س.اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتىنىڭ 90 جىلدىعىنا وراي ۇيىمداستىرىلعان شارا جاس عالىمداردىڭ عىلىمي الەۋەتىن ارتتىرۋدى كوزدەيدى.
پەدياتريا جانە بالالار حيرۋرگياسى عىلىمي ورتالىعى, «پەدياترلار وداعى» قوعامدىق بىرلەستىگى مەن س.اسفەندياروۆ اتىنداعى قازۇمۋ-دىڭ بالالار اۋرۋلارى كافەدراسىنىڭ ۇيىمداستىرۋىمەن وتكەن كونفەرەنتسياعا قىرعىزستان, ازەربايجان, وزبەكستان ەلدەرىنىڭ مەملەكەتتىك مەديتسينا ينستيتۋتتارىنىڭ جاس عالىمدارى, نۇر-سۇلتان, سەمەي, تۇركىستان, شىمكەنت, اقتوبە, الماتى قالالارىنىڭ مەديتسينالىق جوو دوكتورانتتارى مەن ماگيسترانتتارى, ا.سىزعانوۆ اتىنداعى ۇلتتىق عىلىمي حيرۋرگيا ورتالىعىنىڭ, اكۋشەرلىك, گينەكولوگيا جانە پەريناتولوگيا عىلىمي ورتالىعىنىڭ, قازاق كوز اۋرۋلارى عىلىمي زەرتتەۋ ينستيتۋتتارىنىڭ جاس ىزدەنۋشىلەرى قاتىستى.
ء«بىز بۇل شارانى جاستاردىڭ عىلىمي الەۋەتىن ارتتىرۋ ماقساتىندا ءۇش جىل قاتارىنان وتكىزىپ كەلەمىز. عىلىمي-زەرتتەۋ جۇمىستارى تاجىريبەمەن ۇشتاسۋى كەرەك. ەرتەڭگى مەديتسينا بۇگىنگى جاستاردىڭ قولىندا. كونفەرەنتسيا بالالار جاسىنداعى اۋرۋلاردى دياگنوستيكالاۋ, ەمدەۋ جانە الدىن الۋداعى نەگىزگى ماسەلەلەردى سارالاپ, دۇرىس جولدى ايقىنداۋعا مۇمكىندىك بەرەدى دەپ ۇمىتتەنەمىز. ءار دارىگەر قاي جەردە قىزمەت ىستەسە دە, ارقاشان ءوز جۇمىسىن ساراپتاپ, زەرتتەپ وتىرۋى كەرەك. بۇل جاڭا, ءتيىمدى, ەمدەۋ ادىستەرىن قولدانۋعا, تاڭداۋعا مۇمكىندىك بەرەدى. وسىدان ءۇش جىل بۇرىن وسى كونفەرەنتسياعا قاتىسقان جاس ىزدەنۋشىلەر – بۇگىندە ماگيسترانتتار مەن دوكتورانتتار. الداعى ۋاقىتتا ولاردىڭ عىلىمي-زەرتتەۋ جۇمىستارىمەن اينالىسامىز دەۋى كوڭىل قۋانتادى», دەيدى پەدياتريا جانە بالالار حيرۋرگياسى عىلىمي ورتالىعىنىڭ باسشىسى ريزا بورانباەۆا.
عىلىمي جوبالاردى پەدياتريا جانە حيرۋرگيا سالاسىنىڭ بىلىكتى ماماندارىنان قۇرالعان قازىلار القاسى سارالادى. كونفەرەنتسيا سوڭىندا ۇسىنىلعان جۇمىستار «ۇزدىك بايانداما», «ۇزدىك ماقالا», «ۇزدىك پوستەرلىك بايانداما» اتالىمدارى بويىنشا انىقتالىپ, ارنايى ديپلومدارمەن ماراپاتتالدى. ۇزدىك باياندامالار مەن عىلىمي ماقالالار پەدياتريا جانە بالالار حيرۋرگياسى عىلىمي ورتالىعىنا قاراستى «پەدياتريا جانە بالالار حيرۋرگياسى» عىلىمي جۋرنالىندا جاريالانادى.
الماتى
