اباي • 28 اقپان، 2020

قىزىلوردا: «اباي جولىمەن» رەسپۋبليكالىق اقىندار ايتىسى ءوتتى

210 رەتكورسەتىلدى

قىزىلوردادا اباي قۇنانباي ۇلىنىڭ 175 جىلدىعىنا وراي «اباي جولىمەن» اتتى رەسپۋبليكالىق اقىندار ايتىسى ۇيىمداستىرىلدى.

ءسوز دوداسىنىڭ اشىلۋىنا وسى وڭىردە ساپارمەن جۇرگەن Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەك پەن وبلىس اكىمى قۋانىشبەك ىسقاقوۆ قاتىستى. باۋىرجان قىدىرعالي ۇلى جەتەكشى پارتيانىڭ ءتول ونەرىمىزگە جاساپ جاتقان قولداۋى جايلى تاراتا ايتىپ، ەلىمىزدىڭ ءار تۇكپىرىنەن جينالعان ايتىسكەرلەرگە ساتتىلىك تىلەدى. وبلىس باسشىسى قۋانىشبەك دوسمايىل ۇلى حاكىم ابايدى ۇلىقتاۋ شارالارى الدا دا جالعاساتىنىن جەتكىزدى.

قازاقستاننىڭ ەڭبەك سىڭىرگەن قايراتكەرى ءجۇرسىن ەرمان جۇرگىزگەن ءسوز دوداسىنا سەرىك قۇسانباەۆ (شىعىس قازاقستان وبلىسى)، ايبەك قاليەۆ (ارقالىق قالاسى)، اسپانبەك شۇعاتاەۆ (پاۆلودار قالاسى)، اسەم ەرەجەقىزى (نۇر-سۇلتان قالاسى)، ارۋنا كەرىمبەك (اقتوبە وبلىسى)، جانسايا مۋسينا (باتىس قازاقستان وبلىسى) ايان نيازبەك (شىمكەنت قالاسى)، سۇلۋجان  تاۋبولدى (الماتى قالاسى)، كەنجەباي ءجۇسىپوۆ، مۇحتار نيازوۆ، مەيىربەك سۇلتانحان، بەكسۇلتان ورىنباساروۆ (قىزىلوردا وبلىسى) قاتىستى. قازاقستاننىڭ حالىق اقىنى ءاسيا بەركەنوۆا باستاعان قازىلار القاسىنىڭ قۇرامىندا بەلگىلى جىراۋ الماس الماتوۆ پەن اقىندار عالىم جايلىباي، جاناربەك ءاشىمجان بولدى.

كورەرمەندەر تارتقان جەرەبە ارقىلى ساحناعا شىعاتىن جۇپتار انىقتالعان ايتىستى العاشقى بولىپ شىمكەنتتىك ايان نيازبەك پەن جەرگىلىكتى اقىن كەنجەباي ءجۇسىپوۆ باستادى. ءا دەگەننەن ارىنداعان اياندى ساقا كەنجەباي تەز-اق ساباسىنا ءتۇسىردى. ودان كەيىنگى مۇحتار نيازوۆ پەن ايبەك قاليەۆ، مەيىربەك سۇلتانحان – ارۋنا كەرىمبەك، سەرىك قۇسانباەۆ – سۇلۋجان تاۋبولدى، جانسايا مۋسينا – بەكسۇلتان ورىنباساروۆ، اسپانبەك شۇعاتاەۆ – اسەم ەرەجەقىزى ايتىستارىندا دا كورەرمەننىڭ كوڭىلىنە قونا قالار ورامدى وي، كەستەلى ءسوز ايتىلدى.

قازىلار القاسىنىڭ شەشىمىمەن بەس ساعاتقا سوزىلعان ايتىستىڭ باس جۇلدەسى مۇحتار نيازوۆقا بۇيىردى. ال ءى ورىندى جانسايا مۋسينا يەلەنسە، ءىى ورىندى اسەم ەرەجەقىزى، ءىىى ورىندى مەيىربەك سۇلتانحان مەن ايبەك قاليەۆ ەنشىلەدى.

سوڭعى جاڭالىقتار

ۇقساس جاڭالىقتار