جالپى, ميتينگ تۋرالى زاڭ قابىلدانباستان بۇرىن, ونىڭ تۇجىرىمداماسى حالىق اراسىندا وسىلاي كەڭىنەن تالقىلانعانى دۇرىس دەپ سانايمىن. وسىلايشا جاڭا زاڭعا قاتىستى كوپشىلىكتىڭ كوتەرىپ جۇرگەن ماسەلەلەرىنەن بارىنشا حاباردار بولامىز. بۇل اتالعان زاڭدا ازاماتتاردىڭ پىكىرلەرىن ەسكەرۋگە سەپتىگىن تيگىزەدى.
جاڭا زاڭ بەيبىت جينالىستاردى ۇيىمداستىرۋشىلاردىڭ, قاتىسۋشىلاردىڭ جانە باقىلاۋشىلاردىڭ مارتەبەسىن انىقتايدى. بۇعان قوسا زاڭدا جۋرناليستەردىڭ قۇقىقتارى مەن مىندەتتەرى دە جازىلادى. ميتينگ وتكىزۋدىڭ ءتارتىبىن رەتتەيتىن زاڭ وسىنىسىمەن ماڭىزدى.
ميتينگ دەگەن – ازاماتتاردىڭ بيلىككە ءوز تالاپ-تىلەگىن جەتكىزۋدىڭ قۇرالى. بۇل قۇرالدى ءتيىمدى پايدالانۋدى رەتتەۋ ءۇشىن جاڭا زاڭ قابىلداۋ قاجەت. ويتكەنى قوعام وزگەرگەنىن, سوعان سايكەس جاڭا تالاپتارعا جاۋاپ بەرە المايتىن بۇرىنعى زاڭنىڭ ەسكىرگەنىن ۋاقىت كورسەتىپ وتىر. ءارى ميتينگ تۋرالى زاڭ ازاماتتىق قوعامعا باستايدى. بۇگىندە كوشەگە شىقپاسا دا, الەۋمەتتىك جەلىلەر ارقىلى كوكەيكەستى ماسەلەلەر كوتەرىپ جۇرگەن ازاماتتار بارشىلىق. جانە ولاردىڭ توڭىرەگىنە توپتاسقان ادامدار دا بار. ونداي بەلسەندىلەردىڭ جەلىدەگى وتكىر سىن-ەسكەرتپەلەرىنىڭ ءبارى جەتەتىن جەرىنە جەتىپ, ەسكەرىلىپ جاتىر. سوندىقتان بىزگە قۇر ەموتسياعا سالماي, ويىمىزدى سالماقتى, بايىپتى جەتكىزۋىمىز كەرەك. اتالعان زاڭ وسىنداي ماسەلەلەردى جۇيەلەيدى. بۇل زاڭنىڭ قاجەت ەكەنىن جانە تەزىرەك قابىلدانعانىن حالىق تا, بيلىك تە ءتۇسىنىپ وتىر.
مۇرات ابەنوۆ,
قوعام قايراتكەرى, ۇلتتىق قوعامدىق سەنىم كەڭەسىنىڭ مۇشەسى
