ەندى وقۋشىلار ونلاين وقىتۋ جۇيەسى ارقىلى ءبىلىم الماق. وسى تۇستا «وقۋشىلار دەمالىس ۋاقىتتارىن قالاي وتكىزۋدە؟» دەگەن سۇراق تۋىندايدى. ەكى مەگوپوليستەگى ويىن-ساۋىق ورتالىقتارى ۋاقىتشا جابىق. اۋلادا دا بالالار ەمىن-ەركىن ويناي المايدى. بۇعان دەيىن ولار قوسىمشا ساباقتارعا, سپورتتىق سەكتسيالارعا, ونەر ۇيىرمەلەرىنە باراتىن. قازىرگى احۋال قيىنداۋ.
مىنە, توتەنشە جاعداي كەزىندە ۋاقىتىن بوسقا وتكىزبەي, ءار كۇنىن ءتيىمدى پايدالانىپ جۇرگەن مەيىرلان جارىلقاسىن تۋرالى ءسوز قوزعاساق. ول الماتى وبلىسى, ۇيعىر اۋدانى, باحار اۋىلى ا.روزىباكيەۆ اتىنداعى ورتا مەكتەپتىڭ 4-سىنىبىندا وقيدى. ءوزى سپورتشى, رەسپۋبليكا كولەمىندە وتەتىن تاەكۆاندو جارىستارىنان قۇر قول قايتقان ەمەس. وقۋ وزاتى اتانعان مەيىرلان بۇگىندە مۋلتفيلم كەيىپكەرلەرىنىڭ بەينەسىن ەرمەكسازبەن قالاپ, ءتۇرلى وبرازدارعا اينالدىرۋدا. ءار وبرازى ەرەكشە. ماسەلەن, بالا قيالىنان تۋعان «ورمەكشى ادام», «ەرجۇرەك دجون», ء«تورت اياقتى قۇبىجىق», «الپاۋىت ءداۋ» سەكىلدى تۋىندىلارى كوپشىلىكتى بەيجاي قالدىرمايدى. ەرمەكسازعا دەگەن قىزىعۋشىلىعى جەتى جاسىنان ويانعان مەيىرلاننىڭ اتا-اناسى ونىڭ بۇل ونەرىن شىڭداپ, الداعى ۋاقىتتا تۋىندىلارىن اۋدان, وبلىس كولەمىندەگى كورمەلەرگە جولداماق.
ەندەشە, م.جارىلقاسىن الەمگە تانىمال م. انتوكولسكيم, البەرتو دجاكومەتتي, فەرناندو بوتەرو جانە وتانداسىمىز گيپەررەاليست-ءمۇسىنشى ايدوس ەسماعامبەتوۆ سياقتى مۇسىنشىلەردىڭ داڭعىل جولىن جالعاستىرماسىنا كىم كەپىل؟! بولاشاقتا مەيىرلاننىڭ قولىنان تەك مۋلتفيلم كەيىپكەرلەرى عانا ەمەس, قازاق حالقىنىڭ ەرتەگىلەرىندەگى ەرجۇرەك باتىرلاردىڭ دا وبرازدارى كوركەم تۋىندىعا اينالاتىنىنا سەنىمدىمىز.
ايىم بولاتقىزى
