سەزد قارساڭىندا ستراتەگيالىق سەسسيا ۇيىمداستىرىلىپ, دەلەگاتتار پارتيانىڭ الداعى كەزەڭدەگى باسىم باعىتتارىن تالقىلادى.
II سەزد قاتىسۋشىلارىنىڭ الدىندا ءسوز سويلەگەن پارتيا توراعاسى ايبەك دادەباي ەلىمىزدىڭ جاڭا دامۋ كەزەڭىنە اياق باسقانىن اتاپ ءوتىپ, ساياسي كۇشتەردەن رەفورمالاردى قولداۋ عانا ەمەس, حالىقپەن تىعىز جۇمىس جۇرگىزۋ جانە ازاماتتاردىڭ سۇرانىستارىنا ناقتى جاۋاپ بەرۋدى تالاپ ەتەتىنىن ايتتى.
ء«بىز پرەزيدەنت قاسىم-جومارت توقاەۆتىڭ ادىلەتتى قازاقستان قۇرۋ باعىتىن تولىق قولدايمىز جانە ونى مەملەكەتتى ۇزاقمەرزىمدى نىعايتۋدىڭ ستراتەگيالىق باعدارى دەپ سانايمىز. الايدا رەفورمالاردىڭ تابىسى مەملەكەتتىك شەشىمدەرگە عانا بايلانىستى ەمەس. ول قوعامنىڭ وزگەرىستەرگە قاتىسۋعا دايىندىعىمەن جانە ساياسي كۇشتەردىڭ جاۋاپكەرشىلىكپەن ءارى جاسامپازدىقپەن ارەكەت ەتە بىلۋىمەن ايقىندالادى. «ادىلەت» پارتياسى قۇرىلعان كەزدە ءبىز ءبىر قاراپايىم ءارى قاعيداتتى ۇستانىمدى نەگىزگە الدىق: ادىلەتسىز تۇراقتى دامۋ بولمايدى. ءادىل ەرەجەلەر ورناعان جەردە سەنىم قالىپتاسادى. سەنىم بار جەردە ينۆەستيتسيا كەلەدى, كاسىپكەرلىك داميدى, ازاماتتىق بەلسەندىلىك ارتىپ, قوعامدىق بىرلىك نىعايادى», دەدى ا.دادەباي.
سەزدەگى ماڭىزدى شەشىمنىڭ ءبىرى – ەلدىڭ بارلىق وڭىرىندە پارتيا فيليالدارىن قۇرۋ. دەلەگاتتار ءتيىستى شەشىمدى قولداپ, فيليالداردىڭ قىزمەت ءتارتىبىن ايقىندايتىن ەرەجەنى بەكىتتى.
پارتيا ساياسي كەڭەسىنىڭ مۇشەسى ءبورىحان نۇرمۇحامەدوۆتىڭ ايتۋىنشا, پارتيانىڭ بولاشاقتاعى دامۋى وڭىرلەردەگى ءتيىمدى جۇمىس جانە ازاماتتارمەن تۇراقتى ديالوگكە تىكەلەي بايلانىستى.
«پارتيانىڭ تاعدىرى وڭىرلەردە شەشىلەدى. ءبىزدىڭ جۇمىسىمىزدىڭ نەگىزگى الاڭى دا سول جەردە. ازاماتتاردىڭ سەنىمى دە وڭىرلەردە قالىپتاسادى. ادامدار پارتيانى كۇن سايىن ناقتى ىستەرىنە, باستامالارىنا جانە ناتيجەلەرىنە قاراپ باعالايدى. سوندىقتان وبلىستىق فيليالدار قوعامدىق جانە ساياسي ءومىردىڭ تولىققاندى ورتالىعىنا اينالۋعا ءتيىس», دەدى ب.نۇرمۇحامەدوۆ.
پارتيا وكىلدەرىنىڭ ايتۋىنشا, وڭىرلىك جەلىنى دامىتۋ قوعامدىق جۇمىسقا جاڭا كوشباسشىلاردى تارتۋعا جانە ازاماتتاردىڭ قوعامدىق-ساياسي ۇدەرىستەرگە قاتىسۋ مۇمكىندىگىن كەڭەيتۋگە جول اشادى.
«پارتيالىق جەلىنىڭ دامۋى ازاماتتارعا مەملەكەتتىك شەشىمدەردى قابىلداۋعا ىقپال ەتىپ, ازاماتتىق قوعامدى نىعايتۋعا مۇمكىندىك بەرەدى», دەدى قوستاناي اۆتوموبيل كولىگى كوللەدجىنىڭ ديرەكتورى ءارى پارتيا ساياسي كەڭەسىنىڭ مۇشەسى دميتري پاۆلەنكو.
سەزد بارىسىندا ادام كاپيتالىن دامىتۋ, ءبىلىم سالاسى, زاماناۋي تەحنولوگيالاردى دامىتۋ مەن ازاماتتىق قوعام ينستيتۋتتارىن نىعايتۋ ماسەلەلەرى دە تالقىلاندى.
سەزد جۇمىسىن قورىتىندىلاي كەلە, قاتىسۋشىلار پارتيا قۇرامىن كەڭەيتۋ مەن ساياسي قىزمەتتىڭ تيىمدىلىگىن ارتتىرۋ ارقىلى پارتيانىڭ الەۋەتىن ودان ءارى كۇشەيتۋ ماسەلەسىن قاراستىردى.
«Amanat» پارتياسىنىڭ «ادىلەت» پارتياسىنا قوسىلۋ ماسەلەسى بويىنشا سويلەگەن ا.دادەباي قازىرگى زاماننىڭ سىن-قاتەرلەرى قوعام الدىندا تۇرعان ناقتى مىندەتتەردى شەشۋگە باعىتتالعان سىندارلى ديالوگ پەن ناتيجەلى پراكتيكالىق جۇمىستى تالاپ ەتەتىنىن اتاپ ءوتتى.
«Amanat» پارتياسىنىڭ «ادىلەت» پارتياسىنا قوسىلۋى – تار پارتيالىق مۇددەدەن جوعارى تۇرعان, ۇلتتىق جاۋاپكەرشىلىككە نەگىزدەلگەن پاراساتتى شەشىم. بۇل – قوعامنىڭ ەل مۇددەسى ءۇشىن بىرىگە الاتىنىنىڭ ناقتى دالەلى. قوعام مەن مەملەكەت الدىنداعى جانە كەلەر ۇرپاق الدىنداعى جاۋاپكەرشىلىكتەن تۋىنداعان, ەلدىك بەرەكەگە باستايتىن بايلام», دەدى پارتيا توراعاسى.
تالقىلاۋ قورىتىندىسىندا دەلەگاتتار «Amanat» پارتياسىنىڭ «ادىلەت» پارتياسىنا قوسىلۋى تۋرالى شەشىمدى قولدادى. ءتيىستى شەشىم II سەزدىڭ قاۋلىسىنا ەنگىزىلدى.
