ۇكىمەت • 28 اقپان، 2020

قازاقستان-پاكىستان ۇكىمەتارالىق كوميسسياسىنىڭ 9-وتىرىسى ءوتتى

13 رەتكورسەتىلدى

پاكىستان استاناسىندا ساۋدا-ەكونوميكالىق، عىلىمي-تەحنيكالىق جانە مادەني ىنتىماقتاستىق جونىندەگى قازاقستان-پاكىستان ۇكىمەتارالىق كوميسسياسىنىڭ 9-وتىرىسى ءوتتى. قازاقستان تاراپىنان تەڭ توراعا رەتىندە سىرتقى ىستەر ءمينيسترىنىڭ ءبىرىنشى ورىنباسارى شاحرات نۇرىشەۆ بولادى، ال پاكىستان تاراپىنان - سىرتقى ىستەر ءمينيسترىنىڭ ءبىرىنشى ورىنباسارى سوحەيل ماحمۋد. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتى حابارلادى.

قازاقستاندىق دەلەگاتسيا قۇرامىنا سىرتقى ىستەر، ساۋدا جانە ينتەگراتسيا، دەنساۋلىق ساقتاۋ، اۋىل شارۋاشىلىعى، ساۋدا جانە ينتەگراتسيا، يندۋستريا جانە ينفراقۇرىلىمدىق دامۋ، ەنەرگەتيكا، مادەنيەت جانە سپورت مينيسترلىكتەرىنىڭ، سونداي-اق، «KazakhInvest»  ۇك» اق،  «سامۇرىق ەنەرگو» اق وكىلدەرى كىردى.

كەلىسسوزدەر باراسىندا تاراپتار ەكى ەلدىڭ ءوزارا مۇددەلەرىن ەسكەرە وتىرىپ، قازاقستان-پاكىستان ىنتىماقتاستىعىنىڭ اعىمداعى جاعدايى مەن ونىڭ دامۋ بولاشاعىن ەگجەي-تەگجەيلى تالقىلادى. 

كوميسسيانىڭ تەڭ توراعالارى قازاقستان مەن پاكىستاننىڭ ساۋدا-ەكونوميكالىق قارىم-قاتىناستارى ديناميكاسىنىڭ ەكى ەل قاتىناستارىنداعى ىسكە اسىرىلماعان جوعارى ەكونوميكالىق الەۋەتىنە قاراماستان تومەندەگەنىن اتاپ ءوتتى. كوميسسيا وتىرىسىنا قاتىسۋشىلار كەڭ اۋقىمدى باعىتتار بويىنشا ءوزارا ءتيىمدى كووپەراتسيانى بەلسەندى ارتتىرۋ قاجەتتىگى تۋرالى مالىمدەدى.

كوميسسيانىڭ جۇمىس توپتارىنىڭ وتىرىسىنا قاتىسۋشىلار تاراپتاردىڭ ءوتىنىش بىلدىرگەن مۇددەلەرى نەگىزىندە ەكىجاقتى ىنتىماقتاستىقتى ارتتىرۋ ءۇشىن ساۋدا، ينۆەستيتسيا، كولىك، ەنەرگەتيكا، اۋىل شارۋاشىلىعى، دەنساۋلىق ساقتاۋ، فارماتسەۆتيكا، تۋريزم، عىلىم، ءبىلىم بەرۋ جانە ت.ب. سەكىلدى باسىم سالالاردى انىقتادى. 

كوميسسيا جۇمىسىنىڭ قورىتىندىسى بويىنشا قازاقستان مەن پاكىستان اراسىنداعى ساۋدا-ەكونوميكالىق، تەحنيكالىق جانە گۋمانيتارلىق ىنتىماقتاستىقتى ودان ءارى دامىتۋ بويىنشا پراكتيكالىق شارالاردى قامتيتىن قورىتىندى حاتتاما قابىلداندى. قازاقستان-پاكىستان ۇكىمەتارالىق كوميسسياسىنىڭ كەزەكتى وتىرىسىن نۇر-سۇلتان قالاسىندا وتكىزۋى جوسپارلانۋدا.

سونداي-اق يسلامابادقا ساپارى بارىسىندا قازاقستان رەسپۋبليكاسىنىڭ ءسىم دەلەگاتسياسى قازاقستاننىڭ پارلامەنتتىك دوستار توبىنىڭ اتىنان پاكىستان ۇلتتىق اسسامبلەياسىنىڭ دەپۋتاتتارىمەن كەزدەستى. 

كەزدەسۋ بارىسىندا ش.نۇرىشەۆ پير حالىق اسسامبلەياسىنىڭ باسشىلىعىن 2019 جىلعى 23-24 قىركۇيەك ارالىعىندا ەلىمىزدىڭ استاناسىندا وتكەن «ۇلكەن ەۋرازيا: ديالوگ. سەنىم. سەرىكتەستىك» تاقىرىبى بويىنشا ەۋرازيا ەلدەرى پارلامەنتتەرى سپيكەرلەرىنىڭ IV كەڭەسىنە بەلسەندى قاتىسقانى ءۇشىن العىسىن ءبىلدىردى. 

تاراپتاردىڭ ەكى ەلدىڭ ءوزارا ءىس-قيمىلىنىڭ پەرسپەكتيۆالارى جانە ۇكىمەتارالىق كوميسسيا شەڭبەرىندە قابىلدانىپ جاتقان ەكىجاقتى كۇش-جىگەرى تۋرالى پىكىر الماسۋ بارىسىندا پاكىستان پارلامەنتشىلەرى قازاقستان-پاكىستان قارىم-قاتىناستارىنىڭ بارلىق سپەكترىن جانداندىرۋ بويىنشا ۇسىنىلعان شارالاردى قولدادى.

سوڭعى جاڭالىقتار

ۇقساس جاڭالىقتار