اقىل-ەسى دۇرىس ادامنىڭ جوعالۋى كۇماندى, جوعالعان ادامداردىڭ تىزىمىندەگى 32-ءسى ماسكۇنەمدىككە سالىنعاندار ەكەن. بارلىق جوعالعانداردىڭ 18-ءى پەتروپاۆل قالالىق پوليتسيا باسقارماسىنىڭ ىزدەستىرۋ جۇمىستارىنا الىنعان. قالعاندارى اۋدانداردىڭ اۋماعىنان جوعالعاندار. سونىڭ ىشىندە 10-ى قىزىلجار, 7-ءى ايىرتاۋ اۋدانىندا جانە 5-ءى عابيت مۇسىرەپوۆ اۋدانىنىڭ پوليتسيالارىنا تيەسىلى. قالعاندارى 1-2-دەن باسقا اۋدانداردان جوعالعاندار.
بيىلعى جىلدىڭ باسىنان بەرى 17 ادام جوعالعان دەپ تانىلعان. ول تۋرالى كريمينالدىق پوليتسيا باسقارماسىنىڭ باستىعى, پوليتسيا پولكوۆنيگى پەتر كليموۆ بىلاي دەيدى: «اعىمداعى جىلدىڭ قاڭتار ايىندا ازاماتتاردىڭ جوعالۋى بويىنشا سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىندە 17 فاكت تىركەلدى. ونىڭ ىشىندە جەتەۋى – ەرلەر, ۇشەۋى – ايەلدەر, التاۋى – كامەلەتكە تولماعاندار. 8 ادام ىشكىلىككە سالىنعان. ولاردىڭ بارلىعىنىڭ اتى-جوندەرى بەلگىلى بولدى. اسىرەسە, 14-ءى ءبىر تاۋلىك ىشىندە انىقتالدى».
پوليتسيا قىزمەتكەرلەرىنىڭ ايتۋىنا قاراعاندا جوعالعان ادامداردىڭ كەيبىرى وتباسىلارىندا جاقىندارىمەن رەنجىسكەن جانجالدان كەيىن ۇيلەرىنەن كەتىپ قالسا, تاعى بىرەۋلەرىنىڭ جوعالۋىنا ىشىمدىككە سالىنۋلارى سەبەپشى بولادى.
بيىلعى جىلى جوعالعانداردىڭ قاتارىنا ەنگىزىلگەن مەيرام سماعۇلوۆتى, ۆيكتور راسكاتوۆتى, باقىت حامزينانى ىزدەستىرۋدە كريمينالدىق پوليتسيا باسقارماسى تۇرعىنداردىڭ كومەك كورسەتۋىن سۇرايدى. بۇلار بيىلدان بۇرىن جوعالسا دا ءىز-تۇزسىز كەتكەندەردىڭ قاتارىنا ەندى ەنگىزىلىپ وتىر. سونىڭ ىشىندە 1976 جىلى تاراز قالاسىندا تۋعان مەيرام سماعۇلوۆ 2018 جىلدىڭ قازان ايىندا عابيت مۇسىرەپوۆ اۋدانىنىڭ رۋزاەۆكا سەلوسىنداعى ۇيىنەن شىعىپ, وسى ۋاقىتقا دەيىن حابار-وشارسىز كەتكەن. ءوزى ىشىمدىككە اۋەس, ۇيىنەن بۇرىندارى دا بىرنەشە رەت كەتكەن ەكەن.
36 جاستاعى ۆيكتور راسكاتوۆ پەتروپاۆل قالاسىنداعى ۇيىنەن 2019 جىلدىڭ 30 قىركۇيەگىندە كەتىپ قالعان. سودان بەرى حابار-وشار جوق. ال قازاق اۋىلىنان شىققان 1971 جىلى تۋعان باقىت حامزينا 2019 جىلدىڭ 18 قاراشاسىندا شال اقىن اۋدانىنداعى جاڭاتالاپ اۋىلىنداعى ۇيىنەن شىعىپ, بەلگىسىز باعىتتا كەتىپ قالعان. كۇنى بۇگىنگە دەيىن ودان ەش دەرەك جوق.
ايدىڭ-كۇننىڭ امانىندا ۇيىنەن شىعىپ كەتىپ, ءىز-تۇزسىز جوعالعانداردىڭ كەيبىرىنىڭ دەرەكتەرى وسىنداي.
سولتۇستىك قازاقستان وبلىسى
