قازاقستاندا كوروناۆيرۋستىڭ تارالۋىن باقىلاۋ ءۇشىن قۇرىلعان Covid19live.kz تەگىن سەرۆيسىن وتاندىق ازىرلەۋشىلەر دايىنداعانىن بۇعان دەيىن دە بايانداعان ەدىك.
سپيكەردىڭ ايتۋىنشا, جاڭا سەرۆيس ناقتى ۋاقىت رەجيمىندە قازاقستاندا COVID-19 كوروناۆيرۋسىنىڭ تارالۋ كارتاسىن باقىلاۋعا, ال ەڭ باستىسى – جۇقتىرۋ نەمەسە جۇقتىرعاندارمەن بايلانىسى تۋرالى حابارلاۋعا مۇمكىندىك بەرەدى.
– قوسىمشادا كوروناۆيرۋس جۇقتىرعان ادامدار انىقتالعان نۇكتەلەر كورسەتىلگەن. سول بويىنشا الماتىلىقتار قالادا اۋىرعان قانشا ادامنىڭ بارىن جانە ولاردىڭ قايدا ەكەنىن كورە الادى, – دەي كەلە, باسقارما باسشىسى قازىردىڭ وزىندە بۇل قوسىمشانى 43 مىڭ ادام قولداناتىنىن ايتتى.
سەرۆيس قازاق جانە ورىس تىلدەرىندە, سونىمەن قاتار Android جانە iOS قوندىرعىلارىنا قوسىمشا جاسالعان.
Covid19live.kz بولىمدەرى:
– قازاقستان بويىنشا كوروناۆيرۋس تارالۋىنىڭ ونلاين كارتاسى;
– ۆيرۋستار مەن ونىڭ تارالۋى, قورعانۋ ادىستەرى جانە وزەكتى جاڭالىقتار;
– جەدەل ورتالىقتار مەن اۋرۋحانالاردىڭ مەكەن-جايى كورسەتىلگەن بىرىڭعاي تەرەزە.
سەرۆيستە قازاقستاندىقتارمەن كەرى بايلانىس ءۇشىن ەكى ماڭىزدى فۋنكتسيا بار:
- «مەن جۇقتىردىم»: COVID-19 تابىلعان پايدالانۋشى ءوزى بايلانىستا بولعان جانە جۇقتىرۋى ىقتيمال ادامداردى, سونداي-اق جۇقتىرا وتىرىپ, بارعان ورىنداردى اتاپ, كورسەتە الادى.
- «مەن جۇقتىرعاندارمەن بايلانىستا بولدىم»: ەگەر جۇقتىرعاندارمەن بىردەي رەيسپەن ۇشىپ كەلسە نەمەسە ونىڭ قارىم-قاتىناس شەڭبەرىنەن بىرەۋ جۇقتىرعانىنا سەنىمدى بولسا, پايدالانۋشى پىكىر قالدىرا الادى.
ەسكەرتە كەتەتىن جاعداي, وسى فۋنكتسيالاردىڭ كومەگىمەن الىنعان مالىمەتتەر تۇگەل جاسىرىن بولادى جانە تەك دەنساۋلىق ساقتاۋ ورگاندارىنىڭ قىزمەتكەرلەرىنە عانا قولجەتىمدى.
الىنعان اقپاراتتى پايدالانا وتىرىپ, ماماندار كوروناۆيرۋسقا كۇدىكتى ادامدارمەن حابارلاسىپ, كارتادا جۇقتىرۋ وشاعىن بەلگىلەي الادى, ال ازاماتتار سول قاۋىپتى وشاقتاردان ءوزىن ساقتاي الادى.
Covid19live.kz قوسىمشاسىن جاساۋشىلار بارلىق قازاقستاندىقتاردى الەۋمەتتىك جاۋاپكەرشىلىككە شاقىرا وتىرىپ, Covid19live.kz سەرۆيسىن تاراتۋ مونيتورينگى ءۇشىن عانا ەمەس, سونىمەن قاتار قۇزىرەتتى ورگانداردى ۋاقىتىلى حاباردار ەتۋ ءۇشىن دە بەلسەندى پايدالانۋلارىن سۇرايدى.
Covid19live.kz سەرۆيسى VLIFE جوباسىنىڭ باعدارلاماشىلارىمەن الماتى اكىمدىگىنىڭ, دەنساۋلىق ساقتاۋ مينيسترلىگىنىڭ جانە «مەديكەر الاتاۋ» مەديتسينالىق كومپانياسىنىڭ قولداۋىمەن قۇرىلدى.
