قازىرگى تاڭدا ەڭبەك تۇجىرىمداماسىنداعى باستى وزگەرىستەر رەتىندە كەلەسىلەر اتاپ ءوتىلدى: كورپوراتيۆتىك مادەنيەتتىڭ ترانسفورماتسياسى جانە جۇمىسشىلار قۇزىرەتتىلىگىنىڭ تۇبەگەيلى تۇردە وزگەرۋى; تاۋلىك ۋاقىتىنا نەمەسە كەڭىستىككە بايلانىستى ەمەس قارقىندى جۇمىس ورنىن قۇرۋ; كوماندالار مەن قىزمەتكەرلەردىڭ مۇمكىندىكتەرىن كەڭەيتۋ; ادام مەن ماشينا اراسىنداعى ىنتىماقتاستىققا كومەكتەسۋ.
ساراپشىلاردىڭ پىكىرىنشە, بولاشاقتا جۇمىستى ادام دا, ماشينا دا اتقاراتىن بولادى. تەحنولوگيالار ادام ەڭبەگىن اۆتوماتتاندىرىپ, قوسىمشا قۇندى بەرۋ ءۇشىن جاڭا مۇمكىندىكتەردى جاساي وتىرىپ, ونى تولىقتىرادى. IDC بولجامى بويىنشا 2024 جىلعا قاراي قۇرىلىمدالعان قايتالانبالى مىندەتتەردىڭ 50%-ى اۆتوماتتاندىرىلىپ, عىلىمدى قاجەتسىنەتىن مىندەتتەردى اتقاراتىن جۇمىسشىلاردىڭ 20%-دا «تسيفرلىك ارىپتەستەرى», ماسەلەن, جاساندى ينتەللەكت نەگىزىندەگى باعدارلامالىق جابدىقتاما نەمەسە باسقا دا تسيفرلىك تەحنولوگيا پايدا بولماق.
مايكروسوفت كومپانياسىنىڭ مالىمەتتەرى بويىنشا سەرىكتەستەردىڭ 81%-دان استامى كەلەسى ەكى جىلدا زاماناۋي جۇمىس ورىندارىنا ينۆەستيتسيا قۇيماق. باسشىلاردىڭ 83%-ى اقپاراتتىق تەحنولوگيالار ارقاسىندا جۇمىس ۇدەرىستەرى جاقسى جاققا وزگەرىپ جاتىر دەپ ەسەپتەيدى.
مايكروسوفت قازاقستان باس ديرەكتورى تيبور كولەياكتىڭ ايتۋىشا: «قازىرگى زامانعى جۇمىس ورنىندا قاشىقتىقتان جۇمىس جاساۋعا بولادى, قىزمەتكەرلەر زاماناۋي تەحنولوگيالار, ماسەلەن, بۇلتتىق شەشىمدەر نەمەسە بەينەبايلانىس قۇرالدارى ارقاسىندا كەز كەلگەن جەردەن جۇمىس جاساي الادى. جاڭا تەحنولوگيالار قىزمەتكەرلەردىڭ تيىمدىلىگىن كوتەرىپ قانا قويماي, سونىمەن بىرگە, ءوز جۇمىسىنان قاناعات الۋعا مۇمكىندىك بەرەدى. ماسەلەن, قىزمەتكەرلەر «work-life balance”اياسىندا قاشىقتىقتان جۇمىس جاساۋ مۇمكىندىگىن جوعارى باعالايدى. Global Workplace Analytics وتكىزگەن زەرتتەۋ ناتيجەلەرى كورسەتكەندەي, تەحنولوگيالار سالاسىندا قىزمەت ەتەتىن مامانداردىڭ 37%-ى ۇيدەن جۇمىس جاساۋ مۇمكىندىگىن الۋ ءۇشىن جالاقىنى 10%-عا دەيىن قىسقارتۋعا كەلىسەتىندىگىن ايتقان».
قازىرگى زامانعى جۇمىس ورنى قىزمەتكەرلەر مۇمكىندىگىن كەڭەيتۋدىڭ ىرگەتاسى بولىپ تابىلادى. كومپانيالار تسيفرلىك ترانسفورماتسيادان وتكەن سايىن, قىزمەتكەرلەرگە ءوز جۇمىسىن جاقسىراق اتقارىپ, ولاردى شابىتتاندىرىپ, جۇمىسقا ىنتالاندىراتىن جۇمىس ورنىنداعى بەتالىستاردى ەسكەرۋگە مۇمكىندىك بەرەتىن جۇمىس مادەنيەتىن قالىپتاستىرا باستادى. ياعني زامانۋي جۇمىس ورىندارىن قۇرۋ ءۇشىن قارجى قۇيىپ وتىرعان كومپانيالاردىڭ 5-10 جىلدان كەيىن دە ءوز بيزنەسىن جالعاستىرۋ ىقتيمالدىعى جوعارى.
جۇمىس ورنىنا ينۆەستيتسيا قۇيۋ ارقاسىندا جاڭا يننوۆاتسيالاردىڭ پايدا بولۋى ءۇشىن مۇمكىندىكتەر كەڭەيىپ, بۇل قىزمەتكەرلەردىڭ قۇزىرەتتىلىك دەڭگەيىنىڭ كوتەرىلۋىنە, تابىستىڭ ۇلعايۋىنا, ونىمدىلىك پەن تيىمدىلىكتىڭ ارتۋىنا جاعداي جاساپ, ەڭ باستىسى, شىعىنداردىڭ تومەندەۋىنە اكەلەدى.
قاشىقتىقتان جۇمىس جاساۋعا جاپپاي ءوتۋ قىزمەتكەرلەردى باسقارۋدىڭ ناتيجەگە باعىتتالعان جاڭا ادىستەرىن قولدانۋدى بىلدىرەدى. جاڭا جۇمىس جاساۋ ادىستەرىنە سايكەس كەلەتىن تەحنولوگيالىق شەشىمدەردى – اقپاراتقا قاۋىپسىز تۇردە قول جەتكىزۋگە, قاشىقتىقتان كەزدەسۋلەر وتكىزۋگە, قاشىقتىقتان جۇمىس جاسايتىن كوماندا ەڭبەگىن ۇيىمداستىرۋعا مۇمكىندىك بەرەتىن تەحنولوگيالاردى دايىنداۋ قاجەت.
الماتى
