ايماقتار • 26 ناۋرىز، 2020

باتىس قازاقستاندا 120 ەلدى مەكەندە ينتەرنەت ناشار

27 رەتكورسەتىلدى

توتەنشە جاعداي كەزىندە باستالعالى وتىرعان ءۇشىنشى توقسان قالاي وتەدى؟ وقۋشىلاردى قاشىقتان وقىتۋدىڭ بارلىق ماسەلەسى شەشىلگەن بە؟ باتىس قازاقستان وبلىستىق ءبىلىم باسقارماسىنىڭ باسشىسى ايىمگۇل ءتىرجانوۆا الداعى وقۋ توقسانى تۋرالى ساۋالدارعا جاۋاپ بەردى.

ەلىمىزدە كوروناۆيرۋس ىندەتىنە بايلانىستى قاتاڭ سانيتارلىق-دەزينفەكتسيالىق رەجيم ەنگىزىلۋىنە وراي 13 ناۋرىزدان باستاپ ءبىلىم مەكەمەلەرىندە مادەني-سپورتتىق شارالاردى وتكىزۋ توقتاتىلدى. مەكتەپتەردە وقۋشىلارى 16 ناۋرىز بەن 5 ءساۋىر ارالىعىندا كوكتەمگى كانيكۋلعا شىقتى. 16 ناۋرىزدان باستاپ كاسىپتىك جانە تەحنيكالىق ءبىلىم بەرۋ ۇيىمدارى قاشىقتان وقىتۋعا كوشىرىلدى. مەكتەپكە دەيىنگى ۇيىمدار شتاتتىق رەجيمدە جۇمىس ىستەگەنىمەن، اتا-انالارعا مۇمكىندىك بولسا بالالارىن بالاباقشاعا اكەلمەۋ ۇسىنىلدى.

- ءبىلىم بەرۋ ۇيىمدارى قىزمەتكەرلەرى قازىر قاشىقتان جۇمىس ىستەپ جاتىر، ولاردىڭ جالاقىسى تولىقتاي ساقتالادى، - دەدى ايىمگۇل ءتىرجانوۆا.

توتەنشە جاعداي مەرزىمى ۇزارتىلۋ ىقتيمال بولعاندىقتان، ەلىمىزدىڭ ءبىلىم جانە عىلىم مينيسترلىگى قاشىقتان وقىتۋ بويىنشا ارنايى جۇمىس توبىن قۇرعان ەدى. ونىڭ قۇرامىنا قاشىقتان ءبىلىم بەرۋ سالاسىندا جۇمىس ىستەيتىن «Bilimland»، «DDaryn.online»، «كۇندەلىك»، «Univer»، «Platonus»، «EduPage»، بيل، «BTS education»، «U-study» جانە «AGS» سياقتى  ۇيىمداردىڭ وكىلدەرى جانە پەداگوگتەر، ادىسكەرلەر، مەكتەپ ديرەكتورلارى، ديرەكتورلاردىڭ وقۋ ءىسى جونىندەگى ورىنباسارلارى جانە جوعارى وقۋ ورىندارىنىڭ پرورەكتورلارى ەنگەن.

ءبىلىم جانە عىلىم مينيسترلىگىمەن وقۋشىلار مەن مۇعالىمدەر ءۇشىن  پايدالانىلاتىن ءبىلىم رەسۋرستارى ۇسىنىلۋدا. بۇل رەسۋرستار تەگىن.

- وقۋشىلاردى قاشىقتان وقىتۋ دايىندىعى بويىنشا جۇمىس بىرنەشە باعىتتا ءجۇرىپ جاتىر. مىسالى، تاپسىرما بەرۋ، ولاردىڭ ورىندالۋىن تەكسەرۋ، باعالاۋ جانە كەرى بايلانىستى قامتاماسىز ەتەتىن اقپاراتتىق جۇيەلەردى ەنگىزۋ قاراستىرىلادى. ءبىلىم الۋشىلار بەينە-ساباقتارعا قاتىسىپ، تاپسىرمالار الىپ، قاجەت بولعان جاعدايدا پەداگوگتەردىڭ ءوز سىنىبىمەن ونلاين-تالقىلاۋ، باعالاۋ بويىنشا نەمەسە ۆيدەوستريمينگ سەرۆيستەرىن پايدالانا الۋىن قامتاماسىز ەتەتىن جۇيەلەردى ىسكە قوسۋ دا كوزدەلگەن، - دەيدى ءبىلىم باسقارماسىنىڭ باسشىسى.

قازاقستان رەسپۋبليكاسى ءبىلىم جانە عىلىم مينيسترلىگىنىڭ تاپسىرىسىنا سايكەس ساباقتار «بالاپان» (قازاق تىلىندە) جانە «ەلارنا» (ورىس تىلىندە) تەلەارنالارىنان كورسەتىلەدى ەكەن.

قازىرگى تاڭدا بارلىق اۋداندىق جانە قالالىق ءبىلىم بەرۋ بولىمدەرى وقۋشىلار مەن پەداگوگتەردىڭ ءۇي جاعدايىندا ينتەرنەتكە قوسىلۋ مۇمكىندىگىن، وتباسىنداعى وقۋشى مەن كومپيۋتەر، نوۋتبۋك، سمارتفون سياقتى قۇرالداردىڭ سانىن جيناقتاپ جاتىر.

- باتىس قازاقستان وبلىسىندا 120 ەلدى مەكەندە ينتەرنەت جىلدامدىعى تومەندىگىنە بايلانىستى ساباق جۇرگىزۋدە قيىندىق تۋىنداۋى مۇمكىن. بۇل ماسەلەنى وبلىس دەڭگەيىندە شەشۋ جولدارى قاراستىرىلۋدا. مۇنداي جاعدايدا اۋىل مەكتەپتەرىنىڭ مۇعالىمدەرى بالالارعا قاعاز تۇرىندە تاپسىرما بەرىپ، جاۋاپتى قاعاز تۇرىندە الادى. بىراق وقۋشىلاردى مەكتەپكە جينامايمىز، - دەيدى ايىمگۇل ءتىرجانوۆا.

ءبىلىم باسقارماسى باسشىسىنىڭ ايتۋىنشا، وبلىستىڭ ءبىلىم سالاسىنا بولىنگەن بيۋدجەت قارجىسى قايتا قارالىپ، ۇنەمدەلگەن قارجىعا كومپيۋتەر، پلانشەتتەر الۋ، ولاردى مۇقتاج مۇعالىمدەرگە جانە از قامتىلعان وتباسىلارعا بەرۋ ماسەلەسى دە قاراستىرىلىپ جاتىر ەكەن. ۇيدەن وقيتىن بالالارىن، اسىرەسە، باستاۋىش سىنىپ وقۋشىلارىن قاداعالاۋ ءۇشىن ولاردىڭ اتا-انالارىنا كەزەكتى ەڭبەك دەمالىسىن بەرۋ تۋرالى جۇمىس بەرۋشىلەرگە ۇسىنىس ايتىلعان.

باتىس قازاقستان وبلىسىندا تەحنيكالىق جانە كاسىبي ءبىلىم بەرۋ سالاسىنداعى 33 كوللەدجدىڭ 12 مىڭ ستۋدەنتى ناۋرىزدىڭ 16-سىنان بەرى ديستانتسيالىق ءبىلىم بەرۋگە كوشىپ كەتتى. تاعى 4 مىڭداي ستۋدەنت وندىرىستىك تاجىريبەدەن وتۋدە.

ايتا كەتەيىك، وبلىس اۋماعىندا 107 مىڭنان اسا وقۋشى ءبىلىم الاتىن 388 مەكتەپ بار، ولاردىڭ 58،8%-ى، ياعني 223-ءى – شاعىن كومپلەكتىلى كۇندىزگى مەكتەپ.

 

باتىس قازاقستان

 

فوتو yapfiles.ru

سوڭعى جاڭالىقتار

ۇقساس جاڭالىقتار