ەل نامىسىن الەكساندر بۋبليك, ميحايل كۋكۋشكين, اندرەي گولۋبەۆ, الەكساندر نەدوۆەسوۆ جانە دميتري پوپكو قورعايدى. ولارعا ۋەسلي كۋلحوف, جان-جۋلەن رويەر, روبين حااسە, تاللون گريكسپۋر, بوتيك ۆان دە زاندشۋلپ قارسى تۇرادى. سپورتتىق ءتۋرنيردىڭ باعدارلاماسىنا سايكەس, 29 اقپان ساعات 14:00-دە «Mega Silk Way» ساۋدا ورتالىعىندا جانكۇيەرلەرمەن كەزدەسۋ وتەدى. شارا بارىسىندا بالالارعا ارنالعان شەبەرلىك ساباعى ۇيىمداستىرىلادى. 3 ناۋرىز ساعات 12:30-دا نيدەرلاندى قۇراماسىنىڭ, ال ساعات 13:15-تە قازاقستان قۇراماسىنىڭ قاتىسۋىمەن ءباسپاسوز كونفەرەنتسياسى وتەدى. جەرەبە 5 ناۋرىزدا جوسپارلانعان.
6 ناۋرىزدا ءتۋرنيردىڭ سالتاناتتى اشىلۋ راسىمىنەن كەيىن 14:00-دە ماتچ باستالادى.
7 ناۋرىزدا قوس كوماندانىڭ كەزدەسۋى ساعات 12:00-دە جالعاسادى. دەۆيس كۋبوگى ءجۇز جىلدان استام تاريحى بار ەرلەر تەننيسىندەگى ءىرى حالىقارالىق كوماندالىق جارىس بولىپ تابىلادى. ول 1900 جىلدان باستاپ جىل سايىن وتكىزىلىپ كەلەدى. كۋبوكتىڭ اعىمداعى يەگەرى - يسپانيا قۇراما كومانداسى.
ايتا كەتسەك, قازاقستان ەرلەر قۇراماسى وسى بەدەلدى ءتۋرنيردىڭ شيرەك فينالىنا بىرنەشە رەت شىقتى. بىلتىر پورتۋگاليا كومانداسىن جەڭگەننەن كەيىن, قۇراما 18-24 قاراشادا جاڭا فورماتتا مادريدتە وتكەن دەۆيس كۋبوگىنىڭ فينالدىق كەزەڭىنە ءوتتى. يسپانيا استاناسىندا قازاقستان قۇراماسى ءبىرىنشى ويىن كۇنى نيدەرلاندى كومانداسىن 2:1 ەسەبىمەن جەڭدى, بىراق ۇلىبريتانيادان 1:2 ەسەبىمەن ۇتىلىپ, پلەي-وففقا شىعا المادى. وتكىزىلگەلى جاتقان ىرىكتەۋ ويىندارى قازاقستاندىق تەننيسشىلەر الەمنىڭ ۇزدىك كوماندالارىنىڭ قاتارىندا بولۋعا لايىقتى ەكەنىن دالەلدەۋگە مۇمكىندىك بەرەدى.
