دەمالىس كۇندەرى اۋا رايى جايىلىپ, جىلىمىق بولعانى جولداردىڭ كوكتايعاق بولۋىنا ۇلاستى. جەكسەنبى كۇنى پوليتسەيلەردىڭ كومەگى قوستانايلىق ءمادي كارىموۆكە ءتيدى. «قوستاناي-مامليۋت» اۆتوجولىنىڭ 135 شاقىرىمىندا ول جۇرگىزىپ كەلە جاتقان «ماز» اۆتوكولىگى جولدان تايىپ كەتىپ, جيەككە شوگىپ قالعان. ايتەۋىر جۇرگىزۋشى ەش جاراقات الماعان, ال اۆتوكولىك وزدىگىنەن شىعا الماي, قالىڭ قاردى كەۋلەپ, باتا بەرگەن. وسى كولىكتى مامليۋت قالاسىنا بەت العان ۋچاسكەلىك پوليتسيا ينسپەكتورلارى حاسان شاۋكەروۆ پەن داۋرەن امانجولوۆ كورىپ, پاترۋلدىك پوليتسيا باتالونىنىڭ (پپب) قىزمەتكەرلەرىنە حابارلايدى. ءوز كەزەگىندە پاترۋلدىك پوليتسيا باتالونى ەكيپاجىنداعى پوليتسيا كاپيتانى ءامىرجان توققوجين مەن پوليتسيا كىشى لەيتەنانتى قانات كەڭەسباەۆ جاقىن ماڭداعى ەكاتەرينوۆكا سەلوسىندا تۇراتىن ك-700 تراكتورىنىڭ جۇرگىزۋشىسى ۆياچەسلاۆ گەناەۆتىڭ كومەگىنە جۇگىنەدى.
46 جاسار اۋىل تۇرعىنى قيىن جاعدايدا قالعان ادامعا بىردەن كومەك قولىن سوزىپ, «ماز-دى» قار قۇرساۋىنان شىعارىپ بەردى.
«جولدا قيىن جاعدايعا تاپ بولعان ادامدارعا كومەكتەسۋ – كەزەكشىلىككە تۇسكەن ءاربىر ەكيپاجعا بەرىلەتىن تاپسىرما عانا ەمەس, بۇل كوپتەگەن سولتۇستىكقازاقستاندىقتاردىڭ ومىرلىك قاعيداسى بولۋى ءتيىس», - دەيدى پد پپب كومانديرىنىڭ ورىنباسارى پوليتسيا كاپيتانى ءۋاليحان ورازالين. — ء«بىر-بىرىنە كومەككە كەلۋ, اسىرەسە اۋا رايى قۇبىلمالى سولتۇستىك وڭىردە اسا ماڭىزدى. قىستا جول جۇرگەن كەزدە اسا ساق بولعان ءجون. وتكەن اپتادا باتالون قىزمەتكەرلەرى ءوز كۇشتەرىمەن جولدا قيىن جاعدايعا تاپ بولعان جۇرگىزۋشىلەرگە 10 رەت كومەك قولىن سوزعان».
سولتۇستىك قازاقستان وبلىسى
