جيىندا شتاب توراعاسى ەرجان باباقۇماروۆ كوروناۆيرۋستىق ينفەكتسيا جاعدايلارى تىركەلگەن ەلدەردەن كەلگەن ادامداردىڭ ورنالاسقان كارانتيندىك ايماقتارىندا بولدى. كارانتيندەگى اۋرۋحانالارعا, پروۆيزورلىق كەشەندەرگە باردى.
№2 كوپسالالى مەديتسينا ورتالىعىنداعى جاعدايمەن تانىسقان ەرجان باباقۇماروۆ كارانتيندەگى جاندارمەن دە اڭگىمەلەستى. كلينيكاداعى احۋال, تاماقتانۋ راتسيونى سىندى ماسەلەلەر تالقىلانىپ, ساپالى مەديتسينالىق قىزمەت كورسەتۋدى قامتاماسىز ەتۋ ماسەلەلەرى جونىندەگى مەديتسينالىق قىزمەتكەرلەرمەن كەزدەسۋ وتكىزىلدى.
ءوز كەزەگىندە كارانتيندەگى ادامدار كارانتين بويىنشا پىكىرلەرىمەن ءبولىسىپ, جەرگىلىكتى بيلىك, دارىگەرلەر مەن مەديتسينا قىزمەتكەرلەرى تاراپىنان كورسەتىلەتىن شارالار ءۇشىن العىستارىن ءبىلدىردى.
ايتا كەتۋ كەرەك, №2 كوپسالالى مەديتسينالىق ورتالىعىنىڭ بازاسىندا كەلگەندەردى ورنالاستىرۋ ءۇشىن 4 بولىمشە ۇيىمداستىرىلعان. بارلىق ازاماتتار قاجەتتى مەديتسينالىق جابدىقتارمەن قامتاماسىز ەتىلگەن دايىن پالاتالارعا ورنالاستىرىلدى. ازاماتتار ءۇشىن بارلىق جاعداي جاسالعان.
كارانتيندەگىلەر تاۋلىك بويى مەديتسينالىق قىزمەتكەرلەردىڭ قاداعالاۋىندا بولادى. سونداي-اق ولار ءۇش ساعاتتىق تەرمومەتريادان دا وتۋدە. بارلىعىنىڭ مۇرىن جۇتقىنشاعىنان جاعىندىلار مەن كوروناۆيرۋسقا قان الىنىپ, عىلىمي ساراپتامالىق ورتالىققا جىبەرىلدى.
جەرگىلىكتى ورگاندار كارانتينگە جابىلعان ازاماتتاردىڭ تىلەكتەرىن ەسكەرىپ, ولارعا قاجەت بارلىق شارالاردى, ونىڭ ىشىندە جەكە گيگيەنالىق زاتتارمەن قامتاماسىز ەتىلۋىنە مۇمكىندىك بەرۋدە. سونداي-اق قوسىمشا كالوريالى تاماقپەن بىرگە كوكونىستەر, جەمىس جەۋگە جاعداي جاسالعان. ستاتسيونارعا كارانتينگە جاتقىزىلعان ازاماتتارعا تۋعان-تۋىستارىنان كەلەتىن قاجەتتى زاتتاردى بەرۋ ءۇشىن ارنايى پۋنكت تە ۇيىمداستىرىلدى.
ەستەرىڭىزگە سالا كەتەيىك, اتالعان ساناتتاعى تۇلعالار (ونىڭ ىشىندە وڭتۇستىك كورەيادان كەلگەندەر) باس مەملەكەتتىك سانيتارلىق دارىگەردىڭ قاۋلىسىنا سايكەس 14 كۇنگە مىندەتتى تۇردە ۇزدىكسىز كارانتينگە الىندى. كارانتين كەزىندە ستاتسيوناردان كەتۋگە رۇقسات ەتىلمەيدى. كارانتين اياقتالىسىمەن ستاتسيوناردان شىققان ازاماتتار تىركەلگەن جەرى بويىنشا 10 كۇن بويى تەلەفون ارقىلى مەدقىزمەتكەرلەردىڭ باقىلاۋىندا بولادى.
بۇعان دەيىن, 6 ناۋرىزدا, وڭىرلىك شتابتىڭ توراعاسى, الماتى قالاسى اكىمىنىڭ ورىنباسارى ەرجان باباقۇماروۆ جۇرتشىلىقپەن كەزدەسىپ, ەلىمىزدەگى ەڭ ءىرى ءبىر مەگاپوليسىنىڭ اۋماعىنا كوروناۆيرۋستى ينفەكتسيانىڭ تارالىپ كەتپەۋ ماسەلەلەرى تالقىلاندى. ونىڭ ۇستىنە قوعامدىق ۇيىمنىڭ وكىلى وڭتۇستىك كورەيادان (6 ناۋرىز) ۇشىپ كەلگەن رەيستىڭ جولاۋشىلارىن كۇتىپ الۋ كەزىندە جۇزەگە اسىرىلعان ساقتىق شارالارىنىڭ بارىسىن تەكسەردى.
انىقتاما: 5-6 ناۋرىزدا كورەيادان 2 رەيسپەن قازاقستاننىڭ 459 ازاماتى ۇشىپ كەلدى. بارلىق كەلۋشىلەر 14 كۇنگە الدىن الا دايىندالعان مەديتسينالىق ۇيىمدارعا كارانتينگە ورنالاستىرىلدى.
الماتىدا كوروناۆيرۋستىق ينفەكتسيا جاعدايلارى تىركەلگەن جوق. جاعداي بيلىكتىڭ باقىلاۋىندا.
الماتى
