قوعام • 28 اقپان، 2020

ورالدا كوروناۆيرۋس بار ما؟

541 رەتكورسەتىلدى

باتىس قازاقستان وبلىسىنداعى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى نۇرلىبەك مۇستاەۆ وڭىردە كوروناۆيرۋس ينفەكتسياسىنىڭ الدىن الۋ شارالارى بويىنشا بريفينگ وتكىزدى.

بىرەر كۇن بۇرىن جەلىدە «قاراشىعاناققا يتاليادان چارتەرلىك رەيسپەن كەلگەن يتالياندىق جۇمىسشىلار ەشقانداي كارانتيندىك شارالارسىز قازاقستاندىقتارمەن ارالاسىپ ءجۇر» دەگەن قاۋەسەت تاراعان ەدى. نۇرلىبەك مۇستاەۆ مۇنى جوققا شىعاردى.

- جاقىندا قازاقستان رەسپۋبليكاسى باس سانيتارلىق دارىگەرىنىڭ كوروناۆيرۋسقا قارسى پروفيلاكتيكالىق شارالاردى كۇشەيتۋگە باعىتتالعان قاۋلىسى شىقتى. وسى قاۋلىعا سايكەس، شەت ەلدەردەن كەلىپ جاتقان ازاماتتار ءۇش توپقا ءبولىپ قاراستىرىلادى. ءبىرىنشى توپقا سوڭعى 14 كۇن ىشىندە قىتاي جەرىندە بولعان ازاماتتار مىندەتتى تۇردە 14 كۇندىك ستاتسيونارعا كارانتينگە جاتقىزىلادى. قوسىمشا تاعى 10 كۇن دارىگەر قاداعالاۋىندا بولادى. وسى ءبىرىنشى توپقا قاۋىپتى ۆيرۋس كەڭ تاراپ وتىرعان تايۆان، گانكونگ، ماكاو، جاپونيا، وڭتۇستىك كورەيا، يران، يتاليا مەملەكەتتەرى دە كىرەدى. بۇل ەلدەردەن كەلگەن ازاماتتار كەلگەن جەرىندە، تۇسكەن ورنىندا 14 كۇن وقشاۋلانۋى، دارىگەردىڭ باقىلاۋىندا بولۋى ءتيىس. ەكى اپتا ۋاقىتتان سوڭ تاعى ون كۇن بويى تەلەفون ارقىلى ارنايى مامان كۇن سايىن حابارلاسىپ، جاعدايىن تەكسەرىپ تۇرادى. ەكىنشى توپتاعى مەملەكەتتەن كەلگەن ازاماتتار كەلگەن جەرىندە ەكى اپتا دارىگەر باقىلاۋىندا بولىپ، تاعى 10 كۇن تەلەفون ارقىلى تەكسەرىلەدى. ال ءۇشىنشى توپقا جاتاتىن جولاۋشىلار 24 كۇن بويى تەلەفون ارقىلى تەكسەرىلەدى، - دەدى ەلىمىزدىڭ باس سانيتار دارىگەرىنىڭ قاۋلىسىن تۇسىندىرگەن نۇرلىبەك مۇستاەۆ.

ءدال بۇگىن وبلىس اۋماعىندا №1 كاتەگوريا بويىنشا باقىلاۋدا تۇرعان ەشكىم جوق. №2 توپتا – 1  ادام، №2 توپ بويىنشا – №3 توپ ادام دارىگەرلەردىڭ ءجىتى باقىلاۋىندا تۇر ەكەن. اۋرۋ تارالۋ قاۋپى بار جولاۋشىلاردى تەكسەرۋ ورال قالالىق اۋەجايىندا جۇزەگە اسادى. مۇندا حالىقارالىق «فراكنفۋرت-ورال-نۇر-سۇلتان» اۋە رەيسىنىڭ جانە «ماسكەۋ-ورال» باعىتىنىڭ جولاۋشىلارىن ماماندار ارنايى قىزۋ ولشەگىش قۇرالمەن تەكسەرەدى. ال جەردەگى شەكارا ارقىلى كەلەتىن ادامدار كەدەندىك تەكسەرۋ كەزىندە تولقۇجاتىنداعى بەلگىلەر بويىنشا ۆيرۋسقاۋىپتى مەملەكەتتە بولعان-بولماعانى انىقتالىپ، ءتيىستى ورىندارعا حابارلانادى. 

- اقپان ايىنىڭ باسىنان بەرى قىتاي حالىق رەسپۋبليكاسى اۋماعىنان ءبىزدىڭ وبلىسىمىزعا 132 ادام كەلدى، ولار ءتيىستى باقىلاۋعا الىنىپ، كارانتيندىك شارتتاردى ساقتادى. ولاردىڭ ەشقايسىسىنان قاۋىپتى اۋرۋ بەلگىسى تابىلمادى، - دەدى نۇرلىبەك مۇستاەۆ. ونىڭ ايتۋىنشا، ءدال بۇگىن باقىلاۋدا تۇرعان ادامدار اراسىندا مالايزيا، گەرمانيا، تايلاند، يتاليا، اقش جانە ۇلىبريتانيا ازاماتتارى بار.

 

باتىس قازاقستان

سوڭعى جاڭالىقتار

ۇقساس جاڭالىقتار