قوعام • 23 اقپان، 2020

جالاقىنىڭ ورتاشا دەڭگەيى تومەن

173 رەتكورسەتىلدى

ادامداردىڭ الەۋمەتتىك-تۇرمىستىق كوڭىل-كۇيىنە تىكەلەي اسەر ەتەتىن فاكتورلاردىڭ ءبىرى –جالاقى. ونىڭ كولەمى اتقارىلعان جۇمىستار مەن توگىلگەن ماڭداي تەردىڭ وتەۋىنە سايكەس كەلمەسە، بەلگىلى ءبىر كاسىپورىندا قىزمەت جاسايتىن جۇمىسشىلاردىڭ ورىندى تالاپ تىلەكتەرى مەن نارازىلىعىن تۋعىزۋى ابدەن مۇمكىن.

بيىلعى اقپان ايىنىڭ 20 جۇلدىزىندا اقتوبە وبلىسى اۋماعىنداعى «ن-تەحسەرۆيس» كومپانياسىنىڭ اۋىسىم قىزمەتكەرلەرى اراسىندا ءدال وسىنداي جاعداي ورىن الدى.

ناقتىراق ايتقاندا ءدال وسى كۇنى تەمىر اۋدانىنداعى كەڭقياق كەن ورنىندا اتالعان كومپانيا قۇرامىنداعى بريگادا جۇمىسشىلارى كەزەكتى اۋىسىمعا شىقپاي قالدى. وسى جاعدايعا بايلانىستى كەڭقياققا شۇعىل اتتانعان اقتوبە وبلىسى اكىمىنىڭ ورىنباسارى قايرات بەكەنوۆ پەن كومپانيا ديرەكتورىنىڭ مىندەتىن اتقارۋشى ۆان يلين جانە ەڭبەك ينسپەكتسياسىنىڭ وكىلدەرى ماسەلەنىڭ ءمان-جايىن انىقتاۋ كەزىندە ونىڭ باستى سەبەبى جالاقى مولشەرىنىڭ تومەن ەكەندىگى بەلگىلى بولدى.

وسىعان وراي اتالعان تاراپتار «ن-تەحسەرۆيس» كومپانياسىنىڭ بەيجىڭدەگى باس كەڭسەسىمەن ءتيىستى كەلىسسوزدەر جۇرگىزۋدى قاجەت دەپ تاپتى. سونىڭ ناتيجەسىندە تەك ءبىر اۋىسىمنىڭ عانا ەمەس، سونىمەن بىرگە مۇنداعى ۆاحتالىق ادىسپەن جۇمىس ىستەيتىن بارلىق قىزمەتكەرلەردىڭ جالاقىسىن 33 پايىزعا كوتەرۋ جونىندە شۇعىل شەشىم قابىلداندى. وسى تۇستا بۇدان 1-2 اپتا بۇرىن «سNPC-اقتوبە مۇنايگاز» اق قۇرىلىمدارىنا قاراستى قىزمەتكەرلەردىڭ جالاقىسى دا جوعارىدا كورسەتىلگەندەي كولەمدە وسكەنىن ايتا كەتكەن ءجون.

تاعى ءبىر جاعىمدى ءجاي مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس، وڭىردە شەتەلدىك كومپانيالاردا قىزمەت ەتەتىن قازاقستاندىق جۇمىسشىلاردىڭ جالاقىسىن كوتەرۋ، ونى شەتەلدىكتەرگە تولەنەتىن تولەمدەگە سايكەس كەلتىرۋ جونىندە بىرقاتار ءىس-شارالار بەلگىلەنگەنى. سونداي-اق تاۋارلار مەن قىزمەتتەردى ساتىپ الۋداعى قازاقستاندىق قامتۋ ۇلەسىن كوتەرۋ ىسىندە دە وڭ وزگەرىستەر جوق ەمەس.

سەرۆيستىك كومپانيالار تابىسىنىڭ ءوسۋى، تەك كومىرسۋتەگى شيكىزاتىن وندىرۋگە عانا ەمەس، كورسەتىلەتىن قىزمەتتەر كولەمىنە دە بايلانىستى ەكەنى حاق. بۇل رەتتە جەرىلىكتى اتقارۋشى ورگاندار ولارمەن تاريفتەردى كوتەرۋگە قاتىستى كەلىسسوزدەر جۇرگىزۋى دە وڭ ناتيجەلەرگە باستاپ كەلەدى. ياعني ايماقتا مۇنداي ۇسىنىستار سەرۆيستىك كومپانيالار تاراپىنان قولداۋ تاۋىپ، بيىلعى 2020 جىلدىڭ 1 ناۋرىزىنان باستاپ تاريفتەردىڭ قۇنى 10 پايىزعا ۇلعايىپ وتىر. ءوز كەزەگىندە مۇنداي قادامدار مۇناي-گاز ءوندىرىسى سالاسىندا جۇمىس جاسايتىن قىزمەتكەرلەردىڭ جالاقىسىن كوتەرۋ ىسىنە ءوز سەپتىگىن تيگىزبەك. سونداي-اق جۋرناليستىك زەرتتەۋلەر مەن تالداۋلار بارىسى اۋماقتاعى كەن ورىندارىندا جۇمىسشىلاردى ارنايى كيىم ۇلگىلەرىمەن جاساقتاۋ جانە ولاردى ساپالى ءنارلى دە قۇنارلى تاعام مازىرلەرىمەن قامتۋ جونىندە دە تۇيتكىلدەر ورىن الىپ قالاتىنىن كورسەتەدى. ونى تۇبەگەيلى شەشۋدىڭ باستى ءبىر كىلتى –ۇجىمدىق شارتتار بولىپ وتىر.  ياعني الداعى ۋاقىتتا بۇل ماسەلەدە كاسىپورىندار مەن كاسىپوداق ۇيىمدارى باسشىلارى اراسىندا قول قويىلاتىن وسىنداي قابىرعالىق قۇجاتتار ارقىلى شەشۋ كوزدەلگەن. تۇپتەي كەلگەندە بۇگىنگى باستى ماسەلە شەتەدىك كومپانيالارداعى جۇمىس كۇشتەرىن بىرتىندەپ، ساتىلاپ ازايتىپ، ولاردىڭ ورنىن قازاقستاندىق كادرلەرمەن الماستىرا بەرۋ بولماق. بۇل باعىتتا مامانداردى ءوسىرۋ مەن قايتا ازىرلەۋگە قاتىستى ماسەلەلەر الدىڭعى كەزەككە شىعادى. شەتەلدىك كومپانيالار وكىلدەرى جۇرگىزەتىن ءىستى قاتاڭ باقىلاۋعا الۋدىڭ قاجەتتىلىگى دە وسىندا دەيدى اقتوبە وبلىسى اكىمىنىڭ ورىنباسارى قايرات بەكەنوۆ.

مىنە، جوعارىدا كورسەتىلگەن بىرقاتار دەرەكتەر مەن ساندىق كورسەتكىشەر وبلىستا مۇناي-گاز، كەن جانە وزگە دە جەراستى قازبا بايلىقتارىن يگەرۋ ءىسى سالاسىندا جۇمىس جاسايتىن قىزسەتكەرلەردىڭ جالاقىلارىن ءوسىرۋ ىسىندە ءبىراز كەشەندى شارالاردىڭ الىنعانىن ايعاقتايدى. تالاس جوق، مۇنىڭ ءوزى وتە جاعىمدى ءجايت. قۇپتاۋعا دا قۋاتتاۋعا دا ابدەن تۇرارلىقتاي ءىس. ايتسە دە قازىرگى كۇنى وبلىس تۇرعىندارىنىڭ ورتاشا ايلىق جالاقىسىنىڭ كولەمى اتالعان سالالارداعى ءوسىپ جاتقان جالاقى ەسەبىەن جاسالعانىن جاسىرىپ قالۋدىڭ قانداي قاجەتى بار. بۇل شىندىقتى ەشكىم دە جوققا شىعارا المايدى. تىپتەن سونىڭ وزىندە وڭىردەگى ورتاشا جالاقى دەڭگەيى رەسپۋبليكالىق ورتاشا كورسەتكىشتەن 16 پايىزعا تومەن بولىپ وتىر. راس، وڭىردە ونى ءوسىرۋ جونىندە بىرقاتار جۇمىستار اتقارىلعان. الدىڭعى جىلدارمەن سالىستىرعاندا بەلگىلى ءبىر دەڭگەيدەگى ءوسۋ كورسەتكىشتەرى دە تىركەلگەن. ايتسە دە سوعان قاراماستان ازىرگى اقتوبەلىكتەر ورتاشا جالاقى مولشەرى جونىنەن ەلىمىزدە توعىزىنشى ورىندا تۇر ەكەن. سونداي-اق وبلىستاعى ورتاشا جالاقى مولشەرى رەسپۋبليكانىڭ باتىس وڭىرلەرى اراسىنداعى ەڭ تومەنگى كورسەتكىش ەكەنى قۋانتا قويمايدى. اقتوبە وبلىسىنىڭ اكىمى وڭداسىن ورازالين بيىلعى 2020 جىلدىڭ 12 اقپانى كۇنى تۇرعىندارعا بەرگەن ەسەبى كەزىندە مۇنى اشىق تۇردە مالىمدەدى.

ارينە، وڭردەگى ورتاشا جالاقى مولشەرىنىڭ رەسپۋبليكالىق ورتاشا ەسەپتەن 16 پايىزعا تومەن بولۋى، ەكى اراداعى ايىرماشىلىقتىڭ وتە جوعارى ەكەنىن كورسەتەدى. اتالعان ساننىڭ ءوزى مەن مۇندالاپ ءوزى سويلەپ ءوزىن كوتەرۋ كەرەكتىگىن مەڭزەپ تۇرعانداي. سوندىقتان دا بۇگىنگى كۇنى وڭىردەگى مۇددەلى ۇيىمداردىڭ باستى نازارى ەڭ الدىڭعى كەزەكتە جالاقى مولشەرىن كەم دەگەندە رەسپۋبليكالىق ورتاشا كورسەتكىش دەڭگەيىنە جەتكىزۋگە اۋدارىلۋى كەرەكتىگى ايقىن كورىنەدى. كوڭىلگە مەدەۋ تۇتارلىق ءجايت وبلىستا بۇعان الداعى 2025 جىلعا دەيىن جەتۋ ءۇشىن ءتيستى شارالار كەشەنى بەلگىلەنگەن. ونى جۇزەگە اسىرۋدىڭ باستى تۇتقاسى وبلىس تۇرعىندارىنىڭ تابىسىن ءار جىل سايىن ءوسۋىن قامتاماسىز ەتۋگە باعىتتالعان.

اتالعان ءىس-شارالار كەشەنى قازىردىڭ وزىندە باستالىپ كەتكەنى ۇلكەن ءۇمىت تۋعىزادى. بۇل باعىتتاعى باستى نازار مادەنيەت، حالىقتى الەۋمەتتىك قورعاۋ جانە باستاۋىش، نەگىزگى، سونداي-اق جالپى ورتا ءبىلىم بەرۋ قىزمەتكەرلەرىنىڭ جالاقىلارىن ورتا ەسەپپەن 30 پايىزعا وسىرۋە اۋدارىلعان.

 

اقتوبە وبلىسى  

سوڭعى جاڭالىقتار

iPhone 12 Pro رەندەرى شىقتى

تەحنولوگيا • كەشە

ۇقساس جاڭالىقتار