بۇل تۋرالى «سامۇرىق-ەنەرگو» اق باسقارما توراعاسى باقىتجان جولامانوۆ پارلامەنت سەناتىنىڭ ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىندە سويلەگەن سوزىندە ايتتى. قازاقستانداعى ءىرى ەلەكتر ەنەرگەتيكالىق حولدينگ باسشىسىنىڭ ايتۋىنشا, 2020 جىلى ەكىباستۇز گرەس-2 ستانساسىن كەڭەيتۋ جانە رەكونسترۋكتسيالاۋ جوباسىنىڭ جوبالاۋ-سمەتالىق قۇجاتتاماسىنا تۇزەتۋلەر ەنگىزۋ اياقتالادى.
ەكىباستۇز گرەس-2 نىسانىندا جاڭا ەنەرگيا بلوگىن ىسكە قوسۋ بەلگىلەنگەن قۋات كولەمىن 636 مۆت-قا ارتتىرۋعا مۇمكىندىك بەرەدى. «سامۇرىق-ەنەرگو» 2021 جىلى جوباعا جۇمسالعان قارجىنىڭ وتەلۋىن قامتاماسىز ەتۋ ماقساتىندا نارىق كەڭەسىنە قۋات نارىعى اياسىندا 2025 جىلدان باستاپ قۋاتقا جەكە تاريف بەلگىلەۋگە رۇقسات الۋ ءۇشىن ءوتىنىم بەرۋدى جوسپارلاپ وتىر.
2019 جىلعى جەلتوقسان ايىندا «سامۇرىق-قازىنا» اق رەسەيلىك «ينتەر راو ەەس» واو كومپانياسىنان ستانسانىڭ 50 پايىزدىق اكتسيالار ۇلەسىن ساتىپ العانى بەلگىلى. بۇگىندە قور «سامۇرىق-ەنەرگو» اق-پەن بىرلەسە وتىرىپ ەكىباستۇز گرەس-2 ستانساسىنا تەپە-تەڭدىك نەگىزدە يەلىك ەتەدى.
