ايماقتار • 26 اقپان، 2020

پاۆلوداردا 346 مىڭ شارشى مەتر اۋماقتا ءۇي سالىنادى

11 رەتكورسەتىلدى

وبلىستىق  قۇرىلىس باسقارماسىنىڭ مالىمەتىنشە، بىلتىر قارجىلاندىرۋدىڭ بارلىق كوزدەرى ەسەبىنەن وڭىردە 332،5 مىڭ شارشى مەتر تۇرعىن پايدالانۋعا بەرىلگەن.

وبلىس اكىمى ابىلقايىر سقاقوۆ تۇرعىندار الدىنداعى ەسەپتى كەزدەسۋىندە تۇرعىن ءۇي كەزەگىندە تۇرعان 27 مىڭ ادامنىڭ سانىن قىسقارتىپ، ولارعا جايلى قونىس سالۋ ءۇشىن جاڭا ستراتەگيا قابىلداۋ قاجەت دەدى. ياعني، ۇيلەردىڭ كىمدەرگە بەرىلەتىنى، قايدا سالىناتىنىنا جانە ينفراقۇرىلىممەن قامتاماسىز ەتۋگە باسىمدىق بەرىلمەدى.

ەلىمىزدىڭ  يندۋستريا جانە ينفراقۇرىلىمدىق دامۋ مينيسترلىگى قۇرىلىس جانە تۇرعىن ءۇي-كوممۋنالدىق شارۋاشىلىق كوميتەتى بەلگىلەگەن جوسپارعا سايكەس، بيىل وبلىستا 346 مىڭ شارشى مەتر باسپانا سالىنادى. وبلىس  ورتالىعىنداعى سارىارقا شاعىن  اۋدانىنىڭ قۇرىلىسى باستالعان ۋاقىتتان بەرى كوپقاباتتى 26 تۇرعىن ءۇي سالىنىپ، جۇزدەگەن پاتەرلەر بەرىلدى.

قازىر بىلتىر قازىعى قاعىلعان 4 ءۇيدىڭ قۇرىلىسى جالعاسۋدا. سونىمەن قاتار، جاڭا 10 ءۇيدىڭ ىرگەتاسىن قالاۋ ءۇشىن قۇرىلىس-مونتاجداۋ جۇمىستارىن باستاۋ جوسپارلانۋدا. وتكەن جىلى «پاۆلودار» الەۋمەتتىك-كاسىپكەرلىك كورپوراتسياسى ارقىلى دوستىق شاعىن اۋدانىندا  قازىر كوپقاباتتى 2 ءۇيدىڭ قۇرىلىسى باستالدى. بيىل بۇل  اۋداندا دا تاعى 3 ءۇي سالىنا باستايدى.

ال، ەكىباستۇزدا 11، اقسۋ قالاسىندا 4 ءۇيدىڭ قۇرىلىسى باستالماق. وڭىردە قابىلدانعان «Nurly Ertis» باعدارلاماسى نۇر-سۇلتان قالاسىنداعى كوپبالالى وتباسىلار مەن جاس مامانداردى وڭىرىمىزگە كوشىرىپ اكەلۋ بويىنشا ءتيىمدى بولعانى بەلگىلى.

بيىل دا بۇل باعدارلاما جالعاسىن تابادى. ەكىباستۇزدا سالىناتىن 11 ءۇيدىڭ 9-ى، اقسۋدا بوي كوتەرەتىن 4 ءۇيدىڭ ەكەۋى باعدارلاما اياسىندا بوي كوتەرەدى. جانە دە «نۇرلى جەر» مەملەكەتتىك باعدارلاماسى بويىنشا وبلىس  ورتالىعىندا 14، ەكىباستۇزدا 2 جانە اقسۋدا 1 باسپانا سالۋ جوسپارلانعان. سونىمەن قاتار، وبلىس ورتالىعىنداعى اۋەجاي قالاشىعى شاعىن اۋدانىندا 37 جەكە پانەلدى ۇيلەر بىرىڭعاي ساۋلەتتىك كەسكىنگە كەلتىرىلەدى.

پاۆلودار وبلىسى

سوڭعى جاڭالىقتار

iPhone 12 Pro رەندەرى شىقتى

تەحنولوگيا • كەشە

ۇقساس جاڭالىقتار