وسىعان بايلانىستى قالا اكىمدىگى جانىنداعى توتەنشە جاعداي رەجيمىن قامتاماسىز ەتۋ جونىندەگى قالالىق جەدەل شتاب قوسىمشا شەكتەۋ شارالارىن بەكىتتى. بۇل شەكتەۋ 28 ناۋرىزدان ساعات 00.00-دەن باستاپ 2020 جىلدىڭ 5 ءساۋىرى ساعات 23.59-عا دەيىن ەنگىزىلمەك.
«كوروناۆيرۋستىڭ تارالۋىنا قاتىستى جاعداي ءبىز ويلاعاننان دا اۋىر بولدى. قاۋىپتى باعالاماۋ –جاۋاپسىزدىق ءارى زاڭ بۇزعانمەن بىردەي. ءبىز ۆيرۋستى وقشاۋلاپ, ونىڭ تارالۋىن بولدىرماۋ ءۇشىن بارلىق قاجەتتى شارالاردى جۇزەگە اسىرۋدامىز. بىزگە تەك سىزدەردىڭ قولداۋلارىڭىز قاجەت», – دەدى قالا اكىمى باقىتجان ساعىنتاەۆ.
بەكىتىلگەن حاتتاماعا سايكەس, قالانىڭ تىنىس-تىرشىلىگىن قامتاماسىز ەتەتىن ۇيىمداردان بولەك, بارلىق ۇيىمدار مەن كاسىپورىنداردىڭ جۇمىسى 30 ناۋرىزدان باستاپ 5 ساۋىرگە دەيىن ۋاقىتشا توقتاتىلادى. بۇل ساناتقا قالالىق باسقارۋ ورگاندارى, ازىق-ت ۇلىك, مەديتسينالىق جانە ۆەتەرينارلىق نىساندار, قالانىڭ تىنىس-تىرشىلىگى مەن قاۋىپسىزدىگىن ۇزدىكسىز قامتاماسىز ەتەتىن قىزمەتتەر مەن باق كىرمەيدى. قاجەتتىلىك بولماسا قالادا ادامدار مەن جەكە كولىكتىڭ جۇرۋىنە تىيىم سالىنادى. ازىق-ت ۇلىك جانە ءدارى-دارمەكتەر الۋ ءۇشىن ءۇيدىڭ قاسىنداعى دۇكەن مەن دارىحاناعا بارۋعا بولادى. سونداي-اق ءۇي جانۋارلارىن سەرۋەندەتۋگە رۇقسات ەتىلگەن.
«65 جاستان اسقان تۇرعىنداردىڭ كوشەگە شىقپاۋىن سۇرايمىن. بۇل رەتتە مۇقتاجدارعا الەۋمەتتىك قىزمەتكەرلەر مەن ەرىكتىلەر قاجەتتى كومەك كورسەتەدى. قالادا كامەلەتكە تولماعانداردىڭ ەرەسەكتەرسىز جۇرۋىنە بولمايدى», – دەدى الماتى قالاسىنىڭ اكىمى باقىتجان ساعىنتاەۆ.
سونىمەن قاتار, قوعامدىق كولىكتىڭ جۇمىس كەستەسى ساعات 06.00-دەن كەشكى 19.00-گە دەيىن قىسقارتىلدى. بۇلاردا بارلىق سانيتارلىق-ەپيدەميولوگيالىق نورمالار ساقتالۋى ءتيىس. قوعامدىق كولىكتەگى جولاۋشىلار 40%-دان اسپاۋى ءتيىس. سونىمەن قاتار, قاۋىپسىزدىك جانە جۇرگىزۋشىلەردىڭ كوروناۆيرۋستى جۇقتىرۋ قاۋپىن ازايتۋ ماقساتىندا جۇرگىزۋشىلەرگە قوعامدىق كولىكتىڭ الدىڭعى ەسىكتەرىن اشۋعا تىيىم سالۋ تۋرالى شەشىم قابىلداندى.
سونداي-اق, قالانى دەزينفەكتسيا جۇرگىزىلگەننەن كەيىن اۋقىمدى جۇمىستار جۇزەگە اسىرىلاتىن بولادى. ءاربىر اۋدان بويىنشا اۋماقتى وڭدەۋدىڭ جالپى كەستەسىن اۋدان اكىمدىكتەرىنىڭ اپپاراتتارى جانە دەزينفەكتسيالىق وڭدەۋگە تارتىلعان باسقا دا ۇيىمدار جۇرگىزىپ, رەتتەيدى. دەزينفەكتسيا جۇرگىزىلگەننەن دەنساۋلىققا زيان تيمەس ءۇشىن 5 ساعاتتاي دالاعا شىقپاۋ كەرەك.
«قوعامدىق كولىك ءوز جۇمىسىن تاڭعى ساعات 06.00-دەن كەشكى 19.00-گە دەيىن جالعاستىرادى. ازىق-ت ۇلىك, ءدارى-دارمەك جانە ءبىرىنشى كەزەكتە قاجەتتى زاتتاردى جەتكىزۋ قىزمەتتەرى ساعات 9.00-دەن 22.00-گە دەيىن قولجەتىمدى بولادى. بارلىق ۇيىمدار, كاسىپورىندار مەن قالالىق قىزمەتتەردىڭ جۇمىسشىلارى سانيتارلىق قورعاۋ ءتارتىبىن كۇشەيتەدى», — دەدى ب. ساعىنتاەۆ.
توتەنشە جاعداي كەزىندە تۋىستارعا بارىپ, قوناق شاقىرۋعا تىيىم سالىنادى. جەرلەۋ راسىمىنە قاتىساتىندار 10 ادامنان اسپاۋ كەرەك. قالا كوشەلەرىندە قۇقىق قورعاۋ ورگاندارى مەن قر ۇلتتىق گۆاردياسىنىڭ وكىلدەرى تاۋلىك بويى باقىلايتىن بولادى. تارتىپكە باعىنباعانداردى اكىمشىلىك جانە قىلمىستىق جاۋاپكەرشىلىككە تارتۋ كوزدەلگەن.
«بۇل شارالاردىڭ بارلىعى قوعامنىڭ دەنساۋلىعىن قورعاپ, ءال-اۋقاتىن كوتەرۋ ءۇشىن جۇزەگە اسىرىلۋدا.
بۇل كۇندەرى ارقايسىمىز جەكە باستىڭ ءارى ۇجىمدىق جاۋاپكەرشىلىكتى تانىتا ءبىلۋىمىز ءتيىس. اركىم ءوزىنىڭ گيگيەناسىن ساقتاپ, ءوزىن-ءوزى وقشاۋلاۋ ارقىلى كوروناۆيرۋس ىندەتىنىڭ تارالۋىن بولدىرماۋعا سەپتىگىن تيگىزبەك. بىرلەسە ءبىز بۇل قيىندىقتى ەڭسەرەمىز», – دەدى باقىتجان ساعىنتاەۆ.
