جاپپاي كارانتين الەمنىڭ تۇگەل دەرلىك ساحنالىق الاڭدارىنىڭ جوسپارىن وزگەرتتى, الايدا, بۇل ادامداردىڭ ونەرگە دەگەن قىزىعۋشىلىعى توقتادى دەگەندى بىلدىرمەيدى. ستاتيستيكا كورسەتكەندەي, ينتەرنەت ارقىلى وپەرا جانە بالەت كلاسسيكاسىن تاماشالاۋ سانى ونداعان ەسەگە ارتقان.
ساحنالارىندا قازاقستان ەلورداسىنىڭ ترۋپپاسى ونەرىن پاش ەتكەن «استانا وپەرانىڭ» تۇراقتى سەرىكتەستەرى مەن دوستارى دا بۇگىنگى تاڭدا كارانتيندىك شارالاردى ۇستانۋدا. كوپشىلىگى بارلىق سپەكتاكلدەرىن, كونتسەرتتەرىن وتكىزبەۋ نە بولماسا كەيىنگە قالدىرۋ تۋرالى شەشىم قابىلداپ, كورەرمەندەر ءۇشىن ونلاين كورسەتىلىمدەر ۇيىمداستىردى.
وسىلايشا, كارلو فەليچە تەاترى 21 ناۋرىز كۇنى ءوزىنىڭ streamingcarlofelice.com سايتىندا «استانا وپەرا» بالەت ترۋپپاسىنىڭ 2019 جىلعى 11 قاڭتاردا گاسترولدىك باعدارلاما اياسىندا يتالياندىق ساحنادا ۇسىنعان «اققۋ كولى» بالەتتىك سپەكتاكلىن كورسەتتى.
بيىل ەلوردالىق ۇجىم ءوزىنىڭ جەتىنشى كاسىبي مەرەكەسىن اتاپ وتەدى. تەاترلىق ولشەم بويىنشا ازىرگە جاس شاعىنا قاراماستان, وسى جىلدار ىشىندە قانشاما دۇنيە جاسالىندى. مادەنيەت جانە سپورت مينيسترلىگىنىڭ قولداۋىمەن وتكەن كوپتەگەن گاسترولدەر, سونىڭ ىشىندە الەمدىك تۋرنە, ارتىستەردىڭ حالىقارالىق بايقاۋلارداعى جەڭىسى, ايگىلى مايتالماندارمەن سپەكتاكلدەردىڭ قويىلىمدارى – وسىنىڭ ءبارى حالىقارالىق ارەنادا «استانا وپەرا» برەندىن تانىمال ءارى بەدەلدى ەتتى.
«استانا وپەرانىڭ» ۇزدىك سپەكتاكلدەرىنە كارنەگي-حولل, پاريج وپەراسى, Meridian Hall Stadsschouwburg, De Doelen, كارلو فەليچە تەاترى, ريم وپەرا تەاترى, ۆالەنسياداعى سوفيا پاتشايىمنىڭ ونەر سارايى, ماسكاتتاعى كورولدىك وپەرا تەاترى, مارين تەاترى, «سانكت-پەتەربۋرگ وپەرا» تەاترى, د.ا.حۆوروستوۆسكي اتىنداعى كراسنويارسك مەملەكەتتىك وپەرا جانە بالەت تەاترى, مەملەكەتتىك كرەمل سارايى, ءا.ناۋاي اتىنداعى ءماۇت جانە باسقا دا تەاترلاردىڭ ونەرسۇيەر قاۋىمى لايىقتى باعاسىن بەردى.
بۇگىندە «استانا وپەرانىڭ» رەپەرتۋارى كورنەكتى ۇلتتىق كومپوزيتورلاردىڭ شىعارمالارىن – م.تولەباەۆتىڭ ء«بىرجان – سارا», ا.جۇبانوۆ پەن ل.ءحاميديدىڭ «اباي», ە.برۋسيلوۆسكيدىڭ «قىز جىبەك» وپەرالارىن, ع.جۇبانوۆانىڭ «قاراگوز» بالەتىن قامتيدى. ال الەمدىك كلاسسيكا 30-عا جۋىق اتاقتى سپەكتاكلدەرمەن ۇسىنىلعان.
رەپەرتۋاردىڭ قالىپتاسۋىنا ونەر الەمىندەگى ايتۋلى تۇلعالار – باس ديريجەر – الان بورىباەۆ پەن بالەت ترۋپپاسىنىڭ كوركەمدىك جەتەكشىسى – التىناي اسىلمۇراتوۆا زور ۇلەسىن قوسىپ كەلەدى.
«استانا وپەرانىڭ» بارشا شىعارماشىلىق ۇجىمىنىڭ زور ماقتانىشى – العاش رەت ا.جۇبانوۆ, ل.ءحاميديدىڭ «اباي» وپەراسى ءۇشىن تابىس ەتىلگەن قازاقستان رەسپۋبليكاسىنىڭ ادەبيەت پەن ونەر سالاسىنداعى مەملەكەتتىك سىيلىعى بولدى (2018). ءبىر جىلدان كەيىن تەاتر قىزمەتى «جىلدىڭ ۇزدىك كونتسەرتتىك/تەاترلىق الاڭى» اتالىمىندا BraVo حالىقارالىق كاسىبي مۋزىكا سىيلىعىمەن اتاپ ءوتىلدى.
«استانا وپەرا» سپەكتاكلدەرى فرانكو دزەففيرەللي, يۋري گريگوروۆيچ, بوريس ەيفمان, التىناي اسىلمۇراتوۆا, اندريس ليەپا, الان بورىباەۆ, دجانكارلو دەل موناكو, پەر لۋيدجي پيتستسي, لورەنتسو اماتو, لۋكا رونكوني, داۆيدە ليۆەرمور, رايموندو رەبەك سىندى اتاقتى شەتەلدىك جانە وتاندىق مادەنيەت قايراتكەرلەرىنىڭ قويىلىمىندا; كورنەكتى ستسەنوگراف ەتسيو فريدجەريو مەن كوستيۋمدەر بويىنشا سۋرەتشى – «وسكار» سىيلىعىنىڭ يەگەرى فرانكا سكۋارچاپينو, سونداي-اق دارىندى قازاقستاندىق سۋرەتشىلەر سوفيا تاسماعامبەتوۆا, پاۆەل دراگۋنوۆ, اراسەل دوسمۇراتوۆانىڭ قاتىسۋىمەن وتەدى.
«استانا وپەرا» مەملەكەتتىك وپەرا جانە بالەت تەاترىندا تۇرعىنداردىڭ بارلىق الەۋمەتتىك توپتارىنىڭ, سونىڭ ىشىندە مۇمكىندىگى شەكتەۋلى جانداردىڭ كەلۋىنە جاعداي جاسالعان. ولار ءۇشىن تەاتردا «كەدەرگىسىز ورتا» ايماعى بار: كەڭ اشىلاتىن ەسىكتەر, قاۋىپسىز پاندۋستار, ارنايى ليفت جانە سپەكاكلدەر مەن كونتسەرتتەردى تاماشالاۋى بارىنشا قاۋىپسىز ءارى جايلى بولۋى ءۇشىن باسقا دا قاجەتتى اتريبۋتتار قاراستىرىلعان.
بۇگىنگى تاڭدا تەاترداعى تىرشىلىك توقتاعان جوق: عيمارات مۇقيات تازارتىلىپ, زارارسىزداندىرۋ جۇمىستارى جالعاسۋدا, وسىلايشا, تەاتر ۇجىمى كلاسسيكالىق ونەر تابىنۋشىلارىمەن كەزدەسۋدى اسىعا كۇتۋدە.
