قوعام • 21 اقپان، 2020

بەيبىت جيىندار پوزيتسيانى اشىق ءبىلدىرۋدىڭ قۇرالى

27 رەتكورسەتىلدى

جۇما كۇنى پەتروپاۆل قالاسىنا اقپارات جانە قوعامدىق دامۋ مينيسترلىگىنىڭ جاۋاپتى حاتشىسى جانات قوجاحمەتوۆ، مينيسترلىكتىڭ زاڭ دەپارتامەنتى باستىعىنىڭ ورىنباسارى ادىلبەك مۇحامبەتقاليق ۇلى كەلىپ، «ازاماتتىق اليانس قاۋىمداستىعى»  مۇشەلەرىنە، ساياسي پارتيالار وكىلدەرىنە جانە باسقا دا بەلسەندى ازاماتتارعا «قازاقستان رەسپۋبليكاسىندا بەيبىت جينالىستاردى ۇيىمداستىرۋ جانە وتكىزۋ تۋرالى» زاڭ جوباسىن ءتۇسىندىرىپ، اڭگىمە وتكىزدى.

زاڭ جوباسى پرەزيدەنت قاسىم-جومارت توقاەۆتىڭ «ميتينگىلەردى ۇيىمداستىرۋدى حابارلاۋ ءپرينتسيپىن ەنگىزۋىمىز كەرەك، بۇل ءبىزدىڭ كونستيتۋتسيامىزعا قايشى ەمەس. ەگەر زاڭدى بۇزباسا، قوعامدىق ءتارتىپ پەن ازاماتتاردىڭ تىنىشتىعىنا نۇقسان كەلتىرمەسە ميتينگتەرگە قارسىلىق جوق. قوعامدىق ساناعا ميتينگ وتكىزۋ مادەنيەتىن ەگۋ ۋاقىتى كەلدى. قوعامعا دا، مەملەكەتكە دە پوزيتسيالاردىڭ اشىق ءبىلدىرىلۋىنە تۇسىنىستىكپەن قاراۋ كەرەك. بۇل قاجەتتىلىك، وعان ماجبۇرلىكپەن ەمەس، سانالىلىقپەن وزدىگىمىزدەن جەتۋىمىز كەرەك»، دەگەن سوزىنەن كەيىن اقپارات جانە قوعامدىق دامۋ مينيسترلىگى بەيبىت جيىندار تۋرالى زاڭ جوباسىن ازىرلەگەن. جانات قوجاحمەتوۆتىڭ ايتۋىنا قاراعاندا ول كوپتەگەن دەموكراتيالىق ەلدەردىڭ وسى تارىزدەس زاڭدارىنىڭ تاجىريبەسىن زەرتتەۋ ارقىلى جاسالعان. زاڭ جوباسى ازاماتتاردىڭ قۇقى مەن بوستاندىعىنىڭ ساقتالۋىنا تولىق كەپىلدىك بەرەدى.

سونىمەن قاتار شەشەن قانداي ادامدارعا جانە قانداي جاعدايلاردا بەيبىت جيىندار ۇيىمداستىرۋعا بولمايتىندىعىن دا اتاپ ءوتتى. بەيبىت جيىندار وتكىزۋدى جاريالاۋ، وعان كەلىسىم بەرۋ نەمەسە بەرمەۋ تارتىپتەرى، ورىنداردى بەلگىلەۋ، قانشا ادامعا دەيىن  رۇقسات ەتۋ جانە ت.ب. نورمالاردىڭ ءبارىن شەشەن تاپتىشتەپ بايانداپ بەردى. سونىڭ ىشىندە بەيبىت جيىن وتكىزۋگە پەتروپاۆل قالاسىندا ءتورت ورىن بەلگىلەنگەن ەكەن.

تىڭداۋشىلار اراسىندا زاڭ جوباسىمەن ءجىتى تانىسىپ، ونى زەرتتەگەن ادامدار از بولسا دا وزدەرىنىڭ قۇقىن شەكتەۋى مۇمكىن دەگەن كەيبىر نورمالار ولاردىڭ سۇراقتارىن تۋدىردى. ماسەلەن، زاڭ جوباسىندا "250 ادامعا دەيىن قاتىساتىن شارانى وتكىزۋ ءۇشىن بيلىكتى حاباردار ەتۋ جەتكىلىكتى" دەپ كورسەتىلگەن. ەگەر مۇنداي حابارلاۋدان كەيىن زاڭدا بەلگىلەنگەن مەرزىم ىشىندە جەرگىلىكتى اتقارۋشى ورگاننان جاۋاپ بولماسا، اكتسيا وتكىزۋ كەلىسىلگەن بولىپ سانالادى ەكەن. بىراق جەرگىلىكتى قۇقىق قورعاۋ ورگاندارى ءتىپتى 250 ادامعا جەتپەيتىن جيىنداردى دا «ادام سانى اسىپ كەتتى» دەگەندى سىلتاۋراتىپ كۇشپەن تاراتىپ جىبەرۋى مۇمكىن عوي. ويتكەنى، كەلگەندەردى كىم ساناپ جاتىر، ولاردىڭ ءىشىندە جاي كورۋگە بارعاندار دا، جۋرناليستەر دە بولادى ەمەس پە؟ ال كەز كەلگەن سوتقا «سانىمىز 250-دەن اسپاپ ەدى» دەپ دالەلدەي المايسىڭ، سوندىقتان ۇيىمداستىرۋشى جاۋاپكەر بولىپ شىقپاي ما دەگەن سۇراق قويىلدى. وعان ج.قوجاحمەتوۆ قازىرگى بەينەكورىنىس تەحنيكالارى مۇندايعا جول بەرگىزبەيتىنىن، ەگەر قۇقىق قورعاۋ ورگاندارى تاراپىنان زاڭسىزدىققا جول بەرىلسە، ولاردىڭ جاۋاپكەرشىلىك تارتاتىنىن ايتتى.

جالپى، جينالعاندار زاڭ جوباسى تۋرالى ءبىرشاما ماعلۇماتتار الىپ، وزدەرى ءۇشىن پايدالى اقپارات الدى.

 

سوڭعى جاڭالىقتار

iPhone 12 Pro رەندەرى شىقتى

تەحنولوگيا • كەشە

ۇقساس جاڭالىقتار