باسقا ەلدەر سياقتى, پولشا دا شەت مەملەكەتتەردەن ۇشىپ كەلگەندەردى 14 كۇن ءۇي كارانتينىنە جىبەرەدى. ال ۇيىندە جاتقان ادامدى تاۋلىك بويى باقىلاۋدا ۇستاۋ – كۇردەلى ءىس. جاۋاپكەرشىلىگى جوق ادام كارانتينگە پىسقىرماي, قىدىرىپ كەتۋى ابدەن مۇمكىن. سوندىقتان پولشا بيلىگى ءۇي كارانتينىندە جاتقان ازاماتتاردى 14 كۇن بويى ۋىسىنان شىعارمايتىن ەرەكشە ءادىس ويلاپ تاپتى. كارانتيندەگى ازاماتقا Home Quarantine موبيلدىك قوسىمشاسىن تەلەفونعا جۇكتەپ الۋ مىندەتتەلەدى. ودان كەيىن پوليتسيا ازاماتتارعا گەولوكاتسيالىق مالىمەتتەرىمەن قوسا, سەلفي جىبەرۋ تۋرالى سۇراۋ جىبەرىپ تۇرادى. بۇل سۇراۋ كۇنىنە بىرنەشە رەت, تاۋلىكتىڭ كەز كەلگەن ۋاقىتىندا كەلۋى مۇمكىن, قاشان كەلەتىنىن كارانتيندەگى ادام بولجاپ تا بىلە المايدى. ەگەر پوليتسيا ساۋالىنا 20 مينۋتتىڭ ىشىندە جاۋاپ كەلمەسە, وندا الگى ادام كارانتين رەجيمىن بۇزعان بولىپ ەسەپتەلەدى دە ايىپپۇل سالىنادى. ايىپپۇلدىڭ كولەمى تەڭگەمەن – 50 مىڭ شاماسىندا. ء«ۇي كارانتينىندە جاتقان ادامدا ەكى تاڭداۋ بار: نە ولار تەلەفونعا موبيلدىك قوسىمشانى جۇكتەپ, پوليتسيانىڭ تالابىن ورىندايدى, نە پوليتسيا ۇيىنە بارىپ, ايىپپۇل سالادى» دەيدى پولشا تسيفرلىق تەحنولوگيانى ەنگىزۋ مينيسترلىگىنىڭ ءباسپاسوز قىزمەتىنىڭ وكىلدەرى.
تەك پولشا عانا ەمەس, سينگاپۋر بيلىگى دە وسىنداي قاتاڭ شاراعا بارىپ وتىر. مۇندا دا كارانتيندەگى تۇرعىندار ارنايى شىعارىلعان موبيلدىك قوسىمشانى جۇكتەپ الۋى كەرەك. قوسىمشا تەلەفونعا جۇكتەلگەننەن كەيىن Bluetooth ارقىلى تەلەفون قولدانۋشىسى كىممەن سويلەسكەنى, قايدا بارعانى انىقتالادى.
ال تايۆاندا ۇيدە كارانتيندە وتىرعاندارعا «ەلەكتروندىق شەكتەۋ» ەنگىزىلدى. تەلەفونعا ورناتىلعان موبيلدىك قوسىمشانىڭ ەرەكشەلىگى سول, كارانتيندەگى ازامات ۇيدەن ۇزاسا, بىردەن دابىل قوڭىراۋى ويناپ, ول بىردەن پوليتسيا بولىمشەسىنە كەلىپ تۇسەدى.
قىمبات توقتامۇرات
