قازاقستان • 28 اقپان، 2020

500 ميلليون دوللارلىق مەملەكەتتىك وبليگاتسيالاردى ورنالاستىرادى

26 رەتكورسەتىلدى

اپتا باسىنان بەرى قازاقستاندىق باسىلىمداردا  قارجى مينيسترلىگى رەسەي بيرجاسىندا 500 ميلليون دوللارلىق مەملەكەتتىك وبليگاتسيالاردى ورنالاستىرۋ تۋرالى شەشىمى قىزۋ تالقىعا ءتۇسىپ جاتىر.

مينيستر ءاليحان سمايىلوۆتىڭ ايتۋىنشا، الداعى ەكى-ءۇش ايدا بۇل ءۇردىس اياقتالادى.  بىراق ونىڭ قانداي شارتپەن ورنالاستىراتىنى جونىندە حابارلانبادى.

ماماندار بۇل جولى رەسەي تاراپى قازاقستاندىق وبليگاتسيالاردىڭ سۇرانىسقا يە بولاتىنىنا سەنىمدى.  «استانا ينۆەست» ينۆەستيتسيالىق-ساراپتاما ورتالىعىنىڭ ءبولىم باسشىسى سەرىك قوزىباەۆ بۇل جولعى سۇرانىس  مەملەكەتتىك وبليگاتسيالاردىڭ قانداي شارتپەن ورنالاستىرعاندىعىنا بايلانىستى ەكەنىن ايتادى.  سونىمەن بىرگە بۇل جولعى تاڭداۋدىڭ نەگە رەسەيگە ءتۇسىپ وتىرعانىن دا ءتۇسىندىرىپ ءوتتى.

قارجى ءمينيسترى  ءا.سمايلوۆتىڭ تۇسىندىرۋىنشە، رەسەي نارىعىنا شىعۋدىڭ پايىزدىق مولشەرلەمەسى بارىنشا ءتيىمدى. 

«فينام» ساراپتامالىق ورتالىعىنىڭ وكىلى  الەكسەي كوۆالەۆ تە قارجى مينيسترلىگىنىڭ شەشىمىنە دۇرىس دەپ باعا بەرىپ وتىر.   

«مەنىڭ تۇسىنۋىمشە، ءبىز 500 ميلليون اقش دوللارىنىڭ بالاماسى تۋرالى ايتىپ وتىرمىز، ياعني شىعارىلىم ۆاليۋتاسى رەتىندە رەسەي ءرۋبلى تاڭدالادى. تۇتاستاي العاندا، ورنالاستىرۋدىڭ العىشارتتارى ايقىن، نارىقتاعى باعالى قاعازداردىڭ ۇسىنىلعان كىرىستىلىگى مەن وتىمدىلىگى ماڭىزدى بولادى. ال ونىڭ مولشەرىنە قاتىستى رەسەي قارجى مينيسترلىگى قازاقستاندىق وبليگاتسيانى اۋكتسيونداردا ءۇش-ءتورت ەسە كوپ ساتادى دەدى ول.

Centras Securities ساراپشىسى ايدىن ناۋرىزباەۆ قولدانىستاعى جەرگىلىكتى  قارجى قۇرالدارىنان  گورى باعالى قاعازدار ينۆەستورلار اراسىندا قىزىعۋشىلىق تۋدىرۋى مۇمكىن ەكەنىن اتاپ ءوتتى. مىسالى، ونىڭ قايتارىمى قازاقستان جاعى ءۇشىن 8 پايىزدان جوعارى بولۋى ابدەن مۇمكىن.

بۇعان دەيىن Fitch قازاقستاننىڭ بولجامدى وبليگاتسيالارىنا BBB (EXP) رەيتينگىنە توقتادى.  سونداي-اق وسىعان دەيىن ءبىزدىڭ ەل    قۇنى 1،1 ميلليارد ەۋروعا ەۋرووبليگاتسيالاردى ورنالاستىرعان.

Fitch ساراپتامالىق اگەنتتىگى دە قارجى مينيسترلىگىنىڭ شەشىمىن دۇرىس دەپ وتىر. اگەنتتىكتىڭ حابارلاۋىنشا، قورىتىندى رەيتينگ تۇپكىلىكتى قۇجاتتاما تاپسىرىلعاننان كەيىن بەلگىلى بولادى.

ءبىزدىڭ گازەت وسىعان دەيىن  قازاقستان لوندون قور بيرجاسىندا جانە AIX-تە 1،1 ملرد ەۋروعا ەۋرووبليگاتسيالاردى ورنالاستىرۋدى جوسپارلاپ وتىرعانىن جازعان. ساراپشىلار الداعى ورنالاستىرۋدى جوعارى باعالادى.  بۇگىنگە دەيىن قازاقستان  1،1 ملرد ەۋروعا ەۋرووبليگاتسيالاردىڭ ەكى ترانشىن ورنالاستىردى.

Cbonds مالىمەتتەرى بويىنشا جەتى جىلدىق وبليگاتسيالاردىڭ كولەمى 500 ميلليون ەۋرونى، ال 15 جىلدىق وبليگاتسيالار 650 ميلليون ەۋرونى (بارلىعى - 1،15 ميلليارد ەۆرو) قۇرادى.

ولاردىڭ تابىستىلىعى  0،6% جانە 1،5% قۇرايدى.

سوڭعى جاڭالىقتار

ۇقساس جاڭالىقتار