قوعام • 28 ناۋرىز، 2020

اۋىلداعى جۇرت ءالى سەنبەيدى

1584 رەتكورسەتىلدى

قۇدىقتىڭ سىرتىنداعىنىڭ ءبارى اقىلدى. اۋىلداعى جۇرت ءالى دە اتى جامان ىندەتتىڭ بايىبىنا بارار ەمەس. مەملەكەت مىندەتتەگەن تاپسىرما قالا سىرتىندا قالىس قالىپ جاتىر. مالىن ورىسكە ايداپ شىققان اعايىننىڭ ەكىدەن ءبىرى ساياسي وقيعاعا بالايدى. ەل ىشىندەگى دۇربەلەڭدى بيلىكتىڭ ءبىر قويىلىمى دەپ ەسەپتەيتىنىن قايتەسىز.

اينالعان جاۋ الماي قويمايدى دەۋشى ەدى ۇلكەندەر. اۋەلى كورشىمىزدى ارتىنان الەمدى الەككە سالعان اۋرۋدىڭ از ۋاقىتتا اياعىمىزعا تۇساۋ بولارىن كىم ءبىلىپتى؟! اينالىپ ءوتىپ كەتەر دەپ اۋزىمىزدى اشىپ وتىرا بەردىك. ارتى نەگە اپارىپ سوعارىن اڭداساقشى سوندا. ەندى، مىنە، سوڭىمىزدان قۋعان ۇرەيدەن ەنتىگىمىزدى باسا الماي قاشىپ كەلەمىز. قورشاۋدا قالعان شاھار تۇرعىندارىنىڭ بويىن بيلەگەن قورقىنىش بوساعادان ارى اتتاپ باستىرماي وتىر. باسى قاتقان جۇرتتىڭ باسىنا تۇسكەن كەسەلدىڭ وزىنەن بۇرىن اتى جان تىتىركەندىرەدى. بالا ويىننان قاعىلدى. جىگىت-جەلەڭ ساۋىقتان قول ءۇزدى. بويانىپ شىعار بويجەتكەن جوق. قاتارى سيرەگەن قارتتاردىڭ دا ءبىر ۋاقىت سەرۋەنى پىشاق كەسكەندەي تىيىلدى. ءىشى پىسقان قۇدالى تۋىسقاندار الەۋمەتتىك جەلىنىڭ اۋەنىنە توڭكەرىلگەن. ءشارىنىڭ شىرايى كەتتى.

تەك تابيعات قانا مامىراجاي. جاڭا ءبىر تىنىسى اشىلعانداي. سايرانداعان قۇس، ويناقتاعان جانۋار. ءبارى-ءبارى سولار ءۇشىن جاسالىپ جاتقانداي. قالا بەردى قالا ورتاسىن كەزگەن اڭداردى كورگەندە، ەۋروپانى ەندىگى ەتەر امالىن اڭديسىڭ. ازيانىڭ دا جاندى جەرىنە سەلەبە سىلتەگەن سىرقات سىر الدىرماي كەلەدى. بۇل ۆيرۋس - قويدى بورلىكتىرگەن قاسقىرداي قاتۋلى.

ال اۋىل ءباز-باياعى قالپىندا. جەر سىلكىنسە دە سەلت ەتپەيتىن سەنىمى كۇشتى حالىقتى وڭايلىقپەن سەسكەندىرە المايسىڭ-اۋ! زاڭ - ورتاق. تالاپ - بىردەي. دەسە دە 30-40 ادامعا ارنالعان شاعىن توي-تومالاعى تىيىلماي تۇر. "ول پالەكەتىڭ اۋىل-ايماققا كەلە قويماس" دەپ ىشىنەن تون پىشەدى. داستارقانى جينالمايتىن جۇرتىمىزدىڭ ادەتىنە جوريمىز-اۋ مۇنىسىن. ايتسە دە وسى ساتتە ءبىر جەڭنەن قول، ءبىر جاعادان باس شىعارىپ، ۇكىمەتتىڭ قاۋلىسىنا قۇلاق اسقانىمىز الدەقايدا ابزال. ازان-قازان باسىلعان سوڭ قۇدايى تاماقتىڭ دا كەزەگى كەلەر. باتپانداپ كىرگەن اۋرۋ، مىسقىلداپ شىعاتىنىن ەسكەرسەك، بىزدىكى نە تالتاڭ؟ وسى ءبىر قىسىلتاياڭ شاقتا قىدىرماي، قىزىق قۋماي، شاڭىراعىڭنىڭ ءتۇتىنىن تۇتەتىپ وتىرعانعا نە جەتسىن!؟

 

 

 

سوڭعى جاڭالىقتار

ۇقساس جاڭالىقتار