بۇل ەستافەتا 2018 جىلعى 28 قىركۇيەكتە دۋشانبە قالاسىندا وتكەن تمد مەملەكەت باسشىلارى كەڭەسىنىڭ شەشىمىمەن بەكىتىلگەن ەدى. ەستافەتانىڭ نەگىزگى اتريبۋتى – 1941 جىلى الماتى قالاسىندا جاساقتالىپ, ماسكەۋدەن بەرلينگە دەيىن جەتكەن كەڭەس وداعىنىڭ باتىرى گەنەرال-مايور ي.ۆ. پانفيلوۆ اتىنداعى 8-گۆارديالىق موتواتقىشتار رەجيتسسكي, قىزىل تۋ لەنين وردەندى, سۋۆوروۆ وردەندى ديۆيزياسىنىڭ جاۋىنگەرلىك تۋىنىڭ كوشىرمەسى. ەستافەتانىڭ ماقساتى – ۇلى وتان سوعىسىندا وتانىن جانقيارلىقپەن قورعاعان قازاقستاندىق جاۋىنگەرلەردىڭ ەرلىگىنە قۇرمەت كورسەتۋ, ەسىمدەرىن ەل ەسىندە ساقتاۋ, مايدان دالاسىندا ەلى ءۇشىن قازا بولعان ءار سولداتتىڭ ەرلىگىنە باس يۋ; جاستاردىڭ, ىشكى ىستەر ورگاندارى قىزمەتكەرلەرى مەن ۇلتتىق ۇلان اسكەري قىزمەتشىلەردىڭ بويىنا وتانسۇيگىشتىك قۇندىلىقتاردى جانە قازاقستان حالقىنىڭ باتىرلىق تاريحىنا قۇرمەتپەن قاراۋ, قازاقستاندىق پاتريوتيزمگە تاربيەلەۋ,ءوز اسكەري بورىشتارىن ۇلگىلى اتقارۋعا ىقپال ەتۋ, - دەيدى قازاقستان رەسپۋبليكاسى ۇلتتىق ۇلانى «باتىس» وڭىرلىك قولباسشىلىعىنىڭ ءباسپاسوز قىزمەتىنىڭ جەتەكشىسى پودپولكوۆنيك ەربولات سۇلتانوۆ.
بۇعان دەيىن الماتى, قاسكەلەڭ, ۇزىناعاش, قاراكەمەر, تالدىقورعان, تاراز, شىمكەنت, تۇركىستان, قىزىلوردا, اتىراۋ, اقتاۋ جانە جاناوزەن قالالارىندا ورنالاسقان اسكەري بولىمدەردە بولعان جاۋىنگەرلىك تۋدى قارسى الۋ سالتاناتى ورال قالاسىنداعى جەڭىس الاڭىندا ءوتتى.
سالتاناتتى شاراعا باتىس قازاقستان وبلىسىنىڭ اكىمى عالي ەسقاليەۆ, «باتىس» وڭىرلىك قولباسشىلىعىنىڭ قولباسشىسى گەنەرال-مايور الىبەك سەراليەۆ, پوليتسيا, توتەنشە جاعدايلار, قىلمىستىق-اتقارۋ جۇيەسى دەپارتامەنتتەرى, ۇلتتىق ۇلاننىڭ وڭىرلىك قولباسشىلىقتارى, اسكەري بولىمدەر, ارداگەرلەر ۇيىمدارى, سونداي-اق ورتا مەكتەپ وقۋشىلارى مەن «جاس سارباز», «جاس بۇركىت» اسكەري-پاتريوتتىق كلۋبتارىنىڭ تاربيەلەنۋشىلەرى, ستۋدەنت جاستار, جەرگىلىكتى قوعامدىق ۇيىمداردىڭ وكىلدەرى قاتىستى.
- بيىل ءفاشيزمدى جەڭگەن ۇلى جەڭىسكە 75 جىل تولادى. ءبىز سول جەڭىمپازداردىڭ ۇل-قىزى, نەمەرە-شوبەرەسىمىز. ءبىز وسىنى ۇمىتپاۋىمىز كەرەك, - دەدى ءوڭىر باسشىسى عالي ەسقاليەۆ.
تۋ كوشىرمەسىن 5517 اسكەري ءبولىم كومانديرىنىڭ تاربيە جانە الەۋمەتتىك-قۇقىقتىق جۇمىس بويىنشا ورىنباسارى پودپولكوۆنيك باقىت الازوۆ قابىلداپ, ءسوز سويلەدى.
- بۇل ەستافەتانىڭ پاتريوتتىق ءمانى ۇلكەن – مايدان دالاسىندا وشپەس ەرلىك كورسەتكەن اتالارىمىزدىڭ ەرلىگىن ەسكە الا وتىرىپ رۋحىمىز وسەدى. وسىنداي ماڭىزدى شاراعا قاتىسقانىمىزعا قۋانىشتىمىز. جىل وتكەن سايىن سوعىس جاڭعىرىعى الىستاي تۇسسە دە ءبىز اتا-بابا ەرلىگىن ۇمىتپاۋىمىز كەرەك. بۇگىنگى شارا – وسىنىڭ ايعاعى, - دەدى باقىت الازوۆ.
بۇدان كەيىن ورال گارنيزونى اسكەري بولىمدەرى مەن پوليتسيا قىزمەتكەرلەرىنىڭ جەكە قۇرامىنان قۇرالعان 500 ادامدىق اسكەري توپ الاڭنان شەرۋ جاساپ ءوتتى.
رەسپۋبليكالىق ەستافەتا مۇشەلەرى ەكى كۇن بويى ورال قالاسىندا بولىپ, سوعىس ارداگەرلەرىنىڭ ۇيىنە بارادى. ءاربىر مايدانگەردىڭ ءۇيى الدىندا شاعىن اسكەري شەرۋ ءوتىپ, مايدان اندەرى شىرقالماق.
باتىس قازاقستان
