ايماقتار • 24 اقپان، 2020

قانسوناردا بۇركىتشى شىعادى اڭعا...

41 رەتكورسەتىلدى

ء«بىر قىزىق ءىسىم ەكەن سۇم جالعاندا...» دەپ ۇلى اباي ايتقان ساياتشىلىق ونەردىڭ سايىسى جەكسەنبى كۇنى سولتۇستىك قازاقستان وبلىسىنداعى بەسكول سەلوسىنىڭ «قۇلاگەر» اتتى يپپودرومىندا اياقتالدى. ول رەسمي تۇردە بۇركىت، سۇڭقار، قارشىعا ونەرلەرىنىڭ رەسپۋبليكالىق چەمپيوناتى دەپ اتالعان.  

ءۇش كۇنگە سوزىلعان سايىس قۇس يەلەرىنىڭ عانا ەمەس جالپى تەرىستىك حالقىنىڭ قىزىقتاعان تاماشا قىزىعىنا اينالدى. بۇل كۇندەرى اۋا-رايى دا جىلىمىق بولىپ، سايىستى تاماشالاۋعا كەلگەندەردى بۇرسەڭ قاقتىرمادى.

بۇركىتشىلەر ەلىمىزدىڭ ون ايماعىنان كەلگەن ەكەن. اتاپ ايتار بولساق، نۇر-سۇلتان مەن شىمكەنت قالالارىنان، اقمولا، الماتى، جامبىل، قاراعاندى، پاۆلودار، ماڭعىستاۋ، شىعىس قازاقستان وبلىستارىنان. سونداي-اق جارىستى وزىندە وتكىزۋشى سللتۇستىك قازاقستان وبلىسىنىڭ ساياتشىلارى قاتىستى.

جارىس ءۇش كەزەڭمەن وتكىزىلدى. العاشقىسى: ۇشىرىلعان قۇستىڭ ساياتشى يەسىنىڭ قولىنا دىبىستاپ شاقىرعاندا قايتا كەلىپ قونۋى. ەكىنشى كەزەڭدە قۇستىڭ ەركىن ۇشۋى تاماشالانىپ، باعالاندى. ەڭ سوڭىندا قارشىعا مەن سۇڭقاردىڭ قويان مەن كەپتەرگە، ال بۇركىتتىڭ شاپقان ات سۇيرەگەن تۇلكىنىڭ تەرىسىنە تۋرا ءتۇسۋى سىنالدى. «توماعاسىن تارتقاندا ءبىر قىرىنان» قايقاڭ قاعىپ اسپانعا كوتەرىلگەن قۇستىڭ قانات-قيرىعى سۋىلداپ، تومەن شۇيىلگەنىنىڭ ءوزى كەرەمەت كورىنىس ەكەن.

1

جارىس قورىتىندىسى بويىنشا تۇركىستان وبلىسىنان كەلگەن داۋرەن ارشابايدىڭ سۇڭقارى ءبىرىنشى ورىن الدى. ال الماتى وبلىسىنان كەلگەن الماس سەيىتجاننىڭ قارشىعاسى الدىنا ەشقايسىن سالمادى. ول ۇشىرىلعان كەپتەرلەردى جارق ەتكىزىپ، قاقشىپ تاستاپ وتىردى. بۇركىتتەر اراسىنان ءبىرىنشى ورىندى ماڭعىستاۋ وبلىسىنىڭ تاستۇلەگى الدى. بۇركىتشى ايشۋاق تايمانوۆتىڭ بۇل قۇسى دا العىر، ناعىز زار شاعىندا ەكەن.

جارىسقا قاتىسقانداردىڭ بارىنە، ونىڭ ىشىندە جەڭىمپازدارعا لايىقتى جۇلدەلەر بەرىلدى.

 

سولتۇستىك قازاقستان وبلىسى

سوڭعى جاڭالىقتار

ەلدىك نىشاندار تاريحى

قازاقستان • كەشە

ۇقساس جاڭالىقتار