ادامداردىڭ جىلت ەتكەن جاقسىلىعىنا جانى قالماي قۋاناتىن كاسىپكەر قايىرعالي ارىستانعاليەۆ اياق استىنان حابارلاستى. قاشانعى اڭقىلداعان اق ەدىل كوڭىلىمەن وزىمسىنە اڭگىمەسىن باستاي جونەلدى. اڭگىمە اۋانىنان تاتارستاننىڭ استاناسى – قازان قالاسىندا وتكەن بۇكىلالەمدىك ۋنيۆەرسياداعا قاتىسىپ, بەلبەۋ كۇرەسىنەن كۇمىس ءجۇلدەمەن ورالعان بالۋان ديماش مولداشەۆتى تانىستىرماق نيەتتە ەكەنىن اڭعاردىم.
ادامداردىڭ جىلت ەتكەن جاقسىلىعىنا جانى قالماي قۋاناتىن كاسىپكەر قايىرعالي ارىستانعاليەۆ اياق استىنان حابارلاستى. قاشانعى اڭقىلداعان اق ەدىل كوڭىلىمەن وزىمسىنە اڭگىمەسىن باستاي جونەلدى. اڭگىمە اۋانىنان تاتارستاننىڭ استاناسى – قازان قالاسىندا وتكەن بۇكىلالەمدىك ۋنيۆەرسياداعا قاتىسىپ, بەلبەۋ كۇرەسىنەن كۇمىس ءجۇلدەمەن ورالعان بالۋان ديماش مولداشەۆتى تانىستىرماق نيەتتە ەكەنىن اڭعاردىم.ءوزىم دە ۋاقىت تاۋىپ جۇلدەگەر جەرلەسىمىزبەن جۇزدەسۋدى ويلاپ ءجۇر ەدىم. «ساباقتى ينە – ساتىمەن» دەگەندەي, ورايى كەلگەنىنە قۋانا كەلىستىم.
سپورت دەسە, ىشكەن اسىن جەرگە قوياتىن, ەلدىڭ نامىسىن كوتەرەتىن سپورتشىلاردى ۇدايى قولداپ جۇرەتىن كاسىپكەر جىگىت كوپ كۇتتىرمەي-اق, جۇزىنەن يماندىلىق لەبى ەسكەن بالۋانمەن كەزدەستىردى. ۇشەۋارا اڭگىمە جەلىسى بەلبەۋ كۇرەسىنەن سپورت شەبەرى ديماش مولداشەۆتىڭ سپورتتىق جولىنا اۋىستى.
– قازاقستاننان ۋنيۆەرسياداعا بارعان بەلبەۋ كۇرەسى شەبەرلەرى اراسىندا جالعىز كۇمىس مەدالعا يە بولعان جەرلەس جىگىتىمىزدىڭ مەرەيىن كوتەرۋ باسقا جاستاردىڭ سپورتقا كەلۋىنە ىقپال ەتەر ەدى, –دەگەندى قوسىپ قويدى قايىرعالي باۋىرىمىز.
ديماش قاراپايىم وتباسىندا تۋعان ەكەن. قارعالى اۋىلىندا تۇراتىن اكەسى ابۋعالي زەينەتكە شىققانشا جۇرگىزۋشى بولىپ ەڭبەك ەتىپتى. اناسى بالزيا ءالى كۇنگە پەرزەنتحانادا جۇمىس ىستەيدى. اكەسى ۇلىنىڭ سپورتپەن اينالىسۋىنا و باستان-اق قارسى بولماپتى. ديماش بەسىنشى كلاستا وقىپ جۇرگەندە قارعالى بالالار جانە جاسوسپىرىمدەر سپورت مەكتەبىندە گرەك-ريم كۇرەسى ۇيىرمەسىنە قاتىستى. العاشقى جاتتىقتىرۋشىسى ءالىبي بالبوسىنوۆقا جىگەرلى, ەڭبەكقور بالا بىردەن ۇنادى. مەكتەپىشىلىك بىرىنشىلىكتەردە كوزگە ءتۇسىپ, جاسوسپىرىمدەر اراسىنداعى وبلىستىق جارىستارعا قاتىسا باستادى. كەيىن جوعارى وقۋ ورنىنا ءتۇسىپ, ونى بىتىرگەننەن كەيىن بايلانىس سالاسىنا جۇمىسقا ورنالاستى. سوندا دا جاتتىعۋدى تاستاعان جوق. ءسويتىپ جۇرگەندە, دوستارى اقتوبە قالاسىندا بەلبەۋ كۇرەسىنەن جاس بالۋانداردى باۋليتىن جاتتىقتىرۋشى ساندىبەك احەتوۆپەن تانىستىرادى.
– ول بىردە ماعان جارىسقا قاتىسۋعا ۇسىنىس جاسادى. بۇل بەلبەۋ كۇرەسىمەن تۇبەگەيلى اينالىسۋىمنىڭ باسپالداعى بولدى دەسەم ارتىق ايتقاندىق بولماس, دەيدى ديماش مولداشەۆ.
بوس ۋاقىتىن جاتتىعۋعا ارنايتىن جاس بالۋاننىڭ بەلبەۋ كۇرەسىندە جەتكەن جەتىستىكتەرى از ەمەس. 2009 جىلى ەل بىرىنشىلىگىندە – ءۇشىنشى, ال كەلەسى جىلى ءبىرىنشى ورىندى يەلەنسە, 2011 جىلى قازاقستان كۋبوگىندا ءۇشىنشى ورىندى قاناعات تۇتتى. 2010 جىلى الەم بىرىنشىلىگىندە بەسىنشى ورىنعا تابان تىرەپ, جۇلدەگە تاياۋ قالعان, 2011 جىلى بىشكەكتە وتكەن الەم چەمپيوناتىندا جولى بولمادى. بيىل ورىنبور وبلىسىندا وتكەن بۇكىلرەسەيلىك حالىقارالىق تۋرنيردە جاسىنداي جارقىراي كورىنىپ, جەڭىمپاز بولدى.
– مەنى ۋنيۆەرسياداعا باراتىن بەلبەۋ كۇرەسى بالۋاندارى قۇراما كومانداسىنىڭ باس جاتتىقتىرۋشىسى ەربول مىرزابوسىنوۆ استانادا وتكەن ىرىكتەۋگە ارنايى شاقىردى. باعىمدى سىناپ كورمەك بولىپ, شاقىرۋدى قۇپ الدىم. جاتتىقتىرۋشىلاردىڭ ۇيعارىمىمەن ەلىمىزدىڭ ۋنيۆەرسيتەت قۇراما كومانداسىنا ەنگىزىلدىم. ۋنيۆەرسياداعا مەنى العاشقى جاتتىقتىرۋشىم ءالىبي بالبوسىنوۆ ءوزى جەكە دايىندادى. جاتتىقتىرۋشىمنىڭ ەڭبەگىن, بالۋان رەتىندە سەنىم ارتقان جەرلەستەرىمنىڭ ۇكىلى ءۇمىتىن اقتاعانىمدى ماقتانىش تۇتامىن.
ول قالا ماڭىنداعى قارعالى اۋىلىندا تۇرادى, بايلانىس ينجەنەرى بولىپ ەڭبەك ەتەدى. ول ۋنيۆەرسيادادان كەلگەندە, قۇشاق جايا قارسى العان اۋىلداستارىنا, تۋىسقاندارىنا جانە وبلىستىق سپورت باسقارماسىنىڭ وكىلدەرىنە ءدان ريزا. الدا بەلبەۋ كۇرەسىنەن الەم بىرىنشىلىگى وتەدى. ناعىز سپورتشى ارقانى كەڭگە سالمايتىنى بەلگىلى. الەمدىك دەڭگەيدەگى جەڭىستىڭ ءدامىن تاتقانداردا بوس ۋاقىت بولمايتىنى انىق. بەلبەۋ كۇرەسىنەن سپورت شەبەرى ديماش مولداشەۆ تا بوز كىلەمدەگى كۇندەلىكتى جاتتىعۋلارىن باستاپ كەتىپتى. ول جەڭىس بيىكتەرىن باعىندىرۋ ءۇشىن بوساڭسۋعا بولمايتىنىن تۇسىنەدى. سوندىقتان دا بوس ۋاقىتىن بوز كىلەمدە ءادىس-تاسىلدەردى شيراتۋعا ارنايتىن ول بۇل جولى دا ءوزى جاتتىعاتىن قارعالى بالالار مەن جاسوسپىرىمدەر سپورت مەكتەبىنىڭ جاتتىعۋ زالىنا اسىعۋلى ەكەنىن اڭعارتتى. ءبىز جاس بالۋانعا الدا دا ساتتىلىكتەر تىلەپ قوشتاستىق.
ساتىب
