2013 جىلعى 21 تامىز, استانا, ۇكىمەت ءۇيى
«اقىلى اۆتوموبيل جولدارىن جانە كوپىر وتكەلدەرىن پايدالانۋ قاعيدالارى مەن شارتتارىن بەكىتۋ تۋرالى» قازاقستان رەسپۋبليكاسى ۇكىمەتىنىڭ 2007 جىلعى 30 قاڭتارداعى №71 قاۋلىسىنا وزگەرىس ەنگىزۋ تۋرالى
قازاقستان رەسپۋبليكاسىنىڭ ۇكىمەتى قاۋلى ەتەدى:
1. «اقىلى اۆتوموبيل جولدارىن جانە كوپىر وتكەلدەرىن پايدالانۋ قاعيدالارى مەن شارتتارىن بەكىتۋ تۋرالى» قازاقستان رەسپۋبليكاسى ۇكىمەتىنىڭ 2007 جىلعى 30 قاڭتارداعى №71 قاۋلىسىنا (قازاقستان رەسپۋبليكاسىنىڭ ءپۇاج-ى, 2007 ج., №2, 31-قۇجات) مىناداي وزگەرىس ەنگىزىلسىن:
كورسەتىلگەن قاۋلىمەن بەكىتىلگەن اقىلى اۆتوموبيل جولدارىن جانە كوپىر وتكەلدەرىن پايدالانۋ قاعيدالارى مەن شارتتارى وسى قاۋلىعا قوسىمشاعا سايكەس جانە رەداكتسيادا جازىلسىن.
2. وسى قاۋلى العاشقى رەسمي جاريالانعان كۇنىنەن باستاپ كۇنتىزبەلىك ون كۇن وتكەن سوڭ قولدانىسقا ەنگىزىلەدى.
قازاقستان رەسپۋبليكاسىنىڭ پرەمەر-ءمينيسترى س.احمەتوۆ.
قازاقستان رەسپۋبليكاسى ۇكىمەتىنىڭ 2013 جىلعى 21 تامىزداعى №824 قاۋلىسىنا قوسىمشا
قازاقستان رەسپۋبليكاسى ۇكىمەتىنىڭ 2013 جىلعى 30 قاڭتارداعى №71 قاۋلىسىمەن بەكىتىلگەن
اقىلى اۆتوموبيل جولدارىن جانە كوپىر
وتكەلدەرىن پايدالانۋ قاعيدالارى مەن شارتتارى
1. جالپى ەرەجەلەر
1. وسى اقىلى اۆتوموبيل جولدارىن جانە كوپىر وتكەلدەرىن پايدالانۋ قاعيدالارى مەن شارتتارى (بۇدان ءارى – قاعيدالار) «اۆتوموبيل جولدارى تۋرالى» 2001 جىلعى 17 شىلدەدەگى قازاقستان رەسپۋبليكاسىنىڭ زاڭىنا (بۇدان ءارى – زاڭ) سايكەس ازىرلەندى جانە اۆتوموبيل جولدارىن باسقارۋ جونىندەگى ۇلتتىق وپەراتورعا نەمەسە كونتسەسسيونەرگە بەرىلگەن قازاقستان رەسپۋبليكاسىنىڭ اقىلى اۆتوموبيل جولدارىن (جول ۋچاسكەلەرىن) جانە كوپىر وتكەلدەرىن پايدالانۋ ءتارتىبى مەن شارتتارىن ايقىندايدى.
2. وسى قاعيدالاردا زاڭدا كوزدەلگەن ۇعىمدار جانە مىناداي ۇعىمدار پايدالانىلادى:
1) اۆتوموبيل جولدارىن پايدالانۋشىلار – جول قوزعالىسىنا قاتىسۋشىلار بولىپ تابىلاتىن نەمەسە اۆتوموبيل جولدارىنا بولىنگەن بەلدەۋ مەن جول بويىنداعى بەلدەۋ شەگىندە وزگە دە قىزمەتتى جۇزەگە اسىراتىن جەكە جانە زاڭدى تۇلعالار.
2) اقىلى اۆتوموبيل جولدارىن (جول ۋچاسكەلەرىن) جانە كوپىر وتكەلدەرىن پايدالانۋ – اقىلى اۆتوموبيل جولدارى (جول ۋچاسكەلەرى) جانە كوپىر وتكەلدەرى بويىنشا اۆتوكولىك قۇرالدارىنىڭ بەلگىلەنگەن جۇكتەمەلەرىمەن, گاباريتتەرىمەن ۇزدىكسىز, قاۋىپسىز قوزعالىسىن قامتاماسىز ەتۋ جونىندەگى ءىس-شارالاردى جۇزەگە اسىرۋ جانە پايدالانۋ كەزەڭىندە ولاردىڭ كولىكتىك-پايدالانۋ جاي-كۇيىن ۇستاۋ;
3) اقىلى ءجۇرۋدى ۇيىمداستىرۋشى – اۆتوموبيل جولدارىن باسقارۋ جونىندەگى ۇلتتىق وپەراتور نەمەسە كونتسەسسيونەر;
4) كوپىر وتكەلى – كوپىردى, كوپىرگە كىرەبەرىستى, رەتتەۋ جانە قورعاۋ قۇرىلىستارىن قامتيتىن, سۋ كەدەرگىلەرىن ەڭسەرۋگە ارنالعان ينجەنەرلىك قۇرىلىستار كەشەنى.
2. اقىلى اۆتوموبيل جولدارىن (جول ۋچاسكەلەرىن)
جانە كوپىر وتكەلدەرىن پايدالانۋ ءتارتىبى مەن شارتتارى
3. اقىلى اۆتوموبيل جولدارىن (جول ۋچاسكەلەرىن) جانە كوپىر وتكەلدەرىن پايدالانۋ قازاقستان رەسپۋبليكاسىنىڭ زاڭناماسىنا سايكەس ولاردى جوندەۋ مەن كۇتىپ ۇستاۋ جونىندەگى ءىس-شارالاردى اقىلى ءجۇرۋدى ۇيىمداستىرۋشىنىڭ ۋاقتىلى قامتاماسىز ەتۋىن كوزدەيدى.
4. اقىلى ءجۇرۋدىڭ ۇيىمداستىرۋشى اقىلى اۆتوموبيل جولدارى (جول ۋچاسكەلەرى) مەن كوپىر وتكەلدەرىن ءتيىستى پايدالانۋ ماقساتىندا:
1) قازاقستان رەسپۋبليكاسىنىڭ زاڭناماسىنا سايكەس اۆتوموبيل جولدارىن پايدالانۋ كەزىندە قاۋىپسىزدىك تالاپتارىنىڭ ساقتالۋىن قامتاماسىز ەتەدى;
2) قىسقى كەزەڭدە اقىلى اۆتوموبيل جولدارىن (جول ۋچاسكەلەرىن) جانە كوپىر وتكەلدەرىن قاردان تازارتۋدى قامتاماسىز ەتەدى جانە جامىلعىنىڭ تايعاقتىعىنا قارسى شارالار قابىلدايدى,
3) كولىك قۇرالدارىنىڭ ۇزدىكسىز جانە قاۋىپسىز ءجۇرىپ ءوتۋىن جانە تابيعاتتى قورعاۋ زاڭناماسى تالاپتارىنىڭ ساقتالۋىن قامتاماسىز ەتەدى;
4) قازاقستان رەسپۋبليكاسىنىڭ زاڭنامالىق اكتىلەرىنە سايكەس اۆتوموبيل جولدارىن پايدالانۋشىلارعا جول جاعدايلارىنىڭ سەبەپتەرى بويىنشا تۋىنداعان جول-كولىك وقيعالارى كەلتىرگەن زياندى وتەۋ جونىندەگى شارالاردى قابىلدايدى;
5) قازاقستان رەسپۋبليكاسىنىڭ زاڭنامالىق اكتىلەرىنە سايكەس اۆتوموبيل جولدارىنا بولىنگەن بەلدەۋدىڭ فيتوسانيتاريالىق جاي-كۇيىن قامتاماسىز ەتەدى;
6) اۆتوموبيل جولدارىنىڭ بويىندا قورعانىش ەكپەلەرىن كۇتىپ-ۇستايدى,
7) جول ورگاندارىمەن كەلىسىم بويىنشا, جول پوليتسياسى بولىمشەلەرىمەن جانە توتەنشە جاعدايلار جونىندەگى ۋاكىلەتتى ورگانمەن بىرلەسىپ, شۇعىل جاعدايلاردا (قولايسىز اۋا رايى-كليماتتىق جاعدايلار, دۇلەي اپاتتار, ءورت, اۆتوموبيل جولدارىنىڭ كوتەرۋ قابىلەتىنىڭ جويىلۋى), سونداي-اق جوندەۋ-قۇرىلىس جۇمىستارىن جۇرگىزگەن كەزدە بۇل جونىندە جەرگىلىكتى اتقارۋشى ورگانداردى جانە اۆتوموبيل جولدارىن پايدالانۋشىلاردى ءتيىستى جول
بەلگىلەرىن قويىپ جانە بۇقارالىق اقپارات قۇرالدارى ارقىلى حاباردار ەتە وتىرىپ, كولىك قۇرالدارى قوزعالىسىن شەكتەيدى نەمەسە توقتاتادى;
8) دۇلەي مەتەورولوگيالىق قۇبىلىستار مەن تابيعي جانە تەحنوگەندىك سيپاتتاعى توتەنشە جاعدايلاردىڭ سالدارلارىن جويادى;
9) جول پوليتسياسى بولىمشەلەرىمەن ءوزارا ءىس-قيمىل جاساي وتىرىپ, جول-كولىك وقيعالارىنىڭ ەسەبىن جۇرگىزەدى, ولاردىڭ تۋىنداۋىنا ىقپال ەتەتىن سەبەپتەر مەن جاعدايلاردى تالدايدى, ولاردىڭ الدىن الۋ مەن جويۋ جونىندەگى ءىس-شارالاردى ازىرلەيدى;
10) قازاقستان رەسپۋبليكاسى ۇكىمەتىنىڭ 1997 جىلعى 25 قاراشاداعى №1650 قاۋلىسىمەن بەكىتىلگەن قازاقستان رەسپۋبليكاسى جول قوزعالىسىنىڭ ەرەجەلەرىندە بەلگىلەنگەن جىلدامدىق رەجيمىنىڭ شەڭبەرىندە كولىك قۇرالدارىنىڭ قاۋىپسىز ءجۇرىپ ءوتۋ مۇمكىندىگىن قامتاماسىز ەتەدى;
11) جول قوزعالىسىنا قاتىسۋشىلاردى قۇتقارۋ, جول-كولىك وقيعالارى, اۆاريالار, دۇلەي اپاتتار جاعدايلارىندا ولارعا دارىگەرگە دەيىنگى مەديتسينالىق كومەك كورسەتۋ بويىنشا شارالار قابىلدايدى;
12) جول پوليتسياسى بولىمشەلەرىنە جول-كولىك وقيعالارىن تەرگەۋگە جاردەم كورسەتەدى, سونداي-اق ەگەر جول-كولىك وقيعاسى ىلەسپە جول جاعدايلارى بويىنشا بولسا, قىزمەتتىك تەكسەرۋ جۇرگىزەدى;
13) قازاقستان رەسپۋبليكاسىنىڭ زاڭناماسىنا سايكەس جەدەل-ىزدەستىرۋ قىزمەتىن جۇزەگە اسىراتىن ورگاندارعا جاردەم كورسەتەدى;
14) جول قوزعالىسىن ۇيىمداستىرۋدىڭ تەحنيكالىق قۇرالدارىن (قورشاۋلار, جول بەلگىلەرى, جولدى بەلگىلەۋ, باعىتتايتىن قۇرىلعىلار, جارىقتاندىرۋ جەلىلەرى, باعدارشامدار, قوزعالىستى اۆتوماتتاندىرىلعان باسقارۋ جۇيەلەرى) ورناتۋ مەن جوندەۋدى قامتاماسىز ەتەدى;
15) قاجەتتى اقپاراتتىق-كوممۋنيكاتسيالىق جەلىلەرگە قوسۋ ارقىلى اۆتوكولىك قۇرالدارى قوزعالىسىنىڭ مونيتورينگى ءۇشىن ولشەۋ قۇرىلعىلارىن, جابدىقتاردى ورناتۋدى جانە باعدارلامالىق قامتۋدى قامتاماسىز ەتەدى;
16) قازاقستان رەسپۋبليكاسىنىڭ زاڭناماسىنا سايكەس اقىلى اۆتوموبيل جولدارى (جول ۋچاسكەلەرى) بويىنشا ءجۇرىپ وتكەنى ءۇشىن اقى الۋدى قامتاماسىز ەتەدى.
5. اقىلى اۆتوموبيل جولدارىن (جول ۋچاسكەلەرىن) جانە كوپىر وتكەلدەرىن كۇتىپ-ۇستاۋ بويىنشا جۇمىستار تۇراقتى نەگىزدە جۇزەگە اسىرىلادى.
6. اۆتوموبيل جولدارى (جول ۋچاسكەلەرى) مەن كوپىر وتكەلدەرىن كۇتىپ-ۇستاۋ بويىنشا جۇمىستاردى ۋاقتىلى جۇرگىزۋ ماقساتىندا ولاردى ۆيزۋالدى تەكسەرۋ كۇن سايىن جۇزەگە اسىرىلادى.
7. اقىلى اۆتوموبيل جولدارىنىڭ (جول ۋچاسكەلەرىنىڭ) جانە كوپىر وتكەلدەرىنىڭ پايدالانىلۋىن باقىلاۋدى اۆتوموبيل جولدارى جونىندەگى ۋاكىلەتتى مەملەكەتتىك ورگان جۇزەگە اسىرادى.
