پارلامەنت • 28 اقپان، 2020

داريعا نازارباەۆا: اۋىل – ءبىزدىڭ ۇلتتىق بولمىسىمىز

43 رەتكورسەتىلدى

سەناتتا اگروونەركاسىپ كەشەنى ماسەلەلەرىنە ارنالعان پارلامەنتتىك تىڭداۋ ءوتىپ جاتىر. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.

شارا اياسىندا اۋىلشارۋاشىلىعى تاۋارىن وندىرۋشىلەردىڭ كورمەسى ۇيىمداستىرىلدى. سەنات باسشىسى داريعا نازارباەۆا اۋىل شارۋاشىلىعىنداعى ءتۇرلى سالا ونىمدەرى مەن اگرارلىق عىلىمنىڭ جانە «قازاگرو» ۇلتتىق باسقارۋشى حولدينگى دامۋ ينستيتۋتتارىنىڭ جەتىستىكتەرىمەن تانىستى.

كورمە بارىسىندا سەنات دەپۋتاتتارىنا بىرىڭعاي بىرىكتىرۋشى ورتالىقتىڭ قىزمەتى تانىستىرىلدى. ورتالىق تمد بويىنشا جانۋارلاردىڭ ۆەتەرينارلىق ەرەكشەلىگىن سايكەستەندىرۋدى بەلگىلەۋگە ارنالعان قۇرالدار مەن بۇيىمدار وندىرەتىن جالعىز ۇيىم بولىپ تابىلادى. سونىمەن قاتار تۇيە ەتىنەن ونىمدەر مەن كونسەرۆىلەر جاسايتىن كىشى زاۋىت جۇمىسى كورسەتىلدى. جوبا عىلىمي-تەحنيكالىق قىزمەت ناتيجەسىن كوممەرتسيالاندىرۋ بايقاۋىنىڭ جەڭىمپازى بولىپ تابىلادى.

اگرارلىق ماسەلەلەر، تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ توراعاسى ءالي بەكتاەۆ وتىرىستى اشا كەلىپ، پارلامەنتتىك تىڭداۋدىڭ تاقىرىبى ەل ەكونوميكاسىنداعى پروبلەماسى اسا كوپ، حالىقتىڭ تاراپىنان ءجيى سىنعا ۇشىراپ جۇرگەن، بىراق وتە ماڭىزدى، مەملەكەتىمىزدىڭ ۇلتتىق قاۋىپسىزدىگىنە تىكەلەي قاتىسى بار سالا – اگرارلىق سەكتورعا ارنالىپ وتىرعانىن ايتتى. «پالاتا توراعاسى داريعا نازارباەۆانىڭ باستاماسى بويىنشا سەناتتا ەلىمىزدەگى 60-تان استام اۋىل شارۋاشىلىعى اگرارلىق قوعامدىق ۇيىمدار مەن وداقتاردىڭ، اۋىل شارۋاشىلىعى تاۋار وندىرۋشىلەرىنىڭ وكىلدەرىمەن، وسى سالاعا قاتىسى بار مەملەكەتتىك ورگاندار مەن مەكەمەلەر باسشىلارىنىڭ قاتىسۋىمەن 12 ارنايى كەزدەسۋ ءوتتى. كەزدەسۋلەردە 200-گە جۋىق  ۇسىنىستار ايتىلدى»، - دەدى ءا.بەكتاەۆ.

داريعا نازارباەۆا ءسوز باسىندا اۋىل – ءبىزدىڭ ۇلتتىق بولمىسىمىزدىڭ بەسىگى ەكەنىن اتاپ ءوتتى. «قازاقتىڭ ءتۇپ-تامىرى اۋىلدا جاتىر، اۋىل وتانشىلدىقتىڭ قاينار كوزى جانە بايىرعى داستۇرلەردىڭ بۇلاعى. سوندىقتان اۋىلدى دامىتۋ ماسەلەلەرى ارقايسىمىزعا وتە جاقىن جانە تۇسىنىكتى. بۇل اۋىلدىق جەرلەردە تۇراتىن 42 پايىز قازاقستاندىقتارعا عانا ەمەس، بارشا قازاقستان حالقىنا قاتىستى ۇلكەن ماسەلە. بۇگىنگى تاڭدا جالپى تابىستىڭ وسۋىنە قاراماستان، اۋىل تۇرعىندارىنىڭ جاعدايى جاقسى ەمەس ەكەنى تۋرالى پىكىر ءبىلدىرىپ ەشكىمدى تاڭعالدىرا المايمىز. مۇمكىن ەلىمىزدە اۋىلشارۋاشىلىعى ونەركاسىپ رەتىندە وسىعان بايلانىستى توقتاپ تۇرعان شىعار؟»، - دەدى ول.

داريعا نازارباەۆا ءوز سوزىندە اۋىل شارۋاشىلىعى – قازاقستان ەكونوميكاسىنىڭ نەگىزگى سالاسى ەكەنىن اتاپ ءوتتى. «حالقىمىز تۋعان جەرگە ەرەكشە قۇرمەتپەن قاراپ كەلسە دە، نەگە اۋىل شارۋاشىلىعى كوپ جىلدار بويى ەكونوميكانىڭ پروبلەمالى سالاسىنىڭ ءبىرى بولىپ كەلەدى. ساندىق جانە پايىزدىق كورسەتكىشتەردىڭ ءوسىپ جاتقانىنا قاراماستان، ءبىز كەيىنگى 10 جىل ارالىعىندا سالانىڭ توقىراۋعا ۇشىراعانىن كورىپ وتىرمىز. اۋىل شارۋاشىلىعىنىڭ جالپى ىشكى ونىمدەگى ۇلەسى 10 جىل ىشىندە 5 پايىزدان اسقان جوق، ال سوڭعى جىلدارى تۇراقتى تۇردە تومەندەپ كەلەدى»، - دەدى سەنات توراعاسى.

د.نازارباەۆا سونىمەن قاتار اگرارلىق سەكتوردى تۇراقتى تۇردە جۇيەسىز رەفورمالاۋ جىلدارى اۋىل شارۋاشىلىعىن داعدارىسقا الىپ كەلگەنىن ايتتى. «كوبىنە كەستەلەر مەن سانداردىڭ ارتىندا ادامداردىڭ ناقتى پروبلەمالارى تۇرعانىن كورە بەرمەيمىز. ءبىز سالانىڭ الەۋمەتتىك ولشەمىنە نازار اۋدارۋىمىز كەرەك»، - دەدى پالاتا باسشىسى. سونداي-اق اۋىل حالقىنا ينفراقۇرىلىم وبەكتىلەرى قول جەتىمسىز بولعاندىقتان ولاردىڭ ءومىر ءسۇرۋ ساپاسى تومەندەگەنى جانە ونداي جاعدايدا تۇرعىنداردىڭ الەۋمەتتىك كوڭىل-كۇيى  قاناعاتتانارلىق بولمايتىنى ءارى تۋعان اۋىلىندا تۇرۋعا دەگەن ىقىلاس ازاياتىنى ايتىلدى.

پارلامەنتتىك تىڭداۋدا اۋىل شارۋاشىلىعى ءمينيسترى ساپارحان وماروۆ، «اتامەكەن» ۇلتتىق كاسىپكەرلەر پالاتاسىنىڭ توراعاسى ابىلاي مىرزاحمەتوۆ، بۇۇ ازىق-ت ۇلىك جانە اۋىل شارۋاشىلىعى ۇيىمىنىڭ (فاو) قازاقستانداعى بايلانىس جانە ارىپتەستىك جونىندەگى بيۋرو باسشىسى قايرات ناجىمەدەنوۆ جانە تاعى باسقالار بايانداما جاسايتىن بولادى.

اگروونەركاسىپ كەشەنى سالاسىنداعى ماڭىزدى ماسەلەلەردى تالقىلاۋعا دەپۋتاتتاردان باسقا بىرنەشە ايماق باسشىلارى، قوعامدىق بىرلەستىكتەر مەن اۋىل شارۋاشىلىعى كاسىپورىندارىنىڭ وكىلدەرى قاتىسۋدا.

پارلامەنتتىك تىڭداۋدىڭ قورىتىندىسى بويىنشا ۇسىنىستار ازىرلەنىپ ۇكىمەتكە جىبەرىلەتىن بولادى.

سوڭعى جاڭالىقتار

ۇقساس جاڭالىقتار