانداردىڭ 40%-ى – ماسكەۋدەن, 23%-ى – بەرلين – الماتى رەيسىمەن, 20%-ى – سانكت-پەتەربۋرگ – الماتى رەيسىمەن, 17%-ى مينسك – الماتى رەيسىمەن كەلگەندەر».
ايزات مولداقاسىموۆانىڭ ايتۋىنشا اۋىرعاندار جاس ەرەكشەلىگىنە قاراي توپتاستىرىلعان. ولاردىڭ كوپشىلىگى – 30-39 جاس, ودان كەيىنگىلەرى – 20-29 جاس ارالىعىندا, ءۇشىنشى توپقا 50-59 جاستاعى ادامدار كىرەدى. الماتىدا كوروناۆيرۋس جۇقتىرعانداردىڭ 62,5%-ى – ايەلدەر, 37,5%-ى – ەرلەر.
– بۇگىنگە دەيىن الماتىدا كوروناۆيرۋس ينفەكتسياسىن جۇقتىرۋدىڭ 73 جاعدايى تىركەلدى, سونىڭ جەتەۋى ساۋىعىپ, ۇيىنە شىقتى, – دەدى ونلاين-بريفينگتە قالالىق قوعامدىق دەنساۋلىق ساقتاۋ باسقارماسىنىڭ باسشىسى تىلەۋحان ابىلداەۆ.
دۇيسەنبى كۇنگى مالىمەت بويىنشا قالالىق جۇقپالى اۋرۋلار ستاتسيونارلارىندا COVID-19-دان ەمدەلىپ جاتقان 66 پاتسيەنت بار. جاڭادان انىقتالعان 6 ادامنىڭ تورتەۋى بايلانىستا بولعاندار, ءبىر پاتسيەنت 19 ناۋرىزدا مينسك-الماتى رەيسىمەن جانە بىرەۋى وسى كۇنى ىستانبۇل-الماتى رەيسىمەن ۇشىپ كەلدى. ەمدەۋگە جاتقىزىلعانداردىڭ ىشىندە 11 جاستاعى بالا بار, قازىر ول قالالىق بالالار جۇقپالى اۋرۋلار اۋرۋحاناسىندا اكەسىمەن بىرگە. 58 ناۋقاستىڭ جاعدايى قاناعاتتانارلىق, ەرەسەك ناۋقاستىڭ جاعدايى اۋىر, 6 ەرەسەك ادام مەن 1 بالانىڭ دەنساۋلىعى ورتاشا اۋىر. پروۆيزورلىق ورتالىقتاردا 1046 ادام بار, ونىڭ ىشىندە 102-ءسى بالا. الماتىداعى پروۆيزورلىق ورتالىقتار سانى التىعا دەيىن كوبەيگەنىن اتاپ ءوتۋ قاجەت. بۇعان دەيىن 4 ورتالىق بولدى. كارانتيندىك وقشاۋلاۋ ءۇشىن 3 شيپاجاي جانە ءبىر جاتاقحانا ءبولىندى.
قازىر 419 ازامات كارانتيندىك وقشاۋلاۋدا جاتىر. بۇل شەتەلدەن كەلگەن ادامدار. ولاردىڭ بارلىعى قاي ەلدەن كەلگەنىنە قاراماستان, ەكى كۇندىك كارانتينگە ورنالاستىرىلۋدا. رەيستەن تۇسكەننەن كەيىن ولاردان بىردەن COVID-19-عا تالداۋلار الىنۋدا. ناتيجە تەرىس بولعان جاعدايدا ولار ۇيلەرىنە جىبەرىلەدى.
الماتى
