جىگىتتەر ماشينالارى تۇرىپ قالعان سوڭ سىرتقا شىعىپ, قاتىپ قالعان كۇرتىك قارعا تىزەلەرىنە دەيىن كىرىپ كەتەدى. ءبىراز ۋاقىت قارمەن الىسقاننان تۇك شىقپاعان سوڭ ولار «112» ارناسىنا قوڭىراۋ شالادى.
حابارلامانى العان وبلىستىق پوليتسيا دەپارتامەنتى پاترۋلدىك پوليتسياسىنىڭ قىزمەتكەرلەرى جانبولات ناعۇمانوۆ پەن ديدار دۇيسەلەكوۆ شۇعىل كومەككە ۇمتىلادى. قۇتقارۋ وپەراتسياسىنا لومونوسوۆ اۋىلدىق وكرۋگىنىڭ ۋچاسكەلىك پوليتسيا ينسپەكتورى, پوليتسيا كاپيتانى ازامات سىزدىقوۆ تا قوسىلادى. ءبىر جارىم ساعات بويى قالىڭ كۇرتىك جولمەن ءجۇرىپ كەلە جاتقان پوليتسەيلەر ەكى وبلىس شەكاراسىندا الاۋدى كورەدى. دىردەكتەپ توڭعان جىگىتتەر زاپاستاعى دوڭگەلەكتى جاعىپ جىلىنعان ەكەن. «پاترۋلدىك اۆتوكولىكپەن «لادانى» شىعارۋ مۇمكىن ەمەس», - دەيدى پاترۋلدىك پوليتسيا باتالونى كومانديرىنىڭ ورىنباسارى, پوليتسيا كاپيتانى ءۋاليحان ورازالين. – «سوندىقتان ساقشىلار جاقىن ماڭداعى «درۋجبا» جاۋاپكەرشىلىگى شەكتەۋلى سەرىكتەستىگىنە جۇگىندى. الايدا كومەككە كەلگەن «ۋاز» كولىگى دە «لادانى» سۇيرەپ تارتپاق بولعان كەزدە ءوزى قالىڭ قاردان شىعا الماي قالادى. ەندى جشس ديرەكتورى قابيدەن ۇسەنوۆ كومەككە «John Dir» تراكتورىن جىبەرەدى, ناتيجەسىندە ەكى اۆتوكولىك تە جولعا شىعارىلدى».
ءسويتىپ, تۇركىستاندىق جىگىتتەردىڭ سولتۇستىك وڭىردەگى جولى ءبىر تاۋلىككە جاقىن ۋاقىتقا سوزىلدى. پاترۋلدىك پوليتسەيلەر ولاردى توقسان بي اۋىلىنا دەيىن جەتكىزىپ سالعان كەزدە دۇيسەنبىنىڭ تاڭى اتقان ەدى. ساقشىلار جىگىتتەرگە جول كورسەتىپ, وزدەرى كەرى ورالادى. ماقسات پەن ەركەبۇلان ولارعا كوكشەتاۋ وڭىرىندەگى رۋزاەۆكا سەلوسىنان حابارلاسىپ, العىستارىن تاعى ءبىر مارتە ايتتى.
جەكسەنبى كۇنى تاعى ءبىر جۇرگىزۋشى, قوستاناي قالاسىنىڭ تۋماسى بوريس ابروسيموۆ تا پوليتسيا قىزمەتكەرلەرىنىڭ جۇمىسىنا ريزاشىلىعىن بىلدىرەدى. «نۇر-سۇلتان-پەتروپاۆل» تاس جولىنىڭ 341 شاقىرىمىندا ونىڭ «Mercedes» جۇك كولىگىنەن اقاۋ شىققان. پاترۋلدىك پوليتسيا باتالونىنىڭ قىزمەتكەرلەرى, پوليتسيا كىشى لەيتەنانتتارى دميتري كراۆچەنكو مەن اسحات كاماليەۆ سول ماڭنان ءوتىپ بارا جاتقان. ولار جۇرگىزۋشىنى كورىپ, ءجون سۇراسىپ, ونى جاقىن جەردەگى قوسالقى بولشەكتەر ساتاتىن دۇكەنگە اپارىپ, كولىكتى جوندەۋگە كومەكتەستى. «558 ءنومىرلى «لادا ۆەستا» ەكيپاجىنا ەرەكشە ريزامىن. ادامگەرشىلىگى مول وسىنداي قىزمەتكەرلەر كوپ بولسىن», - دەيدى بوريس اركادەۆيچ جىبەرگەن اۋديوحابارلاماسىندا.
سولتۇستىك قازاقستان وبلىسى
