كەزدەسۋ بارىسىندا قازاقستان مەن دۇنيەجۇزىلىك بانك توبى اراسىنداعى تسيفرلاندىرۋ, جاساندى ينتەللەكت, GovTech جانە تەلەكوممۋنيكاتسيالىق ينفراقۇرىلىمدى دامىتۋ سالالارىنداعى ارىپتەستىكتى ودان ءارى نىعايتۋ ماسەلەسى قارالدى. جيىندا ەلىمىزدەگى «دەرەكتەردى وڭدەۋ ورتالىقتارى القابى» جوباسىن جۇزەگە اسىرۋ ماسەلەسىنە نازار اۋدارىلدى. تالقىلاۋعا پرەزيدەنت كەڭەسشىسى – ستراتەگيالىق جوسپارلاۋ جانە رەفورمالار اگەنتتىگىنىڭ توراعاسى اسەت ەرعاليەۆ, جاساندى ينتەللەكت جانە تسيفرلىق دامۋ, ۇلتتىق ەكونوميكا, قارجى ۆيتسە-مينيسترلەرى قاتىستى.
«جالپىۇلتتىق رەفەرەندۋمدا قابىلدانعان جاڭا كونستيتۋتسيا تەحنولوگيالىق يننوۆاتسيالار مەن جەدەلدەتىلگەن تسيفرلىق ترانسفورماتسيا ارقىلى ەكونوميكانى نىعايتۋعا مۇمكىندىك اشتى. پرەزيدەنت قاسىم-جومارت توقاەۆ ەلىمىزدى تولىققاندى تسيفرلىق ەلگە اينالدىرۋ جونىندەگى ستراتەگيالىق ماقساتتى ايقىندادى. بۇل جىل تسيفرلاندىرۋ جىلى دەپ جاريالانىپ, ەكونوميكانىڭ بارلىق سالاسىنا جي شەشىمدەرىن اۋقىمدى ەنگىزۋگە باسىمدىق بەرىلىپ وتىر. 2029 جىلعا دەيىنگى «Digital Qazaqstan» جالپىۇلتتىق ستراتەگياسى قابىلداندى. قازاقستاننىڭ تسيفرلىق ترانسفورماتسيا باعدارلاماسىن ىلگەرىلەتۋگە دۇنيەجۇزىلىك بانكتىڭ قوسقان ەلەۋلى ۇلەسىن ەرەكشە اتاپ وتكىم كەلەدى. ءبىز جوسپارلاعان بارلىق باستامانىڭ ۋاقتىلى جۇزەگە اسىرىلۋىنا ۇلكەن ءمان بەرەمىز», دەدى ۇكىمەت باسشىسى.
ەلىمىز دۇنيەجۇزىلىك بانكتىڭ GovTech جەتىلۋ يندەكسىنىڭ (GTMI) «ا» توبىنا كىرەدى ءارى الەمدە 6-ورىندا تۇر. بۇگىندە دۇنيەجۇزىلىك بانكپەن بىرلەسىپ ينكليۋزيۆتى ەكونوميكاعا جەدەلدەتىلگەن تسيفرلاندىرۋ, جي سالاسىندا ادام كاپيتالىن دامىتۋعا قاتىستى بىرقاتار بىرلەسكەن جوبالاردى جۇزەگە اسىرىپ جاتىر.
دۇنيەجۇزىلىك بانكتىڭ تسيفرلىق تەحنولوگيالار جانە جاساندى ينتەللەكت جونىندەگى ۆيتسە-پرەزيدەنتى سانگبۋ كيم ەلىمىزدە تسيفرلاندىرۋ دەڭگەيى جوعارى ەكەنىن اتاپ ءوتتى. ماڭىزدى جوبالاردىڭ قاتارىندا دەرەكتەردى وڭدەۋ ورتالىقتارىن دامىتۋ, كاسپي ارقىلى سۋاستى تالشىقتى-وپتيكالىق كابەلىن سالۋ, اۋىلدىق جەرلەردە بايلانىستى قامتاماسىز ەتۋ ءارى تسيفرلىق مەملەكەتتىك سەرۆيستەر, جاساندى ينتەللەكت جانە تەحنوپاركتەر سالاسىنداعى باستامالار بار. دۇنيەجۇزىلىك بانك وسى باستامالارعا قولداۋ كورسەتۋگە دايىن.
«قازاقستانداعى تسيفرلاندىرۋدىڭ قازىرگى مارتەبەسى – كوپتەگەن باسقا دامۋشى ەلدەرمەن سالىستىرعاندا وتە وزىق. سىزدەردە جاقسى دامىعان ءموبيلدى بايلانىس, ساپالى قىزمەت كورسەتەتىن ەلەكتروندىق ۇكىمەت پلاتفورماسى, جەكە سەكتورعا ارنالعان دامىعان ەكوجۇيە, ءتيىمدى ۇلتتىق ستراتەگيا جانە ساياسات بار. جاقىندا جي سالاسىندا جاڭا زاڭ قابىلدادىڭىزدار. وسىنىڭ ءبارى وتە كەرەمەت ۇيىمداستىرىلعان. مەن سىزدەرمەن جۇمىس ىستەي باستاعانىما وتە قۋانىشتىمىن. جاساندى ينتەللەكت سالاسىندا جاڭا سىن-قاتەرلەر بار, سوندىقتان دا بۇل مىندەتتى جۇزەگە اسىرۋ ءبارىمىز ءۇشىن وڭاي سوقپاسى انىق», دەپ اتاپ ءوتتى سانگبۋ كيم.
كەزدەسۋ قورىتىندىسىندا مارتەبەلى مەيمان ەلىمىزدى دۇنيەجۇزىلىك بانكتىڭ تسيفرلاندىرۋ جانە جاساندى ينتەللەكت جونىندەگى جاھاندىق ستراتەگياسىنىڭ نەگىزگى سەرىكتەس ءارى قاتىسۋشى ەل بولۋعا شاقىردى. باعدارلاما تسيفرلىق ەكونوميكاعا ينۆەستيتسيا تارتۋعا باعىتتالعان. تيپتىك كەلىسىم باعىتتارى تسيفرلىق بايلانىس پەن ينفراقۇرىلىمدى دامىتۋ, تسيفرلىق مەملەكەتتىك پلاتفورمالار مەن سايكەستەندىرۋ جۇيەلەرىن جەتىلدىرۋ, دەرەكتەردى رەتتەۋ, كيبەرقاۋىپسىزدىكتى قامتاماسىز ەتۋ, سونداي-اق تسيفرلىق داعدىلاردى دامىتۋ, جاساندى ينتەللەكت ەكوجۇيەسىن ىلگەرىلەتۋدى قامتيدى. ەلدەرگە ارنالعان تسيفرلىق كەلىسىمدەر ءار مەملەكەتتىڭ ۇلتتىق باسىمدىقتارىنا سايكەس بەيىمدەلەدى.
پرەمەر-مينيستر ولجاس بەكتەنوۆ ۆيتسە-پرەزيدەنت سانگبۋ كيمگە جانە دۇنيەجۇزىلىك بانك كومانداسىنا قازاقستاننىڭ تسيفرلىق ترانسفورماتسيا سالاسىنداعى باستامالارىن قولداعانى ءۇشىن العىس ايتىپ, ۇكىمەتتىڭ World Bank Digital Compact-كە قاتىسۋعا دايىندىعىن اتاپ ءوتتى.
