ل.مەسسيدىڭ ايتۋىنشا, جالاقى مولشەرى 70 پايىزعا ازايعان. بۇعان قوسا, ويىنشىلار كلۋبتىڭ باسقا قىزمەتكەرلەرى ەڭبەك اقىسىن تولىق مولشەردە الۋى ءۇشىن قوسىمشا قارجى بولمەك.
«داعدارىس جاعدايىنا بايلانىستى جالاقىنىڭ 70 پايىزعا ازايعانىنان بولەك, فۋتبولشىلار كلۋب قىزمەتكەرلەرى ەڭبەك اقىسىن 100 پايىز الۋى ءۇشىن قارجى جينايتىنىن ايتاتىن ۋاقىت كەلدى.
بۇعان دەيىن بۇل تۋرالى حابارلاۋىمىزدىڭ سەبەبى – كلۋبقا كومەكتەسىپ, ناقتى شەشىم ىزدەپ, وسى احۋالدان زارداپ شەككەندەرگە كومەك قولىن سوزۋ» دەلىنگەن بلاۋگرانا كاپيتانىنىڭ پاراقشاسىندا.
مەسسيدىڭ مالىمدەمەسىن ىلە-شالا كوماندا شابۋىلشىلارى لۋيس سۋارەس پەن انتۋان گريزمانن دا ءوز پاراقشالارىندا ءبولىستى.
بۇعان دەيىن يسپانيالىق بىرقاتار بۇقارالىق اقپارات قۇرالى «بارسەلونا» كلۋبىنىڭ ويىنشىلارى جالاقىسىن ازايتۋعا كەلىسپەگەنى تۋرالى حابارلاعان ەدى. الايدا ل.مەسسيدىڭ مالىمدەمەسى ونداعى جاڭالىقتاردىڭ جالعان ەكەنىن كورسەتىپ وتىر.
ايتا كەتۋ كەرەك, يسپانيادا كوروناۆيرۋس ىندەتىنىڭ تاراۋىنا بايلانىستى لا ليگا بەلگىسىز مەرزىمگە كەيىنگە شەگەرىلدى. وسى ەلدە قازىرگە دەيىن 85 مىڭنان استام ادام ناۋقاسقا شالدىعىپ, 7340 ادام قازا تاپتى.
