كوروناۆيرۋستىڭ تارالۋىنا قارسى ارەكەت ەتۋ جونىندەگى شتاب الماتى قالاسىندا كوروناۆيرۋستىق ينفەكتسيانى جۇقتىرۋدىڭ 7 زەرتحانالىق-راستالعان جاعدايى تۋرالى قوسىمشا حابارلايدى.
التى ناۋقاس ەرەسەكتەرگە ارنالعان جۇقپالى اۋرۋلار اۋرۋحاناسىندا ەمدەلىپ جاتىر. الماتىعا گەرمانيادان اتا-اناسىمەن كەلگەن 2008 جىلى تۋىلعان قىز اۋە كەمەسىنىڭ بورتىنان بالالار جۇقپالى اۋرۋلار اۋرۋحاناسىنا جەكە بوكسقا جاتقىزىلدى. قازىرگى ۋاقىتتا قىزدىڭ جاعدايى قاناعاتتانارلىق. ايتا كەتۋ كەرەك, ەكيپاجدى قوسا العاندا, بورتتاعى 12 ادام اۋەجايدان وقشاۋلانىپ, تالداۋ الىندى.
كوروناۆيرۋس تىركەلگەن 7 ناۋقاستىڭ جاعدايى قاناعاتتانارلىق. بارلىق پاتسيەنتتەر بەكىتىلگەن حاتتاماعا سايكەس ەم الادى, ۆيرۋسقا قارسى جانە سيمپتوماتيكالىق تەراپيا ۋاقىتىندا باستالدى.
ناۋقاستارمەن بايلانىستا بولعان ازاماتتاردىڭ بارلىعى پروۆيزورلىق ستاتسيونارلارعا 14 كۇندىك كارانتينگە ورنالاستىرىلدى.
جالپى بۇگىنگى كۇنى الماتى قالاسىندا 676 ادام كارانتيندە جاتىر. الماتى قالاسىنىڭ اكىمدىگى بارلىق ازاماتتاردى, اسىرەسە, ءۇي كارانتينىندەگىلەردى وسى جاعدايدا ءوزىنىڭ جانە باسقالاردىڭ دەنساۋلىعى ءۇشىن بارىنشا جاۋاپكەرشىلىكپەن جانە تىلەكتەستىكپەن قاراپ, سانيتارلىق-گيگيەنالىق ەرەجەلەردى ۇستانۋعا, اۋرۋ بەلگىلەرى بايقالعان جاعدايدا ءوزىن-ءوزى وقشاۋلاۋعا شاقىرادى. ءۇي كارانتينىندە جاتقاندار وقشاۋلانۋ مەرزىمىنە شىداۋلارى كەرەك.
انىقتاما ءۇشىن تاۋلىك بويى 1406 ءنومىرى بويىنشا Call-ورتالىق جۇمىس ىستەيدى.
