اتاپ ايتساق, قازاقستاننىڭ مەملەكەتتىك شەكاراسى قىتايمەن – 1460, رەسەيمەن – 6477, ورتالىق ازيادا وزبەكستانمەن – 2300, قىرعىزستانمەن – 980, تۇركمەنىستانمەن 380 شاقىرىمدى قۇرايدى. قازىرگى ۋاقىتتا وسى مەملەكەتتەردىڭ بارلىعىندا (تۇركىمەنستاننان باسقا) كوروناۆيرۋس وشاعى انىقتالىپ, ونى جۇقتىرعانداردىڭ سانى كۇننەن-كۇنگە ارتىپ كەلەدى. بىلايشا ايتقاندا, بىزدەر كوروناۆيرۋستىڭ بلوكاداسىندا قالدىق دەسە دە بولادى.
شىنىندا دا سولاي. ودان ءبىزدىڭ ەلىمىزدى كوپ شىعىنسىز الىپ شىعۋدىڭ ءبىر عانا جولى بار. ول – پرەزيدەنتىمىز قاسىم-جومارت توقاەۆتىڭ ەلىمىز بويىنشا جاريالاعان توتەنشە جاعداي مەن نۇرسۇلتان جانە الماتى قالالارىنا ەنگىزىلگەن كارانتين شارالارىنىڭ تالاپتارىن بۇزباۋ بولىپ تابىلاتىنى ايتپاسا دا تۇسىنىكتى. وسىنداي قىسىلتاياڭ كەزەڭدە حاس باتىرىمىز باۋىرجان مومىش ۇلىنىڭ «تارتىپكە باعىنعان قۇل بولمايدى» دەگەن ۇلاعاتتى ءسوزى ەسكە تۇسەدى. ولاي دەيتىنىمىز, كوروناۆيرۋس ىندەتىنىڭ ارتىندا ءبىزدىڭ ەلىمىزدىڭ مۇددەسى, ۇلتتىڭ دەنساۋلىعى, ەكونوميكالىق قاۋىپسىزدىك جانە ساياسي تۇراقتىلىق فاكتورلارى تۇرعانىن ۇمىتپاۋىمىز كەرەك.
وسى ورايدا, گەرمانيانىڭ كانتسلەرى انگەلا مەركەلدىڭ: «...جاعداي وتە مۇشكىل. وعان شىنداپ ءمان بەرىڭىزدەر. ەكىنشى دۇنيەجۇزىلىك سوعىستان كەيىن ءبىزدىڭ ەلدە مۇنداي ۇلكەن سىناق بولعان ەمەس» دەۋى بەكەر ەمەس.
ءيا, بۇل ءبىزدىڭ ەلدىگىمىز بەن بىرلىگىمىزدى تانىتاتىن ۇلى سىناق. ء«بىز «جاۋدىڭ» قايدا ەكەنىن, ول شابۋىل ءۇشىن قانداي «قارۋدى» پايدالاناتىنىن جانە ونىڭ كۇشىن ءتيىمدى تومەندەتەتىن قانداي ادىستەر بارىن بىلمەيمىز...» دەپ جازدى تۋنتسزي مەديتسينالىق ۋنيۆەرسيتەتىنىڭ سوت مەديتسيناسى كافەدراسىنىڭ پروفەسسورى ليۋ ليان. شىنىمەن دە سولاي. بۇگىنگى كۇنى ءبىر يتاليانىڭ وزىندە عانا كۇنىنە 800-دەن استام ادام اتالمىش ىندەتتىڭ قۇربانى بولىپ وتىر. سونىمەن قاتار, و باستا بۇل ىندەتكە نەمقۇرايدى قاراعاندىقتان زالال شەگىپ وتىرعاندىقتارىن اشىق مويىنداعان يتالياندىقتار الەم جۇرتشىلىعىنا ۇندەۋ تاستاپ جاتىر.
يتاليا گازەتتەرىنىڭ كۇندەلىكتى ءنومىرى قارا جامىلىپ شىعاتىن كورىنەدى. سەبەبى, گازەت بەتتەرىندە جاريالاناتىن ماقالادان گورى, قازاناما مەن كوڭىل ايتۋلار باسىم ءتۇسىپ جاتقان سىڭايلى.بۇعان قوسا پاندەميا ەتكە جايىپ بارا جاتقان ءجۇز جەتپىستەن استام مەملەكەتتىڭ تاعدىرى قالاي بولاتىنى دا ءبىر اللاعا ايان. سوندىقتان دا بۇل ىندەت جايباراقاتتىق پەن جايباسارلىقتى, سالاقتىق پەن سالعىرتتىقتى كوتەرمەيدى.
بەكەن نۇراحمەتوۆ,
س.بەردىقۇلوۆ اتىنداعى سىيلىعىنىڭ لاۋرەاتى.
الماتى
