قۇرمەتتى الماتىلىقتار!
وزدەرىڭىز بىلەسىزدەر, پرەزيدەنت قاسىم-جومارت كەمەل ۇلى توقاەۆ كوروناۆيرۋستىڭ الەمدىك پاندەمياسىنا بايلانىستى ەلدە توتەنشە جاعداي جاريالادى.
شەشىم دۇرىس. وقيعانىڭ الدىن الۋ ءۇشىن قابىلدانعان.
توتەنشە جاعداي رەجيمى ادامداردىڭ ءومىرى مەن دەنساۋلىعىن قورعاۋ ءۇشىن بارلىق رەسۋرستاردى جۇمىلدىرۋعا مۇمكىندىك بەرەدى.
الماتى اۋماعىندا ۆيرۋستىق قاۋىپ-قاتەرگە قارسى الدىن الۋ شارالارى قاڭتار ايىندا دۇنيەجۇزىلىك دەنساۋلىق ساقتاۋ ۇيىمى قىتايدا كوروناۆيرۋس ىندەتىنىڭ ءورشۋى تۋرالى العاش حابارلاعان ساتتەن باستالدى.
2,5 ايدىڭ ىشىندە الماتى اۋەجايىنىڭ مەملەكەتتىك شەكاراسىندا شۇعىل قورعانىس شارالارى جۇرگىزىلدى.
13 ناۋرىزدا الماتىدا COVID-19 ۆيرۋسىنىڭ العاشقى جاعدايى تىركەلدى.
تارالۋ قارقىنى جوعارى.
بۇگىنگە دەيىن الماتىدا 15 كوروناۆيرۋس جاعدايى تىركەلدى.
تۇرعىندار ءۇشىن تەز ءوسىپ كەلە جاتقان قاۋىپ ءبىزدى جىلدام شەشىم قابىلداۋعا ءماجبۇر ەتۋدە.
سوندىقتان مەن پرەزيدەنتكە جانە توتەنشە جاعداي رەجيمىن قامتاماسىز ەتۋ جونىندەگى مەملەكەتتىك كوميسسياعا قالادا كارانتين ەنگىزۋ تۋرالى ۇسىنىس ەنگىزدىم.
بۇل شەشىم ءبىر ساعات بۇرىن قابىلداندى.
قالادا كارانتين 19 ناۋرىزدا تۇنگى ساعات 00.00-دە ەنگىزىلەدى.
الماتىداعى كارانتيننىڭ باستى ماقساتى: ينفەكتسيانىڭ تارالۋىن توقتاتۋ.
مىندەت – قالانىڭ سىرتقى پەريمەترىن قاتاڭ باقىلاۋعا الۋ جانە قالا ىشىندە قاتاڭ كارانتين رەجيمىن ەنگىزۋ ارقىلى ينفەكتسيانىڭ تارالۋ جولىن توقتاتۋ.
نەگىزگى شارالار:
- مەگاپوليستە ءوزىن-ءوزى وقشاۋلاۋ جانە ءۇي كارانتينى مەحانيزمدەرى ارقىلى ەپيدەمياعا قارسى اۋقىمدى ءىس-شارالاردى جۇرگىزۋ.
- كوشەلەردى, تروتۋارلاردى جۋ جانە دەزينفەكتسيالاۋ ارقىلى جۇقتىرۋ ورىندارىن بۇعاتتاۋ.
- قوعامدىق ورىنداردا, تۇرعىن ۇيلەردە سانيتارلىق-ەپيدەميولوگيالىق دەزينفەكتسيانى كۇشەيتۋ جانە ىرگەلەس اۋماقتاردى سانيتارلىق تازالاۋ.
- ازاماتتار مەن اۆتوكولىك قۇرالدارىنىڭ الماتى قالاسى اۋماعىنا كىرىپ-شىعۋىن شەكتەۋ.
- الماتى قالاسىنا كىرەبەرىستەردە 27 بلوك بەكەتتەرىن ورناتۋ.
- بلوك بەكەتتەرىندە پاترۋلدىك پوليتسيا پولكىنىڭ, سوبردىڭ, «گرانيت» پولكىنىڭ, قورعانىس مينيسترلىگى مەن ۇلتتىق گۆارديا بولىمشەلەرىنىڭ كۇشتەرى جۇمىلدىرىلادى.
- سونىمەن بىرگە, قالاعا ءبىرىنشى قاجەتتىلىكتەگى تاۋارلاردى, ازىق-ت ۇلىك ونىمدەرىن, ءدارى-دارمەكتەر مەن مەديتسينالىق ونىمدەردى, جەكە قورعانۋ جانە گيگيەنا قۇرالدارىن اكەلۋ ءۇشىن «جاسىل ءدالىز» جۇزەگە اسىرىلادى.
- كارانتين كەزەڭىندە:
- بالاباقشالاردىڭ;
- ازىق-ت ۇلىك ەمەس ساۋدا ورىندارىنىڭ;
- ازىق-ت ۇلىك ونىمدەرى مەن دارىلىك زاتتاردى ساتاتىن ورىنداردان باسقا, ءىرى ساۋدا ويىن-ساۋىق ورتالىقتارى مەن ساۋدا ۇيلەرىنىڭ جۇمىسى توقتاتىلادى.
- ءبىز تۇرعىندارعا الماتىلىقتاردىڭ كارانتين تالاپتارىن ءبىلۋى, قالادان ۋاقتىلى شىعۋى جانە كىرۋى ءۇشىن بۇقارالىق اقپارات قۇرالدارى, الەۋمەتتىك جەلىلەر جانە مەسسەندجەرلەر ارقىلى تولىق جانە جۇيەلى تۇردە اقپاراتتار بەرىپ وتىرامىز.
- كوروناۆيرۋسقا قارسى قالالىق شتاب تۋىنداعان ماسەلەلەردى جەدەل قاراپ, شۇعىل شارالار قابىلدايتىن بولادى.
الماتى اۋماعىندا شەكتەۋ, الدىن الۋ جانە ىندەتكە قارسى شارالاردىڭ تولىق تىزبەسى جاقىن ارادا قالا اكىمدىگىنىڭ بارلىق رەسمي اقپاراتتىق رەسۋرستارىندا جاريالانادى.
قۇرمەتتى الماتىلىقتار!
ءبىزدىڭ ارقايسىمىز ءۇشىن اسا جاۋاپتى ءسات تۋدى.
كارانتين رەجيمىنە وراي مەگاپوليستىڭ بۇكىل تىرشىلىگى جاڭا ەرەجەلەردىڭ تالاپتارىنا سايكەس قايتا قۇرىلادى.
كارانتين قولايسىزدىق تۋدىرىپ, ادەتتەگى قالىپتاسقان تىرشىلىك داعدىسىن بۇزۋعا ءماجبۇر ەتەدى.
بۇعان تۇسىنىستىكپەن قاراۋلارىڭىزدى سۇرايمىن.
كارانتين ءبىزدىڭ ورتاق قاۋىپسىزدىگىمىز, قالانىڭ, جاقىندارىمىزدىڭ قاۋىپسىزدىگى ءۇشىن ەنگىزىلەدى.
توتەنشە جاعدايدا ءاربىر قالا تۇرعىنىنىڭ سانالى ارەكەتى مەن قوعامدىق ءتارتىبى وتە ماڭىزدى.
ءبىزدىڭ ۇستامدىلىعىمىز بەن ىنتىماعىمىز, سەنىمدى ءىس-ارەكەتىمىز, ءوزارا جاناشىرلىعىمىز بەن توتەنشە جاعداي كەزىندەگى جاۋاپكەرشىلىگىمىز قالامىزدى قورعاپ قالادى.
ءبىز بىرگە جەڭەمىز.
الماتى
