ايماقتار • 20 اقپان، 2020

سولتۇستىك قازاقستاندا 37 ادامى بار 15 كولىك قۇتقارىلدى

16 رەتكورسەتىلدى

ات قۇلاعى كورىنبەس اقپاننىڭ اقىرعان بورانى سولتۇستىكتىڭ جولدارىن جاۋىپ تاستاعانىمەن قويماي، جەڭىل كولىكتەردى قارعا كومىپ جاتىر. 20 اقپانعا قاراعان ءتۇنى قار قۇرساۋىندا قالعان، جوعارىدا ايتىلعان كولىكتەر تەگىس تيميريازەۆ اۋدانى دميتريەۆكا سەلوسىنىڭ ماڭىنداعى «كت-27» دەپ اتالاتىن «ۆولوشەنكا – تيميريازەۆ» رەسپۋبليكالىق ماڭىزى بار اۆتوجولىندا №18-ءشى ءورت ءسوندىرۋ ءبولىمىنىڭ «نيۆا برونتو» جول تالعامايتىن كولىگى جانە 3 «دەۋ–63» تەحنيكاسىنىڭ كۇشىمەن قاردان قازىلىپ الىندى. 15 بىرلىك اۆتوكولىكتە 37 ادام، ونىڭ ىشىندە 1 بالا بولعان.

ايتەۋىر قازا بولعاندار مەن زارداپ شەككەندەر جوق. سينوپتيكتەر الداعى كۇندەردە دە وسىنداي كۇردەلى اۋا-رايى ساقتالادى دەپ بولجاۋدا. اۋانىڭ تەمپەراتۋراسى اسا سۋىق بولماسا دا كۇشتى بوران كوز اشتىرار ەمەس.

قازىر سولتۇستىك قازاقستان وبلىسىندا اۆتوكولىكتىڭ بارلىق تۇرلەرى ءۇشىن اۆتوجولداردىڭ 42 ۋچاسكەسىندە قوزعالىس جابىلدى. ونىڭ ىشىندە 5-ءۋى رەسپۋبليكالىق ماڭىزى بار، 37-ءسى وبلىستىق ماڭىزى بار جولدار. تج دەپارتامەنتىنىڭ، پوليتسيا دەپارتامەنتىنىڭ، جولاۋشىلار كولىگى جانە اۆتوموبيل جولدارى باسقارماسىنىڭ، «قازاۆتوجول ۇك» اق جاۋاپتى قىزمەتكەرلەرىنىڭ قاتىسۋىمەن وبلىستىق جەدەل شتاب جۇمىس ىستەيدى، زارداپ شەككەندەردەن حابار قابىلداۋ ءۇشىن «جەدەل جەلى» جۇمىسقا قوسىلعان.

رەسپۋبليكالىق ماڭىزى بار «جەزقازگان – پەتروپاۆل» اۆتوجولىنىڭ كەڭەس جانە جاڭاجول اۋىلدارىنىڭ اراسىنداعى 30 شاقىرىمدىق ۋچاسكەدەن شال اقىن اۋدانىنىڭ  № 6-شى ءورت ءسوندىرۋ قىزمەتى قۇرالدارىنىڭ كۇشىمەن جانە «اسا–20» اۆاريالىق-قۇتقارۋ اۆتوكولىگى پايدالانىلىپ جول جيەگىنە ءتۇسىپ كەتكەن مەتالل قۇبىرلارمەن تيەلگەن VOLVO جۇك ءاۆتوموبيلى شىعارىلدى. بۇل قۇتقارۋ جۇمىسىنا ينجەنەرلىك تەحنيكانىڭ 6 بىرلىگى مەن جەكە قۇرامنىڭ 12 ادامى جۇمىلدىرىلدى.

اقپاننىڭ ايىقپاس بورانىمەن ايقاس ودان ءارى جالعاسۋدا.

سولتۇستىك قازاقستان وبلىسى 

سوڭعى جاڭالىقتار

ەرلىكتى دارىپتەيتىن قوماقتى قور

رۋحانيات • 05 ماۋسىم، 2020

ۇقساس جاڭالىقتار