اقتوبە وبلىسى توتەنشە جاعدايلار دەپارتامەنتىنىڭ ازاماتتىق قورعانىس ءبولىمىنىڭ باستىعى, پودپولكوۆنيك رۋسلان ساحيەۆ باستاعان توپ ءوز جۇمىستارىن الدىمەن شال اقىن اۋدانىنداعى دايىندىق شارالارىن تەكسەرۋدەن باستادى. ولار قاتارداعى جانە وفيتسەرلىك قۇرامنىڭ فۋنكتسيونالدىق مىندەتتەرىن, سۋ تاسقىنى كەزەڭىندە بولجامدى ءىس-ارەكەتتەردىڭ قانداي بولۋى كەرەكتىگىنە نازار اۋداردى. سونىمەن قاتار سۋ باسۋ قاۋپى بار اۋماقتاردا اۆتونومدى جۇمىس ىستەۋ مۇمكىندىگىنە كوڭىل اۋدارا وتىرىپ, قىزمەتكەرلەردى جابدىقتاۋ مەن «دابىل چەموداندارىنىڭ» جيىنتىعى ەرەكشە تەكسەرىلدى.
وسى اۋداننىڭ اۋماعىندا وبلىس كولەمىندەگى ەڭ ۇلكەن «سەرگەەۆ سۋ قويماسى» بار. اۋدان اكىمى نۇرلان ەسىموۆ تەكسەرۋشىلەرگە وسى گيدروتەحنيكالىق قۇرىلىستىڭ جۇمىس ىستەۋى, سۋ تاسقىنى كەزىندەگى جاعدايى تۋرالى ايتىپ بەردى. وسى نىساننىڭ جانە اۋدان ورتالىعى سەرگەەۆكا قالاسى تۇرعىندارىنىڭ قۇلاقتاندىرىلۋ جۇيەسى دە تەكسەرىلدى.
سونداي-اق تەكسەرۋشىلەرگە جاقىن ارادا جولداردا بولعان قار كەپتەلىسى كەزىندە قۇتقارۋ جۇمىستارىن جۇرگىزۋگە تارتىلعان ەۆاكۋاتسيالىق پۋنكت پەن ونىڭ قالاي جۇمىس ىستەگەندىگى تۋرالى دا ايتىلدى.
بۇدان ءارى تەكسەرۋشىلەردىڭ جۇمىس توبى, جوسپارعا سايكەس, قىزىلجار اۋدانىنداعى ەسىل بويىنداعى نوۆونيكولسكوە سەلوسىنا بارىپ, سۋ تاسىعاندا مۇندا قانداي شارالار جاسالاتىندىعىمەن تانىستى. اۋىلدىق وكرۋگتىڭ اكىمى ەلەنا زاحاروۆا ەسىل وزەنىندە جاقىندا سالىنعان كوپىردىڭ سۋ تاسقىنى كەزەڭىندە جۇمىس ىستەۋى تۋرالى ايتىپ, وسى ەلدى مەكەندى سۋ تاسقىنىنان قورعاۋ جونىندەگى ءىس-شارالار تۋرالى ەسەپ بەردى.
سونىمەن قاتار تەكسەرۋشىلەرگە سۋ تاسقىنىنا قارسى ءىس-شارالاردى وتكىزۋ, قاۋىپتى اۋماقتاردان قاردى تاسىمالداۋ بويىنشا قىزىلجار اۋدانى بايتەرەك سەلولىق وكرۋگى جانە مامليۋت اۋدانى مامليۋتكا قالاسى اكىمدەرىنىڭ باياندامالارى تىڭدالدى. ءورت ءسوندىرۋ بولىمدەرىنىڭ قارۋ-جاراعىندا تۇرعان جانە سۋ تاسقىنى كەزىندە پايدالانۋعا ارنالعان سۋ سورعىش تەحنيكالار دا نازاردان تىس قالعان جوق. ءوزىنىڭ سوزىندە تەكسەرۋشىلەر توبىنىڭ باسشىسى رۋسلان ساحيەۆ دايىندىق شارالارىنىڭ قاناعاتتانارلىق دەڭگەيدە ەكەنىن اتاپ ءوتتى. ول وتكەن جىلدارداعى وسىنداعى اۆاريالىق-قۇتقارۋ جۇمىستارىنا قاتىسۋ تاجىريبەسىن ەسكە الىپ, تەحنيكالار مەن ادام رەسۋرستارىن وڭتايلى پايدالانۋ بويىنشا ءوزىنىڭ ۇسىنىستارىن دا ايتتى.
سولتۇستىك قازاقستان وبلىسى
