ونلاين-كونفەرەنتسيادا بەلگىلى بولعانداي, تاعى 2 ادامدا كوروناۆيرۋس بار ەكەنى ايتىلدى. العاشقى ناۋقاس 1958 جىلى تۋعان, بۇرىن اۋرۋحاناعا جاتقىزىلعان ەر ادامنىڭ جۇبايى, ولار ماسكەۋدەن الماتىعا كەلگەن. ولار بۇعان دەيىن وقشاۋلانعان. تەكسەرىس ناتيجەسىندە كوروناۆيرۋس جۇقتىرعانى راستالدى.
ەكىنشى ناۋقاس 1995 جىلى تۋعان ەر ادام 13 ناۋرىزدا سەۋل–الماتى رەيسىمەن كەلدى. ول بورتتاعى بارلىق جولاۋشىلار سياقتى 14 كۇندىك كارانتينگە ارنالعان پروۆيزورلىق ستاتسيونارعا بىردەن وقشاۋلاندى.
ناۋقاستارمەن جاقىن بايلانىستا بولعان بارلىق ادام كارانتينگە ورنالاستىرىلدى.
بۇعان دەيىن حابارلانعانداي, گەرمانيادان كەلگەن ءۇش پاتسيەنت بار. ءتورتىنشىسى ماسكەۋ-الماتى رەيسىمەن كەلدى.
قازىرگى ۋاقىتتا 4 ناۋقاستىڭ جاعدايى قاناعاتتانارلىق, ەكەۋىندە دەرت اۋىرلىعى ورتاشا. ولاردىڭ بارلىعى بەكىتىلگەن حاتتاماعا سايكەس ەم الۋدا, دەر كەزىندە ۆيرۋسقا قارسى جانە سيمپتوماتيكالىق تەراپيا باستالدى.
قالانىڭ بارلىق مەديتسينالىق ۇيىمدارىنىڭ كوروناۆيرۋستى انىقتاۋ جانە ەمدەۋ ءۇشىن دارىلىك زاتتار مەن مەديتسينالىق ماقساتتاعى بۇيىمداردىڭ قاجەتتى قورلارى بار ەكەنىن اتاپ ءوتۋ قاجەت, مەديتسينا قىزمەتكەرلەرى قاتاڭ ساقتىق شارالارىن ساقتاپ وتىر.
