بيىلعى ماۋسىمدى جاڭا باس باپكەرمەن باستاعان «استانا» كلۋبى ادەتىنەن جاڭىلماي, جىلدى جەڭىسپەن باستادى. ولاي دەۋگە نەگىزگى سەبەپ, ەلوردا كومانداسى وسىمەن ءۇشىنشى جىل قاتارىنان سۋپەركۋبوك باسەكەسىندە ەشكىمگە دەس بەرمەي كەلەدى. قوستانايدا وتكەن ماتچتا ۇلتتىق قۇراما مەن «استانا» تىزگىنىن قولىنا العان چەح ميحال بيلەكتىڭ شاكىرتتەرى «قايسار» كومانداسىن 1:0 ەسەبىمەن جەڭىپ كەتتى. ويىنداعى جالعىز گولدى ماتچتىڭ 40-مينۋتىندا «استانا» كومانداسىنا ماۋسىم ارالىق ۇزىلىستە قوسىلعان كيپرلىك پيەروس سوتيريۋ سوقتى. «قايسار» فۋتبولشىلارى ەكىنشى تايمدا ەسەپتى تەڭەستىرۋگە قانشا ۇمتىلعانىمەن, بۇل ويىندا ولارعا گول سوعۋ باقىتى بۇيىرماعان ەكەن.
وسىلايشا, ەلوردا كومانداسى قازاقستان تاريحىندا ەل سۋپەركۋبوگىن قاتارىنان ءۇشىنشى, جالپى بەسىنشى رەت يەلەنگەن جالعىز كوماندا اتاندى. «استانا» بۇعان دەيىن 2011, 2015, 2018 جانە 2019 جىلدارى توپ جارعان بولاتىن. وتكەن ماۋسىمدا «استانا» ەل چەمپيونى اتانسا, «قايسار» قازاقستان كۋبوگىن يەلەنگەن-ءدى.
