قوعام • 26 ناۋرىز، 2020

نۇر-سۇلتان قالاسىندا كارانتين اۋماعىن كەسىپ ءوتۋ بويىنشا 56 فاكت تىركەلدى

9 رەتكورسەتىلدى

قازاقستان استاناسىندا ناۋرىزدىڭ 19-25 ارالىعىندا كارانتين اۋماعىن كەسىپ ءوتۋ بويىنشا 56 فاكت تىركەلدى. بۇل تۋرالى نۇر-سۇلتان قالاسى پوليتسيا باسقارماسىنىڭ باسشىسى ەرجان سادەنوۆ مالىمدەدى.

- وسى ۋاقىت ارالىعىندا ەلورداعا كىرىپ-شىعۋدىڭ ەرەكشە رەجيمىن بۇزعانى ءۇشىن 56 ازامات اكىمشىلىك جاۋاپكەرشىلىككە تارتىلدى. ونىڭ ىشىندە 31 ازامات 15 تاۋلىككە اكىمشىلىك قاماۋعا الىنىپ، 9 ازاماتقا 10 اەك كولەمىندە ايىپپۇل سالىندى، ال قالعان 16 تۇلعاعا قاتىستى ماتەريالدار سوتتىڭ قاراۋىنا جولداندى، – دەدى ەرجان سادەنوۆ.

پوليتسيا مالىمەتىنشە، كارانتين اۋماعىن زاڭسىز كەسىپ وتپەك بولعان 56 وقيعانىڭ 10-ى كارانتين تالابىن اۆتوكولىكپەن بۇزۋعا قاتىستى تىركەلگەن.  

«ادامدار كارانتين اۋماعىن اينالما جولدارمەن، سونداي-اق جازىق دالا ارقىلى وتپەك بولعان. مۇنداي فاكتىلەردىڭ بارلىعىنىڭ جولى كەسىلدى. ايتالىق، كارانتين اۋماعىنىڭ ىرگەسىندە ەلدى-مەكەن بار: ءتارتىپ بۇزۋشى جاياۋ اۋىلعا 5 ليتر اراق الىپ وتپەك بولعان. الايدا ول سول جەردە ۇستالدى»،- دەدى ە. سادەنوۆ.

ەستەرىڭىزگە سالساق، 19 ناۋرىزدا ەلوردالىق پوليتسيا دەپارتامەنتى قىزمەت وتكەرۋدىڭ ەرەكشە رەجيمىنە كوشىرىلدى. وسىعان بايلانىستى نۇر-سۇلتان قالاسىنىڭ بويىمەن جىبەك جولى، قوسشى، قاراوتكەل، تالاپكەر جانە قوياندى ەلدى-مەكەندەرىن قامتي وتىرىپ، كولىك قۇرالدارىنىڭ بارلىق ءتۇرىنىڭ كىرىپ-شىعۋى مەن ازاماتتاردىڭ بۇكىل باعىتتار بويىنشا ءجۇرىپ-تۇرۋىن شەكتەۋ ءۇشىن دەنساۋلىق ساقتاۋ ورگاندارىمەن، ۇلتتىق ۇلان جانە قورعانىس مينيسترلىگىنىڭ اسكەرلەرىمەن بىرگە 7 قاداعالاۋ بەكەتى ورناتىلدى. قاداعالاۋ بەكەتتەرىنىڭ اراسىندا جەدەل توپتار جۇمىس ىستەيدى. ولار جول تالعامايتىن كولىكتەرمەن جانە اۋەدەن باقىلاۋ دروندارىمەن قامتاماسىز ەتىلگەن. 

ءىىب مالىمەتىنشە، بۇگىنگى كۇنى اينالما جول ارقىلى پاترۋلدىك جاساقتار ىلەسە وتىرىپ، 2 مىڭنان استام اۆتوكولىك جانە 3 600 ازامات ترانزيتتىك مارشرۋتپەن ءوتتى. وعان قوسا، نۇر-سۇلتان قالالىق پروكۋراتۋراسىنىڭ ۇيلەستىرۋىمەن ۋاقىتشا شەكتەۋلەر مەن شارالاردىڭ زاڭدى جۇزەگە اسىرىلۋىن قاداعالاۋدى قامتاماسىز ەتۋ ماقساتىندا قۇرامىنا پروكۋراتۋرا، پوليتسيا جانە مەملەكەتتىك كىرىس قىزمەتكەرلەرى شوعىرلانعان جەدەل توپ قۇرىلدى. ناۋرىزدىڭ 16-سى مەن 25-ءسى ارالىعى قۇقىققورعاۋ قىزمەتكەرلەرى كارانتين رەجيمىنىڭ ساقتالۋىن باقىلاۋ ماقساتىندا بارلىق ويىن-ساۋىق ورىندارىن تەكسەردى. قالادا جالپى سانى 2000-نان اساتىن ويىن-ساۋىق ورىندارى تىركەلگەن. ول - مەيرامحانالار، ءدامحانالار، بارلار، كاراوكە-بارلار، تۇنگى كلۋبتار، بيليارد جانە كومپيۋتەرلىك كلۋبتار، قوعامدىق تاماقتانۋ ورىندارى، مونشالار، ساۋنالار جانە ت.ب.

تەكسەرۋ كەزىندە جۇمىس ىستەپ تۇرعان 75 نىسان انىقتالدى. ولاردىڭ يەلەرى كارانتين رەجيمىن بۇزعانى ءۇشىن اكىمشىلىك جاۋاپكەرشىلىككە تارتىلدى. ەكى ساۋنانىڭ يەسى 5 تاۋلىككە اكىمشىلىك قاماۋعا الىنىپ، قالعاندارىنا 10 اەك كولەمىندە ايىپپۇل سالىندى. 1 900-عا جۋىق وبەكتى ىشكى ىستەر ورگاندارىنىڭ الدىن الا ەسكەرتۋلەرى مەن تالاپتارى بويىنشا وزدەرىنىڭ جۇمىستارىن توتەنشە جاعداي كەزەڭىنە دەر كەزىندە توقتاتتى.

بۇدان بولەك، اتالعان ۋاقىت ارالىعىندا مەديتسينالىق ماسكالار مەن انتيسەپتيكتەردى زاڭسىز ساۋدالاۋدىڭ 30 دەرەگى انىقتالىپ، كاسىپكەرلىك قىزمەتپەن ءتيىستى تىركەۋسىز اينالىسقانى ءۇشىن اكىمشىلىك ماتەريالدار تولتىرىلىپ، ولاردىڭ بارلىعىنا ايىپپۇل سالىندى.

سوڭعى جاڭالىقتار

ىستىق تاماق تاراتتى

قازاقستان • كەشە

ۇقساس جاڭالىقتار