ەلىمىز عالىمدارى وزدەرى ازىرلەگەن تۋبەركۋلەزگە قارسى جاڭا ۆاكتسينانى ادامدارعا سىناپ كورمەكشى. بۇل تۋرالى Bnews.kz حابارلادى.
جاڭا ۆاكتسينانىڭ ەرەكشەلىگى جونىندە بيولوگيالىق قاۋىپسىزدىك پروبلەمالارى عىلىمي- زەرتتەۋ ينستيتۋتىنىڭ باس ديرەكتورى, ۆەتەريناريا عىلىمىنىڭ دوكتورى, پروفەسسور ابىلاي سانسىزباي بىلاي دەيدى: «بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتى ادام تۋبەركۋلەزىنە قارسى جاڭا ۆاكتسينا ازىرلەدى. ول سوچيدە مايمىلدارعا, ۇلىبريتانيادا كۇزەندەرگە ەگىلىپ, سىناقتان ءساتتى ءوتتى. جاڭا ۆاكتسينا وتە جاقسى قاسيەتتەرىن كورسەتتى. ەشقانداي زيانى بولعان جوق, جانۋارلاردىڭ يممۋندىق قاسيەتتەرى كۇشەيە ءتۇستى.بيىل بارلىق رۇقسات قاعازدارىن الدىق. كلينيكالىق سىناقتى قازان ايىندا وتكىزەمىز. جەتپىس ەكى ەرىكتى ادام نيەت تانىتتى. ولاردىڭ جاسى ون سەگىزدەن ەلۋ جاسقا دەيىن. بۇل وتە كۇردەلى جۇمىس. ايتۋ كەرەك, مۇنداي كلينيكالىق سىناق قازاقستاندا ەشقاشان وتكىزىلمەگەن. ءبىرىنشى رەت جاسالماق. مۇنداي جۇمىس تمد كولەمىندە بىزدە عانا ءجۇرىپ جاتىر. ءۇش جىلدا وسىنداي جەتىستىككە جەتىپ وتىرمىز».
ۆاكتسينانى قولدانۋدىڭ ءار ءتۇرلى ادىستەرى - ءتىلدىڭ استىنا سالۋ, مۇرىنعا سەبۋ سەكىلدى امالدارى قاراستىرىلادى. قايسىسى ءتيىمدى بولادى, سونى قولدانادى. الەمدە تۋبەركۋلەزگە قارسى جالعىز عانا بتسج ۆاكتسيناسى بار ەكەن. الايدا,ونىڭ يممۋنيتەتى جوق, ەكىنشىدەن ۆاكتسينانى سالعان جەر ىرىڭدەيدى. ال ءبىزدىڭ عالىمداردىڭ ازىرلەگەن جاڭا ۆاكتسينانىڭ ونداي كەرى اسەرى جوق. مۇنىڭ ارتىقشىلىعى – ول ۆەكتورلىق ۆاكتسينا, جاڭا تەحنولوگيالار بويىنشا جاسالعان. ەڭ باستىسى, ونى اۋىرىپ جاتقان ادامدارعا دا ەگۋگە بولادى, الدىن-الۋ ءۇشىن دە پايدالانۋعا بولادى. كلينيكالىق سىناق وتكىزىلەتىن جەتپىس ەكى ادامنىڭ وتىز التىسىنىڭ دەنى ساۋ بولسا, وزگەسى تۋبەركۋلەز دەرتىنە شالدىققاندار.
«سىناقتار بۇكىلالەمدىك دەنساۋلىق ساقتاۋ ۇيىمىنىڭ باقىلاۋىمەن ءوتىپ جاتىر. كلينيكالىق سىناقتى وتكىزگەننەن كەيىن, زەرتتەۋدىڭ كەلەسى ءۇشىنشى, ءتورتىنشى كەزەڭىنە ءوتىپ, 2015 جىلى اياقتايمىز. بارلىعى ويداعىداي بولسا, كەلەشەكتە دۇنيەجۇزىندە وسى ۆاكتسينا قولدانىلاتىن بولادى. حالىقارالىق پاتەنتكە ءوتىنىش بەرىپ قويدىق . بۇل مەملەكەتتىڭ عىلىمعا ۇلكەن كوڭىل ءبولۋىنىڭ, قارجىلاندىرۋدىڭ, وتاندىق عالىمداردىڭ شەتەلدە تاجىريبەدەن ءوتۋىنىڭ ارقاسىندا مۇمكىن بولىپ وتىر», - دەپ اتاپ ءوتتى ءسوز ورايىندا ا. سانسىزباي.
ءامىرحان الماعانبەتوۆ.
