بۇگىن الماتى قالاسىندا كوروناۆيرۋس جۇقتىرعان تاعى ءبىر ادام انىقتالدى. 1975 جىلى تۋعان ايەل قالاعا ەگيپەتتەن وسى جىلدىڭ 23 ناۋرىزىندا تۇنگى ساعات 01.00-دە ۇشىپ كەلگەن.
ۇشىپ كەلگەن بويدا كارانتينگە جاتقىزىلىپ, وعان COVID-19 سىناماسىنا تالداۋ جاسالعان. بۇگىن دياگنوز ناقتىلاندى.
سونداي-اق بىرقاتار باق جاريالاعان ەكى ادام كارانتيندە جاتىپ جۇقتىرعان دەگەن اقپاراتتىڭ جالعان ەكەنى حابارلاندى.
ولاردىڭ بىرەۋى ماسكەۋ–الماتى رەيسىمەن كەلگەن بۇرىن ۆيرۋس جۇقتىرعان ناۋقاسپەن تىعىز بايلانىستا بولعان. وسىعان بايلانىستى ناۋقاس 14 كۇندىك كارانتينگە وقشاۋلاندى. كەشە ونىڭ ۆيرۋس جۇقتىرعانى وكىنىشكە وراي, وڭ ناتيجە بەرىپ, انىقتالدى.
ەكىنشى ادام مينسك–الماتى رەيسى ارقىلى ۇشىپ كەلگەن. ول وتىرعان اۋەلاينەرىندە بۇرىن ىندەت جۇقتىرعان, پاريجدەن وسى رەيس ارقىلى ۇشىپ كەلگەن جولاۋشى بولعان. سول كۇنى ۇشاقتىڭ بارلىق جولاۋشىسى كارانتينگە وقشاۋلاندى. كەشە ونىڭ دا بويىنان اۋرۋ بەلگىلەرى انىقتالدى.
وسىلايشا, بۇل ناۋقاستار دەرتىنە اۋە ساياحاتى كەزىندە بۇرىن وسى ينفەكتسيانى جۇقتىرعاندارمەن بايلانىسۋ ارقىلى دۋشار بولىپ وتىر.
قازىرگى ۋاقىتتا 26 ناۋقاس قالالىق كلينيكالىق جۇقپالى اۋرۋلار اۋرۋحانالارىندا ەم الىپ جاتىر.
بۇعان دەيىن حابارلانعانداي, ەكى ناۋقاستىڭ جاعدايى قازىر ورتاشا اۋىر, ال قالعاندارىنىڭ جاعدايى – قاناعاتتانارلىق.
بۇگىندە قالانىڭ پروۆيزورلىق گوسپيتالدارىندا 660 ازامات, كارانتيزاتسياعا ارنالعان نىسانداردا قوسىمشا 778 ادام بولسا, ءۇي كارانتينىندە 1472 ادام بار.
كارانتينگە وقشاۋلانعان بارلىق ازاماتتىڭ دەنە قىزۋى بىرقالىپتى, كاتارالدى قۇبىلىستار جوق.
پروۆيزورلىق گوسپيتالداردا اۋىرعان ناۋقاستارمەن بايلانىستا بولعان جانە 1ا ساناتىنداعى ەلدەردەن كەلگەن ادامدار بار ەكەنىن ەسكەرتىلەدى. ولار اسحانانى بىرگە پايدالانبايدى جانە جەكە كۇتىمى وقشاۋلانعان.
