ايماقتار • 18 ناۋرىز، 2020

الماتىدا ادامدار كوپ شوعىرلانعان جەرلەر دەزينفەكتسيالانادى

47 رەتكورسەتىلدى

الماتى قالاسى اكىمدىگىنىڭ ءباسپاسوز ورتالىعىندا جاسىل ەكونوميكا باسقارماسى باسشىسىنىڭ ورىنباسارى دياس احمەتقاليەۆتىڭ قاتىسۋىمەن جولداردى جۋ مەن ايالداما كەشەندەرىن وڭدەۋگە بايلانىستى ونلاين-ءباسپاسوز كونفەرەنتسياسى اياقتالدى.

دياس احمەتقاليەۆتىڭ ايتۋىنشا، بالالارعا ارنالعان ويىن، سپورت الاڭدارىنا جانە باسقا دا ادامدار كوپ شوعىرلانعان جەرلەرگە دەزينفەكتسيا جۇمىستارى جۇرگىزىلەدى. سونىمەن بىرگە قوقىس شىعاراتىن ۇيىمدار دا كۇندەلىكتى كەستەگە سايكەس قاتتى تۇرمىستىق قالدىقتاردى شىعارادى. قالاداعى كونتەينەرلىك الاڭ مەن كونتەينەرلەرگە دەزينفەكتسيا جۇمىستارى كۇشەيتىلگەن تۇردە جۇرگىزىلەدى.

- قۇرمەتتى قالا تۇرعىندارى، سىزدەردىڭ قاۋىپسىزدىكتەرىڭىز ءۇشىن بارلىق پايدالانعان مەديتسينالىق قالدىقتاردى ءارى قاراي زالالسىزداندىرۋ ماقساتىندا بولەك پاكەتتەرگە جيناپ، شىعارۋلارىڭىزدى سۇرايمىز، – دەدى د.احمەتقاليەۆ.

بۇل رەتتە بارلىق قىزمەتكەرلەر ماسكا، كوزىلدىرىك، ارنايى قولعاپتارمەن قامتاماسىز ەتىلگەن. قالاداعى بارلىق اۆتوبۋس انتيسەپتيكتەرمەن جابدىقتالعان. جولدار مەن تروتۋارلار كۇنىنە ەكى رەت، تاڭەرتەڭ جانە كەشكە جۋىلادى.

سوڭعى جاڭالىقتار

ۇقساس جاڭالىقتار