مۇناي باعاسى ءتۇسىپ كەتكەننەن كەيىن KASE بيرجاسىنداعى ساۋدا-ساتتىق كولەمى 505 ميلليون دوللاردى قۇراعان.
اقش ۆاليۋتاسىنىڭ قۇنى دۇيسەنبىدەگى شارىقتاۋدان كەيىن وزگەرمەي تۇر. توسىن جاعدايعا بايلانىستى بيرجا باسشىسىنىڭ ورىنباسارى اندرەي تساليۋك پىكىر ءبىلدىردى.
ونىڭ سوزىنشە, ساۋدا-ساتتىق العاش اشىلعان ساتتە بيرجا كورسەتكىشى 6,5-تەن 7 پايىزعا دەيىن ءتۇسىپ كەتكەن. بىراق تۇستەن كەيىن نارىق قايتا قالپىنا كەلىپ, يندەكس كورسەتكىشى 4,77 پايىزعا جەتىپتى. سونداي-اق ۆاليۋتا نارىعىن رەتتەۋ ءۇشىن, قور بيرجاسىندا العاش رەت فرانكفۋرتتىق اۋكتسيون تەحنولوگياسى قولدانىلىپتى.
«جالپى جاسالعان كەلىسىمدەردىڭ كولەمى 300-320 ميلليون دوللاردان استى. بۇل كورسەتكىش فرانكفۋرتتىق اۋكتسيون ناتيجەسىندە قول جەتكىزىلگەن سوما. ياعني ءبىز ساۋداعا قويعان سۇرانىستىڭ بارلىعى قاناعاتتانارلىق ناتيجە كورسەتتى. جالپى ساۋدا-ساتتىق كولەمى 505 ميلليون دوللاردى قۇراپ وتىر. نارىقتا از دا بولسا تۇزەلۋ بايقالادى», – دەدى «قازاقستان قور بيرجاسى» اق باسقارما توراعاسىنىڭ ورىنباسارى اندرەي تساليۋك.
سونداي اق, 11 ناۋرىزداعى كورسەتكىش بويىنشا, بيرجادى جەكە تۇلعالاردىڭ ەسەپ شوتتارى ارتقان.
ورتالىق دەپوزيتوريدا 118 مىڭ 773 دەربەس شوت تىركەلگەن بولسا, ونىڭ 1141-ءى جاڭادان اشىلعان. بۇل وتكەن ايمەن سالىستىرعاندا جوعارى كورسەتكىش دەيدى كاسە باسشىلىعى.
