پارلامەنت • 26 ناۋرىز، 2020

ماجىلىستە بەيبىت جينالىستاردى ۇيىمداستىرۋ تۋرالى زاڭ جوباسى ماقۇلداندى

19 رەتكورسەتىلدى

بۇگىن ءماجىلىس سپيكەرى نۇرلان نىعماتۋليننىڭ توراعالىعىمەن وتكەن جالپى وتىرىستا «قازاقستان رەسپۋبليكاسىندا بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى» زاڭ جوباسى ماقۇلداندى. بۇل تۋرالى پارلامەنت ءماجىلىسىنىڭ ءباسپاسوز قىزمەتى حابارلادى.

نۇرلان نىعماتۋلين ءماجىلىس دەپۋتاتتارى، مەملەكەتتىك ورگاندار، پارلامەنتتىك ەمەس پارتيالار، ۇەۇ مەن ازاماتتىق قوعامنىڭ وكىلدەرى بىرلەسىپ جۇمىس اتقارعان جاڭا زاڭ جوباسى حالىق ۇنىنە قۇلاق اساتىن مەملەكەت تۇجىرىمداماسىنا سايكەس كەلەتىنىن اتاپ ءوتتى. وتىرىس بارىسىندا دەپۋتاتتار بىرقاتار ماسەلەلەرگە توقتالدى. اتاپ ايتقاندا، بەيبىت جينالىستاردى وتكىزەتىن ارنايى ورىندار ماسەلەسى.

- مەنىڭشە، ءبىزدىڭ دەپۋتاتتارىمىز ەنگىزگەن ۇسىنىس وتە ورىندى. سەبەبى، بەيبىت جيىندى ۇيىمداستىرۋشىلار ءۇشىن بارلىق جاعداي جاسالۋ كەرەك. ارنايى جيىن وتەتىن ورىندار تۋرالى اقپاراتتار دا اشىق بولۋ كەرەك. ايتپەسە، ول ورىن بوس پا، بوس ەمەس پا ولار قايدان بىلەدى؟ سوندىقتان، اكىمدىك ءوز سايتىندا، جاڭا ايتىلعانداي، بوس ورىندار تۋرالى اقپاراتتى تولىق ورنالاستىرۋ كەرەك. بۇل قاي جاقتان الىپ قاراساڭ دا پايدالى جانە ءتيىمدى، - دەدى ماجىلىس سپيكەرى.

سونىمەن قاتار دەپۋتاتتار بەيبىت جينالىس وتكىزۋ تۋرالى حاباردار ەتۋ مەرزىمىنە ەرەكشە نازار اۋداردى. ماجىلىسمەندەردىڭ پىكىرىنشە، ۇكىمەتتىك نۇسقادا ۇسىنىلعان مەرزىمدەر قىسقارتىلۋى ءتيىس. بۇل نورما ەكىنشى وقىلىمعا دەيىن پىسىقتالاتىن بولادى.

دەپۋتاتتاردىڭ پىكىرىنشە، قولدانىستاعى باق تۋرالى زاڭنىڭ نورمالارىن قايتالايتىن جۋرناليستەردىڭ قۇقىقتارى تۋرالى ۇكىمەتتىك نۇسقادا ۇسىنىلعان نورمالاردى قايتا قاراۋ قاجەت. ازىرلەۋشىلەردىڭ، سونداي-اق ءىىم وكىلدەرىنىڭ تۇسىنىكتەمەلەرىن تىڭداعاننان كەيىن ماجىلىسمەندەر نورمالار سانىن قىسقارتۋ مەن پىسىقتاۋدىڭ ماڭىزدىلىعىن اتاپ ءوتتى.

تالقىلاۋدى قورىتىندىلاي كەلە نۇرلان نىعماتۋلين زاڭ جوباسىنىڭ ۇكىمەتتىك نۇسقاسى ءتۇرلى الاڭداردا، سونىڭ ىشىندە وڭىرلەردە تالقىلانعاننان كەيىن ەلەۋلى وزگەرىستەرگە ۇشىراعانىنا توقتالدى.بۇدان باسقا، ەكىنشى وقىلىمعا دەيىن جۇمىس توبى تۇزەتۋلەر مەن تولىقتىرۋلاردىڭ سوڭعى رەداكتسيالارىن پىسىقتاۋى ءتيىس.

ءماجىلىس توراعاسى بۇل ميتينگىلەر تۋرالى زاڭ جوباسى حالىق ۇنىنە قۇلاق اساتىن مەملەكەت تۇجىرىمداماسىنا سايكەس كەلەتىنىن ايتىپ، زاڭ جوباسى جينالىستار مەن ميتينگىلەردى ۇيىمداستىرۋ مەن وتكىزۋدىڭ قولدانىستاعى تاجىريبەسىن تۇبەگەيلى وزگەرتەتىنىنە جانە ازاماتتاردىڭ قۇقىقتارى مەن ولاردىڭ جينالىستار مەن ميتينگىلەردى وتكىزۋ كەزىندەگى جاۋاپكەرشىلىكتەرىنىڭ وڭتايلى ۇيلەسىمىن قامتاماسىز ەتۋگە نازار اۋداردى.

سوڭعى جاڭالىقتار

ۇقساس جاڭالىقتار